Mwalikwata Ica Kumuletela Insansa

IFIBUMBWA fyonse ukutendekela pa lusandesande ulunono sana ukufika fye na ku fipinda bushiku ifikalamba nga nshi filanga ukuti ifintu fyaba mu muyano. Lelo ici tacitupapusha pantu Kabumba, ‘te Lesa wa cimfulunganya.’ (1 Kor. 14:33) Kabili umuyano ulamoneka na mu fyo Lesa apekanya abantu ukuti balemupepa. Moneni ifyo Yehova acita. Alipanga ukuteyanya umwaba bamalaika na bantunse iminshipendwa, abakwata insambu sha kuisalila kabili abaikatana mu kupepa kwa cine. Ala caliwama!

Mu Israele, ukuteyanya kwa kwa Lesa pe sonde kwaleimininwako no musumba wa Yerusalemu, umwali itempele lya kwa Yehova kabili umwaleikala ne mfumu shaleteka Israele. Umwina Israele uwasendelwe bunkole mu Babiloni alandile pa musumba wa mushilo ukuti: “Ululimi lwandi lulambatile ku muulu wa kanwa kandi, nga nakaana ukwibukisha iwe, nga nafilwa ukulenga Yerusalemu ukuba ica kundetela insansa ishapulamo.”—Amalu. 137:6.

Bushe e fyo na imwe mumfwa pa kuteyanya kwa kwa Lesa ilelo? Bushe kulamuletela insansa ishingi ukucila ifintu fyonse? Bushe abana benu balishiba ukuteyanya kwa kwa Lesa ukwa pe sonde ne fyo kubomba? Bushe balishiba ubusuma bwa kuba mu lupwa lwa ba bwananyina ababa mwi sonde lyonse abetwa Inte sha kwa Yehova? (1 Pet. 2:17) Pa Mapepo ya Lupwa, kuti cawama mulelanshanya ifyebo twalalandapo pa kuti ulupwa lwenu lukeshibilepo na fimbi pa kuteyanya kwa kwa Yehova na pa kuti luletasha.

Ibukisheni “Inshiku sha ku Kale”

Cila mwaka, indupwa sha mu Israele shalelongana ku kusefya Ica Kucilila. Ilyo ukusefya kwatendeke fye, Mose aebele abantu ati: “Nga ca kuti umwana wenu amwipusha ati, ‘Calola mwi ici?’ e lyo mukamwasuke ati, ‘Ni ku kuboko kwakosa e ko Yehova atufumiishe mu Egupti, mu ng’anda ya busha.’” (Ukufu. 13:14) Abena Israele tabali no kulaba ifyo Yehova abacitiile. Ukwabula ukutwishika, abafyashi abaume abena Israele balikonkele ifyo Mose abebele. Umwina Israele umo uwa mu nkulo imbi apepele ukuti: “Mwe Lesa, mu matwi yesu e mo twayumfwila, bashifwe balitulondolwela imilimo iyo mwabombele mu nshiku shabo, mu nshiku sha ku kale.”—Amalu. 44:1.

Ku mwaice, ilyashi ililanda pa mibombele ya Nte sha kwa Yehova ne fyo bapitamo pa myaka 100 iyapita, kuti lyamoneka kwati lya “nshiku sha ku kale.” Kuti mwacita shani pa kuti abana benu balemona ifyacitike ukuti fya cine? Abafyashi bamo balabomfya icitabo ca Jehovah’s Witnesses—Proclaimers of God’s Kingdom, Yearbook, amalyashi ayo bamunyinefwe bashimika pa mibombele yabo ayaba mu mpapulo shesu, na malipoti yambi ayalanda pa fyacitika mu mulimo wa bufumu e lyo na DVD iilanda pa bantu ba kwa Lesa aba muno nshiku. Amavidio yalanda pa fyo bamunyinefwe balebacusha mu buteko bwa Soviet Union no bwa ba Nazi, mu Germany, yalasambilisha indupwa ukushintilila pali Yehova ilyo baeshiwa. Mulelanshanyapo na pali ifi pa Mapepo ya Lupwa. Ifi fikakosha icitetekelo ca bana benu pa kuti bakashipe nga bakumanya amesho.

