Ukwaluka Ukusuma Ukwa Ulupungu lwa kwa Kalinda!
1 Mu kutampa kwa uno mwaka, twaumfwile ukubilisha ukusuma ukwaleti: Ukutendeka mu January 2008, Ulupungu lwa kwa Kalinda lukaba mu misango ibili, lumo lukaba lwa bantu bonse e lyo lumbi lukaba lwesu fwe babwananyina! Napamo mulaipusha amuti: ‘Bushe aba bamagazini bakaba shani? Busuma nshi buli mu kukwata Ulupungu lwa kwa Kalinda mu misango ibili? Bushe muli ifipya ifyo tuleenekela ukumona?’
2 Ifyo Bamagazini Bakaba: Ulupungu lwa kwa Kalinda ulwa 1 lukalaitwa ati Ulwa Bantu Bonse. Ifipande fyonse ifikalabamo fikalalembelwa icintubwingi. Ulwa 15 lukalaitwa ati Ulwa Kusambililamo kabili iyi magazini tatwakaleshiila abantu mwi bala. Muli iyi magazini mukalaba ifipande fya kusambilila umweshi onse e lyo ne fipande fimbi fye ifikumine Abena Kristu baipeela. Ifyebo fyakulaba mu Ulupungu lwa Kalinda Ulwa Bantu Bonse fyakulawama ukubelenga na kuli baNte, lelo abo bakulalembela maka maka ni balya abashili baNte abengacetekela ifyo Baibolo isambilisha. Lelo Loleni! yena yakulalembelwa fye uuli onse, ukubikako na balya abasuusha ifyo Baibolo isambilisha na bakapepa abashili Bena Kristu.
3 Ico Ukwaluka Kuwamine: Mu Ulwa Kusambililamo, tatwakalelondolola amashiwi pamo nga “painiya” filya ciba lyonse pa kuti abashili baNte bomfwe umo yalola. Iyi magazini na kabili mukalaba ifyebo ifikalalembelwa fye Inte sha kwa Yehova na basambi Baibolo abalelunduluka. Nga Ulwa Bantu Bonse, busuma nshi bukwete? Amalyashi yakalabamo ne fyo bakalayalemba, yakalaumfwika bwino ku cintubwingi, kanshi abashili ni Nte sha kwa Yehova bakalafwaya ukubelenga amalyashi ayali muli magazini. Lelo, ukuba kwena Nte fye onse akalanonkelamo nga abelenga bonse bamagazini. Ubusuma bumbi ubuli muli uku kwaluka bwa kuti cila mweshi twakulashiila abantu Ulupungu lwa kwa Kalinda fye lumo e lyo na Loleni! imo. Kanshi umweshi onse fye, ifyebo tukalalanda pa kushiila abantu bamagazini fikalaba fimo fine fye.
4 Ifipya Ifyalwikemo: Fimo fikaaluka mu Ulupungu lwa kwa Kalinda Ulwa Bantu Bonse. Amalyashi yamo yakalalanda pa masambililo ya mu Baibolo aya kubalilapo ukwishiba mu nshila yayanguka. Yambi amalyashi yakalalanda pa fyo Baibolo ingafwa indupwa. Abaice nabo bakakwata ifipande ifikalalanda pa nshila sha kusambililamo Baibolo. Magazini imo na imo iya bantu bonse ikalakwata icipande cimo icikalalanda pa lyashi limo ilya mu Baibolo ilitufunda pa mibele ya kwa Yehova.
5 Tulesubila ukuti Yehova ali no kupaala uku kupekanya kupya ukwa Ulupungu lwa kwa Kalinda. Shi iyi magazini, pamo na Loleni!, ikalenge abantu abengi abayana ukumfwa imbila nsuma.—Mat. 10:11.