Amepusho Ukufuma ku Babelenga
Bushe ilembo lya kwa Esekiele 18:20, ilitila “umwana takakandilwe pa membu sha kwa wishi,” lilapilika ilembo lya Ukufuma 20:5, ilitila Yehova ni Lesa “uukanda abana . . . pa membu sha bashibo”?
Aya malembo tayapilikana iyo. Amashiwi ya muli Esekiele yalanda pa cishinka ca kuti umuntu umo umo alapingulwa pa lwakwe, e lyo amashiwi ya mu Ukufuma yena yalesumina fye icishinka ca kuti umuntu nga acita ulubembu, ififumamo kuti fyakuma fye na bana bakwe na beshikulu.
Icikalamba ico amashiwi ya muli Esekiele icipandwa 18 yalandapo ca kuti cila muntu akakandilwa pa fyo acita. Icikomo 4 citila: “Umuntu uubembuka e ukafwa.” Cinshi cikacitika ku muntu ‘uwalungama, kabili uucita ifya mulinganya ne fyalungama’? “Akatwalilila uwa mweo.” (Esek. 18:5, 9) Kanshi umuntu nga afika pa mushinku wa kuti umwine kuti ailubulwila, umwine eka alapingulwa “ukulingana ne mibele yakwe.”—Esek. 18:30.
Icacitikile umwina Lebi uwe shina lya Kora cilalanga ici cishinka. Ilyo abena Israele baali pa lwendo lwabo mu matololo, Kora aishilesuula imilimo yacindama iyo apeelwe ukubomba. Kora na bantu bambi batampile ukufwaya imilimo ya bushimapepo kabili bapondokele abeminishi ba kwa Yehova, Mose na Aarone. Pa kuituntumba kwabo ukwa kufwaya ukubomba umulimo uo bashapeelwe, Yehova akandile Kora na bacipondoka banankwe kabili balifwile. (Impe. 16:8-11, 31-33) Abana ba kwa Kora bena tabailundileko kuli ubu bucipondoka. Lesa tabakandile pa lubembu ulo shibo acitile. Bucishinka bwabo kuli Yehova bwalengele ukuti beonaulwa.—Impe. 26:10, 11.
Lelo ni shani pa kusoka kwaba pa Ukufuma 20:5, ukusangwa mu Mafunde 10? Pano na po, moneni amashiwi yambi ayaba muli ici cipandwa. Yehova alipangene no luko lwa bena Israele icipangano ce Funde. Ilyo abena Israele baumfwile amashiwi yali mu cipangano, basosele apabuuta tutu abati: “Fyonse ifyo Yehova asosele twakulacita.” (Ukufu. 19:5-8) E fyo uluko lonse lwaishileba uluko lwasalwa ulwa kwa Yehova. Kanshi amashiwi yaba pa Ukufuma 20:5 yalungatikwe ku luko lonse.
Ilyo abena Israele baleba aba cishinka kuli Yehova, ifintu fyalewama kabili alebapaala sana. (Lebi 26:3-8) Lelo nga babulwa icishinka, ifintu fyalebabipila. Ilyo uluko lwa kwa Israele lwakeene Yehova no kutampa ukupepa balesa ba bufi, alifumishepo ipaalo lyakwe no bucingo; ne ci calengele ulu luko ukucula sana. (Abapi. 2:11-18) Lelo kwena kwali bamo abatwalilile ukuba aba cishinka no kusunga amafunde ya kwa Lesa na lintu uluko lwatampile ukupepa utulubi. (1 Isha. 19:14, 18) Ukwabula ukutwishika abaali ne cishinka baleculilamo pa mulandu wa membu sha lulya luko, lelo Yehova aleba ne cikuuku kuli bena.
Ilyo abena Israele balekele ukukonka ifyo Yehova abebele no kutwalilila ukulacita ifyabipa sana ica kuti ne shina lyakwe lyalapontelwa ku ba mu nko shimbi, Yehova apingwilepo ukukanda abantu bakwe pa kubaleka ukusendwa muli bunkole ku Babiloni. Ilyo basendelwe muli bunkole, bakandilwe capamo nge bumba e lyo kabili ngo muntu umo umo. (Yer. 52:3-11, 27) Baibolo ilondolola ukuti ulubembu lwa bena Israele bonse capamo lwalikulile nga nshi ica kuti abana babo, abeshikulu, ifishikulula, e lyo napamo na bana ba fishikulula fyabo baliculilemo mu kulufyanya kwa fikolwe fyabo, nge fyo Ukufuma 20:5 kusosa.
Mu Cebo ca kwa Lesa mwaba ne lyashi ililanda pa ndupwa isho baletelele ku bafyashi babo. Shimapepo Mukalamba Eli alikalifye Yehova pa kusuminisha abana bakwe “ifinangwa” kabili impulumushi ukutwalilila pali bushimapepo. (1 Sam. 2:12-16, 22-25) Pa mulandu wa kuti Eli alicindikishe abana bakwe ukucila ukucindikisha Yehova, Lesa apingwile ukufumyapo bushimapepo pa ba mu lupwa lwa kwa Eli, ne ci caishiletendekela pali Abiatari uwali icishikulula cakwe. (1 Sam. 2:29-36; 1 Isha. 2:27) Ne fyacitikile Gehasi fyalyampana na mashiwi yaba pa Ukufuma 20:5. Ilyo Gehasi ali umubomfi wa kwa Elisha alibomfeshe bubi bubi icifulo cakwe pa kuti anonke icuma ukufuma kuli Naamani, mukalamba wa bashilika abena Siria. Ukupitila muli Elisha, Yehova apingwile Gehasi ati: “Ifibashi fya kwa Naamani fikalambatila pali iwe na pa bana bobe umuyayaya.” (2 Isha. 5:20-27) Nge fyo twamona, abana ba kwa Gehasi baliculilemo mu kulufyanya kwa kwa shibo.
Apo Yehova e Kabumba kabili e Watupeele ubumi, kuti atukanda umo alefwaila, pantu e waishiba ukukanda ukwalinga kabili ukwalungama. Amalembo twalandapo yaletulanga ukuti abana kuti baculilamo mu lubembu lwa fikolwe fyabo. Na lyo line, Yehova ‘alomfwa inkuuta ya bacushiwa,’ kabili abaya kuli ena no mutima onse alabapaala no kubelululako amacushi.—Yobo 34:28.
[Icikope pe bula 29]
Kora na bacipondoka banankwe balibakandile pa membu shabo