Ulupungu Ulwa Kusambililamo Naluwaminako Icine Cine!
Natwalula na kabili Ulupungu lwa kwa Kalinda ulwa kusambililamo pa kuti lulemoneka bwino sana na pa kuti lulemwafwa ilyo mulesambilila Icebo ca kwa Yehova.—Amalu. 1:2; 119:97.
Napapita imyaka ine ukutula apo twatendekele ukulemba ba magazini babili aba Ulupungu lwa kwa Kalinda, ulwa ku cintubwingi e lyo no lwa kusambililamo ifwe e lyo nabo tusambilila nabo Baibolo abalelunduluka.
Munyinefwe uwabombela Yehova pa myaka iingi alandile pa Ulupungu ulwa kusambililamo ati: “Umuku wa kubalilapo nabelengele ulu Ulupungu lwa kwa Kalinda nalitemenwe sana ifyo balulembele, ifyebo fyalimo fyalimfikile sana pa mutima. Lwalilondolwele bwino icine icakosa icaba mu Baibolo ica kuti nalyumfwikishe. Ndetasha sana pa kubikako ulu Ulupungu.” Munyinefwe umbi na o atile: “Ilyo ndebelenga ndafwaya sana ukupoosa inshita iikalamba ukusambilila ulu Ulupungu kabili ndabomfya na Baibolo.” Tatuletwishika ukuti na imwe e fyo mumfwa.
Twatendeke ukulemba Ulupungu lwa kwa Kalinda mu 1879. Umupashi wa kwa Yehova e walenga tutwalilile ukulemba iyi magazini pantu kulabako amafya. (Seka. 4:6) Mu myaka 133 iyapitapo twalyalula imiku iingi ifyo inkupo ya magazini imoneka. Mu 2012, Ulupungu ulwa kusambililamo lwa kulakwata ifikope ifyabalabata ifikalalanga bamunyinefwe baleshimikila. Ifi fikope fya kulatucinkulako pa mulimo uo Yehova atupeela uwa kulabila sana pa Bufumu Bwakwe. (Imil. 28:23) Pe bula 2, pa kulaba ifikope ifyo babomfeshe pa kulenga ifikope ifili pa nkupo kabili bakulalondololako panono ifili pa cikope e lyo ne cifulo uko abali pa nkupo baali. Mu 2012, ifi fikope fya kulatucinkulako ukuti ababomfi ba kwa Yehova balashimikila imbila nsuma “ku bantu bonse aba pe sonde.”—Mat. 24:14.
Finshi fimbi ifyalwike muli iyi magazini? Akabokoshi ka kupitulukamo ka kulaba pa ntendekelo ya cipande ca kusambililamo. Mwakulaba ifishinka fikalamba ifyo mulingile ukwishiba ilyo mulebelenga no kusambilila icipande. Katungulula wa Ulupungu lwa kwa Kalinda akulaipusha ifi fipusho pa kupituluka mu fyo mwasambilila. Mu mbali ya fipande na mushala incende iikalamba kabili ne nambala ya mabula ne ya maparagrafu yakulaba mu filembo ifyafiita.
Nge fyo tulondolwele muli ino magazini, icintu na cimbi icipya ica kulaba muli iyi magazini cipande ica kulati “Ilyashi lya Kale.” Ca kulalanda pa fintu ifyacindama ifyo Inte sha kwa Yehova bacita muno nshiku. Na kabili limo limo mwakulaba amalyashi ya cine ayacitike, yakulaba pa mutwe uwa kulati “Bali-ipeele Abene mu Kuitemenwa.” Aya malyashi ya kulalondolola bwino ifyo bamunyinefwe ne nkashi baba ne nsansa ne fyo baipakisha ukubombela uko bakabila ba Bufumu bacepa.
Shi na muleipakisha nga nshi ukusambilila Icebo ca kwa Lesa ukubomfya ino Magazini.
Bakasabankanya
[Icikope pe bula 3]
1879
[Icikope pe bula 3]
1895
[Icikope pe bula 3]
1931
[Icikope pe bula 3]
1950
[Icikope pe bula 3]
1974
[Icikope pe bula 3]
2008