Bushe Umuntu Nga Mupiina Ninshi Lesa Tamupaala?
LESA aebele abena Israele ukuti: “Takuli nangu umo pali imwe uukaba umupiina.” Ico abebele ifi mulandu wa kuti kwali amafunde ayalelanda pa kusakamana abapiina no kusuulako ku nkongole. (Amalango 15:1-4, 7-10) E ico takwali umwina Israele nangu umo uwali no kuba umupiina, pantu Yehova alibalaile ukuti akabapaala. Lelo pa kuti abapaale, balekabila ukumfwila Amafunde, nomba abena Israele balifililwe ukumfwila Amafunde.
Nomba ici tacalolele mu kuti abashakwete ifyuma ninshi Lesa talebapaala, nelyo ukutila abakwete ifyuma ninshi Lesa alebapaala. Ababomfi ba kwa Lesa abengi bali bapiina. Kasesema Amose ali mupiina, aleteka impaanga kabili limo alebomba mu mabala. (Amose 1:1; 7:14) Ilyo mu Israele mwaponene icipowe mu nshiku sha kwa Eliya kasesema, Eliya alesakamanwa na mukamfwilwa umupiina, uwakwete fye utumikate no tumafuta utunono lelo utushalepwa. Eliya na mukamfwilwa tabasangwike abakankaala; Yehova alebapekanishisha fye ifyo balekabila.—1 Ishamfumu 17:8-16.
Ificitika ukwabula ukwenekela kuti fyalenga abantu ukuba abapiina. Amasanso no kulwala kuti fyalenga umuntu ukukanalabomba incito pa kashita kamo nelyo ukulekelela fye. Kabili imfwa kuti yalenga bamo ukushala abana ba nshiwa nangu bamukamfwilwa. Nangu ni aya yene macushi yabipisha ifi nga yacitikila umuntu, tacipilibula ukuti ninshi Lesa talemupaala. Ilyashi lya kwa Naomi na Ruti ililangilila ukuti Yehova alasakamana abapiina cikuuku cikuuku lilatusansamusha nga nshi. Nangu ca kutila Naomi na Ruti bashele abapiina ilyo abena mwabo bafwile, Yehova Lesa alibapaalile kabili alebapeela ifyo balekabila.—Ruti 1:1-6; 2:2-12; 4:13-17.
Kanshi umuntu nga mupiina, te kutila ninshi Lesa tamupaala. Abantu aba cishinka kuli Yehova Lesa balicetekela amashiwi ayo Imfumu Davidi yasosele ukuti: “Nali umulumendo, nomba ninkota, lelo nshatalamona uwalungama nalekeleshiwa, nelyo abana bakwe balelombelesha ifya kulya.”—Amalumbo 37:25.
[Icikope pe bula 8]
Nangu ca kutila Naomi na Ruti bali bapiina, Lesa alibapaalile kabili alebasakamana cikuuku cikuuku