Lelo, abacaice balatendwa bwangu ukusambilila pa lyashi lya kale. Pa kutila baleipakisha, kuti mwaipusha umwana wenu ukusala icalo ico engatemwa ukwisalandapo pa Mapepo ya Lupwa, no kufwailisha ifyebo pa fyo Inte sha kwa Yehova shabomba umulimo wa kwa Lesa muli ico calo. Mu cilonganino mwaba nga mwaliba bamunyinefwe ababombela Yehova pa myaka iingi, kuti mwabeta basangwako ku mapepo yenu aya lupwa. Kuti cawama abana benu babepusha ifipusho pa kuti babalondolwela ifyo babombela Yehova. Kuti mwaipusha abana benu ukulenga ifikope pa fintu ifikalamba ifyacitika mu kupepa kwesu, pamo nga ubukuule bwa maofeshi ya Nte sha kwa Yehova, nelyo ukulongana kwa fyalo ifingi, atemwa ifyo kale ba Nte baleshimikila ku ng’anda ne ng’anda ukubomfya ifilimba.

Sambilileni ‘Umulimo Uo Cila Cilundwa Cibomba’

Umutumwa Paulo apashenye icilonganino ca Bwina Kristu ku “mubili onse, uwalundinkana bwino bwino no kulengwa ukubombela pamo mu mfyufyu shonse, uukulilako no kukoselako mu kutemwana, ilyo cila cilundwa cilebomba umulimo wa ciko.” (Efes. 4:16, New International Version) Ukwishiba ifyo umubili wa muntu ubomba kuti kwalenga tuletasha sana no kucindika Kabumba wesu. E lyo na lintu twamona ifyo ukuteyanya kwa kwa Lesa ukwa pano isonde kubomba, tulapapa pa “mano ya kwa Lesa aya misango ne misango.”—Efes. 3:10.

Yehova alilanda ifyo ukuteyanya kwakwe pano isonde kubomba pamo fye no kwa ku muulu. Ku ca kumwenako, alitweba ukuti pa kubalilapo alisokolwelele Yesu Kristu pa kuteyanya kwa mu muulu, e lyo Yesu na o “atumine malaika wakwe, uwabomfeshe ifishibilo pa kulanga Yohane umusha wa kwa Yesu ifi fintu. Yohane na o ashimike fyonse.” (Ukus. 1:1, 2) Apo Lesa alitweba ifyo ukuteyanya kwakwe ukwa mu muulu kubomba, kanshi alafwaya twaishiba bwino ne fyo ukuteyanya kwakwe ukwa pe sonde kubomba.

Ku ca kumwenako, nga ca kuti nomba line muli no kukwata kangalila wa muputule pa cilonganino, kuti cawama mwalanshanya no lupwa lwenu imilimo iyo bakangalila ba muputule babomba ne fyo batwafwa cila muntu. Kuti mwalanshanya na pa fintu fimbi pamo nga: Umulandu cacindamina ukutuma amalipoti. Uko indalama isho ukuteyanya kwa kwa Lesa kubomfya shifuma, ifyo Ibumba Litungulula libomba ne fyo lipekanya ifya kulya fya ku mupashi.

Ukwishiba ifyo Inte sha kwa Yehova shitungululwa, kuti kwatwafwa mu fintu fitatu: Kuti tuletasha sana bakangalila abombesha pa kuti batwafwe. (1 Tes. 5:12, 13) Kuti tulekonka ifyo ukuteyanya kwa kwa Lesa kutweba. (Imil. 16:4, 5) Ne ca kulekelesha, kuti twalacetekela sana abatungulula ilyo twamona ukuti balakonka Amalembo mu fyo batweba ukucita na mu fyo bateyanya ifintu.—Heb. 13:7.

“Lolekesheni Amayanda ya Uko aya pa Malinga”

“Shingulukeni Sione, no kwendaukamo, pendeni impungu sha uko. Bikeni imitima yenu pe linga lya uko. Lolekesheni amayanda ya uko aya pa malinga, pa kuti mukalondolwele aba nkulo ya ku ntanshi.” (Amalu. 48:12, 13) Kemba wa malumbo apa ale-eba abena Israele ukulolekesha Yerusaemu. Elenganyeni ifisuma ifyo abena Israele baleibukisha ilyo baleya ku musumba wa mushilo ku kusefya kwa cila mwaka uko balemona itempele ilisuma sana. Bafwile ‘balelondolwelako aba nkulo ya ku ntanshi.’

