Mwe Babelenga Ino Magazini

NATUTEMWA ukumwishibisha ukuti kuli ifyalwike mu milembelwe ya Ulupungu lwa kwa Kalinda, ukutendekela pali ino magazini. Ilyo tatulalanda pa fyalwike, lekeni tulande pa fishalwike.

Ishina lya ino magazini ilya kuti, Ulupungu lwa kwa Kalinda Ulusabankanya Ubufumu bwa kwa Yehova, talyalwike. E ico, Ulupungu lwa kwa Kalinda lukatwalilila ukucindika Yehova ukuti e Lesa wa cine no kusansamusha abantu ku mbila nsuma ya Bufumu bwa kwa Lesa. Ifipande fili pa mabula 5 ukufika ku 9 muli ino magazini filelondolola Ubufumu bwine ubu e lyo na lintu bukesa. E lyo kabili, Ulupungu lwa kwa Kalinda lukatwalilila ukukoselesha abantu ukucetekela Yesu Kristu, no kulanda pa cine ca mu Baibolo, e lyo no kulondolola ukuti ifilecitika muno nshiku e filya fine ubusesemo bwa mu Baibolo bwalandile ukuti fyakulacitika. Na kabushe ifi fine e fyo ino magazini ilandapo pa myaka iingi.

Nomba finshi ifipya ifikaba muli ino magazini? Lekeni tulondolole ifisuma ifyakulaba muli ino magazini ya 1 iya bantu bonse.a

Kukalaba ifipande fimo cila mweshi ifikalamukoselesha ukutontonkanya pa fyaba muli Baibolo. Mukalaba icipande ca kutila: “Bushe Kuti Mwayasuka Ici Cipusho?” umukalaba ifyebo ifikalamwafwa ukumfwikisha fimo ifyo Baibolo yalandapo. E lyo icipande ca kutila “Palameni Kuli Lesa” cikalalanda pa malyashi ya mu Baibolo ayakalamusambilisha fimo pali Yehova. Kwakulaba ne cipande ca kutila “Ababelenga Ino Magazini Balepusha Ukuti,” icikalayasuka amepusho ya mu Baibolo ayo abengi bepusha. Abengi balepusha ukutila, “Bushe Ubufumu bwa kwa Lesa bwaba mu mutima wa muntu?” Mwalacisanga icasuko pe bula 13.

Kuli ifipande na fimbi ifikalayafwa indupwa. Icipande ca kutila “Ifingalenga Ulupwa Ukuba ne Nsansa,” icikalafuma imiku ine pa mwaka, cikalalanda pa mafya yalya yene ayaba mu ndupwa na pa fyo amafunde ya mu Baibolo yengafwa abantu ukupwisha aya mafya. Icipande na cimbi ica kutila “Fundeni Abana Benu,” ico abafyashi balingile ukubelengela pamo na bana babo, cikalafuma cila mweshi. Mukalaba na “Icipande ca Bacaice” icikalalembwa mu musango wa kutila caafwa abacaice ukusambilila ifyaba mu Baibolo. Ici cena cikalafuma imiku 6 mu mwaka.

Kukaba ifipande na fimbi ifikalafuma imiku ine mu mwaka. Icipande ca kutila “Pashanyeni Icitetekelo Cabo” cikalatukoselesha ukupashanya umuntu umo uo Baibolo yalandapo. Pa mabula 18 ukufika ku 21 muli ino magazini mwalabelengapo ilyashi lya kukoselesha pali Eliya ililetusambilisha ifyo twingapashanya icitetekelo cakwe. Mu cipande cimbi ica kutila “Kalata Ukufuma ku . . .” mukalaba ilyashi ilyo bamishonari nelyo abantu bambi mu fyalo fimbi bakulashimika abene. Kuli icipande na cimbi ica kuti “Ifyo Tusambilila Kuli Yesu” icikalalondolola ifyo Baibolo isambiilsha mu nshila iyayanguka.

Tatuletwishika ukutila ababelenga Ulupungu lwa kwa Kalinda abacindika Baibolo kabili abafwaya ukwishiba bwino bwino ifyo ilanda, bakatwalilila ukutemwa ino magazini. Tulesuubila ukutila ino magazini ikamwafwa ukwishiba icine ca mu Baibolo ico mukabila.

IFYEBO UKUFUMA KU BALEMBA INO MAGAZINI

[Futunoti]