Ukulenga Ukwishiba ‘Ukwanguka’
1. Cinshi cafisha kuli bamo ukuisambilisha?
1 Solomone atile, ‘ukwishiba kwalyanguka.’ Nomba ku bengi, ukusambilila, mulimo wakosa. Nangu ca kuti tulomfwa bwino ukwishiba ifintu ifipya, bamo cilabakosela ukukwata inshita no mutima wa kusambilila ifintu e lyo no wa kufwaya ifyebo. Lelo ukucite fi kwalicindama nga nshi ilyo tulefwaya “ifyashika fya kwa Lesa” mu mpapulo shesu.—Amapi. 14:6;1 Kor. 2:10.
2. Pa kuti tunonke “ukwishiba no kupanga” finshi fifwaikwa?
2 Nalimo kuti mwatila, ‘Solomone calimwangukile ukusambilila, pantu Lesa alemwafwa!’ Ee kwena Lesa alipeele Solomone “umutima wa mano, kabili uwa mucetekanya.” (1 Isha. 3:12) Nomba Solomone na o wine alibombeshe pa kuti eshibe bwino ukufwaya kwa kwa Yehova. Solomone atile, “nabikilepo umutima wandi ku kwetetula kabili ku kulengula ku mano.” (Luk. Mil. 1:13) Kanshi ukuipeelesha e kwalengele ukuti Yehova amupaale. Kwena, ifyo cali kuli Solomone te fyo ciba na ku bantu bonse, nomba na lyo line, nga natukwata umutima uusuma, natutantika bwino e lyo na Lesa nga atwafwa, na ifwe kuti twanonka “ukwishiba no kupanga.”—Amapi. 1:4; 2:6.
3. Finshi fyamwafwa ukuteyanya inshita bwino ukwabula ukupumfyanishiwa?
3 Tantikeni Ifya Kucita Lyonse: Umutumwa Paulo akoseleshe Abena Kristu banankwe ukutwalilila “ukulaenda bwino muli uyu wine musango.” (Fil. 3:16) Umusango wa kucitilamo ifintu, nangu ukulacita ifintu mu kukonkana lyonse fye, kuti fyamwafwa mu fintu fye ifingi na lintu mulefwaya ukwimika inshita ya kuisambilisha mwe bene e lyo ne nshila ya kubelengelamo ifyo fintu. Abengi basanga ukutila nga balesungila Baibolo yabo ne mpapulo apo shilemoneka kuti baleibukisha ukubelenga. Ukwimika inshita ya kutendeka ukubelenga, limbi tutile ulucelocelo nelyo icungulo ilyo kushili icongo, kulalenga bamo ukuti ‘balelubulako inshita’ ya kubelenga.—Efes. 5:16.
4. Finshi tufwile ukwibukisha ilyo tulepekanya isambililo lya citabo pa Cilonganino?
4 Belengeni, Pitulukenimo no Kwibukisha: Natulande pa fyo twingacita nga tulefwaya ukubelenga ulupapulo tulesambilila pa kulongana kwe sambililo lya citabo pa Cilonganino. Intanshi ishibeni iciputulwa muli no kusambilila. Ilingi line kuti mwasanga umutande wa fipandwa ifyo muli no kusambilila mu Ubutumikishi Bwesu Ubwa Bufumu. Ica bubili, bebeteni ifyebo muli no kusambilila. Nga ca kutila pe sambililo lya citabo tulebomfya ulupapulo ulwalondolola icikomo ne cikomo ica mu Baibolo, kuti cawama nga twabelenga ifyo fikomo mu Baibolo. Nga twacite fyo tukeshiba amalembo yali mwi sambililo. Nga ca kutila isambililo lifumine mu lupapulo pamo nga Icaba Inkaama ku Nsansa sha Lupwa nangu Palameni Kuli Yehova, kuti mwanonkelamo nga mwabelenga amalembo yali mu mukululo wa kupitulukamo pa mpela ya cila cipandwa.
5. Bushe abafyashi na bakangalila be sambililo lya citabo pa Cilonganino bafwile ukwibukisha ukucita cinshi kabili mulandu nshi?
5 Ilyo mulemona mu maparagrafu muli no kuyasambilila, kuti mwamona no tumitwe tunono, ifyebo fili mu mikululo, na fimbipo, pa kuti mwishibe ifyo isambililo lyonse lili. Kuti cawama nga ca kuti abafyashi na bakangalila ba Masambililo ya Citabo pa Cilonganino balebomfya ifikope ne filangililo fimbi ifili mu citabo pa kusambilisha. Ukubomfya ifi kuti kwalenga abana e lyo na bashaishiba sana ukubelenga ukubikako amano.
6. Finshi fimo fimo ifyo mwingacita nga mulefwaya ukula-asukapo bwino?
6 Bushe kuti mwacita shani nga mulefwaya ukula-asukapo bwino? Bamo cilabafwa nga batala babelenga ifyebo fyonse ifyo bali no kusambilila, nga bapwisha e lyo bapita mu fipusho no kushila ifishinka fili muli cila paragrafu. Ukupekanishisha libela kukamwafwa ukuba abashipa pa kulanda e lyo kabili cikamwangukila sana ukwasukapo pe sambililo lya citabo pa Cilonganino, na mwe bene mukamwenamo.
7. (a) Bushe mulemona ukuti cinshi cawamina ukupituluka mu fyebo ifyo musambilile pa mpela ya kubelenga? (b) Bushe ukwebako bambi ifyo musambilile kukamuletela shani insansa no kulenga ukusambilila ukwanguka?
7 Cilya mwapwisha ukupekanya isambililo, pitulukeni mu tumitwe, mu fikope ne filangililo fili mwi sambililo no kumona nga muleibukisha ifili mu ciputulwa cimo na cimo. Kuti mwaesha ukulinganya ifyo mwasambilila ubo bushiku ku fyo mwaishiba kale ne fyo mwamonapo. Nga mwacite fi, ifishinka na Malembo ayo mubelengele kuti yamufika pa mutima. Shimikileniko balupwa, ifibusa, na bambi fye ifyo musambilile mu nshila isuma ukwabula ukuibililika. Nga mulecite fi, ukwishiba kukalakulilako. Lyena, Yehova akamwafwa kabili nga filya cali kuli Solomone, na imwe mukamona ukuti ‘ukwishiba kwalyanguka.’—Amapi. 14:6.