Ruti na Naomi

Ilyo mu Israele mwali icipowe, Naomi umwina Israele akuukiile ku calo ca Moabu no mwina mwakwe na bana babo abaume babili. Ilyo papitile inshita, umwina mwakwe alifwile. Umwana wakwe umo aupile Ruti e lyo umbi aupile Olipa, aba abanakashi bali bena Moabu. Ku ca bulanda ilyo papitile inshita, abana ba kwa Naomi nabo balifwile.

Ilyo Naomi aumfwile ukuti icipowe nacipwa mu Israele, alibwelelemo. Ruti na Olipa balikonkele Naomi, lelo ilyo baleya Naomi abebele ati: ‘Mwali abakashi abasuma ku bana bandi kabili muli bana abasuma na kuli ine. Ndefwaya mukopwe na kabili. Bwelelenimo ku Moabu.’ Aba abanakashi batile: ‘Twalimutemwa! Tatulefwaya ukumusha.’ Naomi talekele ukubeba ukuti babwelelemo. Olipa asukile abwelelamo, lelo Ruti ena alikeene ukubwelelamo. Lyena Naomi amwebele ati: ‘Olipa abwelelamo ku bantu bakwe na kuli balesa bakwe. Kabiye nankwe, kabili bwelelamo ku ngʼanda ya bafyashi bobe.ʼ Ruti alandile ati: ‘Nshamushe. Abantu benu bakaba abantu bandi, na Lesa wenu akaba Lesa wandi.’ Bushe ulemona ukuti Naomi aumfwile shani ilyo Ruti alandile aya mashiwi?

Ruti na Naomi bafikile mu Israele pa nshita batendeke ukuseepa barle. Bushiku bumo, Ruti aile mu kutolelesha barle mwi bala lya kwa Boasi, uwali umwana wa kwa Rahabu. Boasi alyumfwile ukuti Ruti ali mwina Moabu uushalefwaya ukusha Naomi. E ico aebele ababomfi bakwe ukuti belafumya barle yonse mwi bala, baleshamo iya kuti Ruti aletoola.

Mu nshita ya cungulo bushiku, Naomi aipwishe Ruti ati: ‘Ni mwi bala lya kwa nani ubombeele lelo?’ Ruti alandile ati: ‘Ni mwi bala lya kwa Boasi.’ E lyo Naomi amwebele ati: ‘Boasi ni lupwa wa mwina mwandi. Ulebombela fye mwi bala lyakwe pamo na bakashana bambi, pantu tabakulakucusha.’

Ruti alitwalilile ukubombela mwi bala lya kwa Boasi mpaka ukuseepa barle kwapwa. Boasi alimwene ukuti Ruti alebombesha kabili ali no mutima uusuma. Pali ilya nshita, nga ca kuti umwaume uwaupa afwa ukwabula ukukwatapo umwana umwaume, lupwa wakwe ewaleupa mukamfwilwa. E ico Boasi alyupile Ruti, bakwata no mwana umwaume uo bainike ati Obedi. Obedi e waishileba wishikulu wa Mfumu Davidi. Abanankwe ba kwa Naomi balitemenwe. Bamwebele abati: ‘Yehova abalilepo ukukupeela Ruti, uukusunga bwino sana, nomba akupeela no mwishikulu. Yehova nalumbanishiwe.’