Tontonkanyeni pali namfumu wa ku Sheba, uushasumine ifyo aleumfwa pa mitekele ya lulumbi iya kwa Solomone na pa mano yakwe ayengi. Cinshi calengele asumine ukuti ifyo aumfwile fya cine? Atile: “Na ine nshasumine amashiwi yabo mpaka ne mwine naisa no kuimwena na menso yandi.” (2 Imila. 9:6) Ca cine ifyo tuimwena “na menso” yesu kuti fyalenga twasumina ifyo tumfwa.

Kuti mwa-afwa shani abana benu ukuimwena “na menso” yabo ifisuma ifyaba mu kuteyanya kwa kwa Yehova? Nga kwaliba amaofeshi ya Nte sha kwa Yehova uko mwikala, kuti cawama mwayatandalako. Ba Mandy na ba Bethany bakulile ku cifulo icali apali amakilomita 1,500 ukufuma pa Bethel yaba mu calo cabo. Lelo baletandala sana ku Bethel na bafyashi babo maka maka ilyo bali abaice. Batile: “Ilyo tushilayako ku Bethel, twalemona kwati cifulo icayafya kabili kwaba fye abakalamba sana. Lelo kwali na bacaice abalebombesha umulimo wa kwa Yehova ne nsansa! Twalimwene ukuti ukuteyanya kwa kwa Yehova takwali fye ku cifulo twaleikala, kabili lyonse nga twaya ku Bethel, twalekoseleshiwa icine cine ukubombela Yehova.” Ukuimwena na menso ukuteyanya kwa kwa Lesa kwalengele ba Mandy na ba Bethany ukutendeka ukubomba bupainiya bwa nshita yonse, kabili nomba balibeta ukuti babombeko pa Bethel pa nshita iinono.

Kwaliba na fimbi ifingatwafwa “ukumona” ukuteyanya kwa kwa Yehova, ifyo abena Israele bashakwete. Mu myaka ya nomba line, twalipokelela vidio na ma DVD ayalanda pa kuteyanya kwa kwa Lesa, pamo nga: Jehovah’s Witnesses—Organized to Share the Good News, Our Whole Association of Brothers, To the Ends of the Earth, na United by Divine Teaching. Imwe no lupwa lwenu kuti muletasha sana aba bwananyina ababa mwi sonde lyonse nga mwamona ifyo ababa pa Bethel, na bafwilisha abaponenwe no tuyofi, na bamishonari, e lyo na bamunyinefwe abapekanya ukulongana kwa citungu babombesha.

Icilonganino cimo na cimo ica bantu ba kwa Lesa cilabomba umulimo wacindama sana uwa kushimikila imbila nsuma no kwafwa Abena Kristu muli iyo ncende. Lelo kuti cawama imwe no lupwa lwenu muletontonkanyako na pali “bamunyinenwe bonse pano calo.” Ici cikafwa imwe na bana benu ukuba “abakosa ndi mu citetekelo,” no kwishiba ukuti mwalikwata icingamuletela insansa.—1 Pet. 5:9.

[Akabokoshi ne Cikope pe bula 18]

Ukuteyanya kwa kwa Lesa—Calicindama Ukusambilila Pali Kwena

Twalikwata ifintu ifingafwa sana abafwaya ukwishiba ifyo ukuteyanya kwa kwa Yehova kwatendeke ne fyo kubomba. Ifipusho fyakonkapo kuti fyamwafwa ukwishiba ifi:

☞ Bushe umulimo ubomba bakangalila benda watendeke shani?—Ulupungu lwa kwa Kalinda, November 15, 1996, amabula 10-15.

☞ Cinshi caweme sana pa “Bushiku bwa Bana” ilyo kwali ukulongana kukalamba mu 1914?—Ulupungu lwa kwa Kalinda, July 15 2001, ibula 8.

☞ Bushe Ibumba Litungulula licita shani pa kupingula ifya kucita pa fintu?—Ukulabila Sana pa Bufumu bwa kwa Lesa, amabula 108-114.