Isukulu lya Gileadi Ilyalenga 123
Abapwishishe Isukulu lya Gileadi Babakonkomesha “Ukutendeka Ukwimba”
PA Cibelushi, pa September 8, 2007, abantu 6,352 abafumine mu fyalo 41 e basangilweko ilyo abali mwi Sukulu lya Gileadi ilyalenga 123 balepwisha. Lintu 10:00 hrs yakumene, munyinefwe Anthony Morris, uwaba mwi Bumba Litungulula, uwali ceyamani pali iyi programu, asengele bonse abasangwileko. Pa numa ya kulandapo amashiwi ya kwiswila, aitile kalanda wa kubalilapo, munyina Gary Breaux uwaba muli Komiti ya Musambo uwa mu United States.
Munyina Breaux aebele abalepwisha isukulu ukutila te mulandu ne fyo abacita ukufwaya kwa kwa Yehova bamoneka, baliyemba mu menso ya kwa Yehova. (Yer. 13:11) Akoseleshe abalepwisha isukulu ukutila bafwile ukutwalilila ukucita ukufwaya kwa kwa Yehova pa kuti balemoneka abayemba mu menso yakwe. Kalanda uwa bubili, munyina Gerrit Lösch uwa mwi Bumba Litungulula alandile ukuti caliba fye bwino ukwenekela icilambu ilyo tulebombela Yehova. (Heb. 11:6) Nangu cibe fyo, tufwile ukulabombela Yehova pa mulandu wa kuti twalimutemwa.
Kalanda wakonkelepo ni munyina William Samuelson uwangalila Amasukulu ya Bulesa. Mu lyashi lyakwe aebele abalepwisha isukulu lya Gileadi ukutwalilila ukuba aba cishinka ilyo balebomba umulimo wacindama uwa kusabankanya Imfumu iileteka kabili abebele no kuti nga batwalilila ukuba ne mibele iisuma e lyo bambi bakabacindika.a Munyina Sam Roberson, uwafwilisha kangalila wa Masukulu ya Bulesa akoseleshe abalepwisha isukulu ukuti lyonse balingile ukulamona fye imibele iisuma muli bambi. Ici cikalenga ‘bakatemwe aba bwananyina bonse.’—1 Pet. 2:17.
Pa numa ya aya malyashi ya kukoselesha, munyina Mark Noumair kafundisha wa pa Gileadi aipwishe bamo abalepwisha isukulu pa fyacitike ilyo baleshimikila pa nshita bali kwi sukulu. Ifyo bashimike fyalengele bonse abalekutika ukushininkisha ukuti balitemenwe umulimo wa kushimikila kabili balefwaisha ukulayafwa bambi. Munyina Kent Fischer uubombela ku Bethel Office ya ku Patterson aipwishe ababa muli baKomiti ba Misambo mu fyalo umwaba bamishonari. Ifyebo aba bamunyinefwe balandile fyalengele abalekutika ukwishiba ukuti bamishonari abapya balabasunga bwino ku fyalo uko babatuma. Pa basangilweko pali na bafyashi ba balepwisha Isukulu lya Gileadi. Munyina Izak Marais uubombela ku Translation Services Department (dipartimenti ilolekesha pa mulimo wa kupilibula) aipwishe bamo abakokola muli bumishonari, kabili ifyo bashimike fyalengele abalepwisha isukulu ukwishiba ukuti bakaipakisha ukubomba uyu mulimo.
Munyinefwe Geoffrey Jackson uwa mwi Bumba Litungulula, alandile ilyashi likalamba pali uyu programu ilyaleti: “Apo Namusambilila Ifintu Ifingi, Bushe Finshi Mulingile Ukucita?” Munyinefwe Jackson, uwabombelepo bumishonari mupepi ne myaka 25 ku South Pacific, alandile pa fyebo Yesu asosele ilyo alesondwelela Ilyashi lya pa Lupili. Muli lilya lyashi, Yesu alandile pa bantu babili abakuulile amayanda, umo ali uwashilimuka e lyo umbi na o ali muwelewele. Munyinefwe Jackson alandile ukuti nalimo bakuulile amayanda mu ncende imo ine. Nangu cibe fyo, umuwelewele akuulile ing’anda pa muulu fye, pa musensenga, lelo uwashilimuka aimbile umufula ukufika pa nshi apali umwalala e po atendekele ukukuula. Ilyo kwaishile icipuupu icikalamba, ing’anda bakuulile pa mwalala tayabongolweke lelo iyo bakuulile pa musensenga yalibongolweke.—Mat. 7:24-27; Luka 6:48.
Yesu alondolwele ukuti ulya muntu umuwelewele aba nga bantu abalekutika ku fyo Yesu alesambilisha lelo abashalecita ifyo balesambilila. Umuntu uwali uwashilimuka ali nga balya abaumfwile ifyo Yesu alebasambilisha no kucita ifyo balesambilila. Munyinefwe Jackson aebele abalepwisha isukulu ukuti, “Nga mukalacita ifyo mwasambilile mwi sukulu lya Gileadi, mukaba kwati ni ulya muntu washilimuka.” E co pa kusondwelela ilyashi akonkomeshe abalepwisha isukulu ukuti bafwile “ukutendeka ukwimba” mu mulimo wabo uwa bumishonari.
Mu kulekelesha, abalepwisha isukulu balibapeele amadiploma kabili balibebele no ko bali no kuya mukubombela. Lyena munyinefwe Morris alandile ifyebo fya kulekelesha. Akoseleshe abalepwisha isukulu ukuti bafwile lyonse ukulakonka Yesu kabili balingile ukushintilila pali Yehova pa kuti alebakosha. Awe ifi fine e fyo na programu yapwile.
[Futunoti]
a Komiti ya Kusambilisha, e yangalila Dipartimenti ilolekesha pa Masukulu ya Bulesa, kabili iyi Dipartimenti e yangalila Isukulu lya Gileadi, isukulu lya baba muli baKomiti ba Misambo, e lyo ne sukulu lya bakangalila benda.
[Akabokoshi pe bula 31]
IFIPENDO FYA BALI MU KALASI
Bafumine mu fyalo: 10
Bakayabombela mu fyalo: 24
Abasambi bonse pamo bali: 56
Imyaka ya kufyalwa ili: 33.5
Imyaka baba mu cine ili: 17.9
Imyaka babomba mu mulimo wa nshita yonse ili: 13.8
[Icikope pe bula 32]
Abapwishishe Isukulu lya Gileadi Ilyalenga 123
Mu mutande wa mashina, ukupenda kutampiile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.