Ruti Na Naomi

MU BAIBOLO mwaliba ibuuku ilitwa ati Ruti. Muli ili buuku mwaba ilyashi ililanda pa lupwa ulwaliko ilyo abena Israele baletungululwa na bapingunshi. Ruth ali mukashana uwafumine ku calo ca Moabu, e ico tafumine mu bena Israele, abali abantu ba kwa Lesa. Lelo ilyo Ruti asambilile icine pali Yehova Lesa, alitemenwe sana Lesa. Naomi ali umwanakashi umukalamba uwa-afwile Ruti ukusambilila pali Yehova.

Naomi ali mwina Israele. Ena no mulume wakwe e lyo na bana babo abaume babili, bakuukile ku calo ca Moabu ilyo ifya kulya fyacepele mu Israele. Lelo ilyo baali kulya, umulume wakwe alifwile. Pa numa, abana abaume aba kwa Naomi baupile abakashana abena Moabu, Ruti na Olipa. Nomba pa numa ya myaka nalimo 10, abana ba kwa Naomi bonse babili balifwile. Ici calengele Naomi, Ruti na Olipa ukuba no bulanda sana! Cinshi Naomi aali no kucita?

Bushiku bumo Naomi asalilepo ukubwelelamo ku bantu bakwe, no lu lwendo lwali ulutali. Apo Ruti na Olipa balefwaya ukulaikala nankwe, balimukonkele. Lelo ilyo baendeleko fye panono, Naomi abebele ati; ‘Bwelelenimo ku mwenu no kuyaikala na banyinenwe.’

Naomi atomwene abakashana no kubalaya. Abakashana batendeke ukulila pantu balitemenwe sana Naomi. Batile: ‘Tatwamushe! Tulelya nenu ku bantu benu.’ Lelo Naomi ayaswike ati: ‘Mufwile ukubwelelamo ku mwenu bana bandi. Kuti cawama nga mwaya ku bantu benu.’ E ico Olipa alibwelelemo, lelo Ruti ena alikeene.

Naomi aebele Ruti ati: ‘Olipa naya. Na iwe ufwile ukuya nankwe ku ng’anda.’ Lelo Ruti atile: ‘Mwimpatikisha ukumusha! Lekeni nje na imwe. Uko mukaya, e ko na ine nkaya, uko mukalaikala e ko na ine nkalaikala. Abantu benu bakaba abantu bandi, na Lesa wenu akaba e Lesa wandi. Uko mukafwila e ko nkafwila, kabili uko kwine e ko bakanshika.’ Ilyo Ruti alandile ifi, Naomi alilekele ukumupatikisha ukuya ku mwabo.

Aba abananakashi babili basukile bafika mu Israele no kulaikala mulya. Ruti afikile fye atendeka no kubomba mu mabala, pantu yali ni nshita ya kuseepa barle. Boasi, alimusuminishe ukulatoolelesha Barle mwi bala lyakwe. Bushe nyina wa kwa Boasi walimwishiba? Ni Rahabu, uwaleikala mu Yeriko.

Bushiku bumo Boasi aebele Ruti ati: ‘Nalyumfwa ifingi pali iwe, ne fisuma ifyo ucitila Naomi. Nalishiba ukuti walisha bawiso na banoko ne calo cenu no kwisa mu kwikala na bantu abo tawaishibe. Yehova nalekupaala!’

Ruti ayaswike ati: ‘Mwancitila icintu icisuma. Mwansansamusha ku mashiwi ayasuma ayo mwanjeba.’ Boasi aishiletemwa sana Ruti, kabili tapakokwele baupana no kuupana. Naomi alitemenwe sana! Lelo alicililepo ukutemwa ilyo Ruti na Boasi bakwete umwana umwaume uo bainike ati Obedi. Obedi aishileba shikulu wa kwa Davidi, uo tukalandapo sana ku ntanshi.