Ni Lilali Inkondo ya Armagedone Ikesa?

“Naliloleshe, kabili, moneni! kwali ibumba ilikalamba, ilyo umuntu nangu umo ashingapenda, abafumine mu nko shonse ne mitundu na bantu na bantu ne ndimi, . . . [abafumine] mu bucushi bukalamba.”—UKUSOKOLOLA 7:9, 14.

INKONDO ya Armagedone ili mupepi nga nshi. Twaishiba shani?

Kale kale kwaliba ibumba lya ba bwananyina mwi sonde lyonse ababombela Yehova kabili abakonka ifyo Baibolo ifunda mu mikalile yabo. Lesa alelonganika iminshipendwa ya bantu ukufuma mu nko shonse, imitundu, ne ndimi, abalepanga ibumba lya ba bwananyina ilyaikatana kabili ilyatemwana. Ili ibumba ni Nte sha kwa Yehova.—Yohane 13:35.

Nomba line, Satana akalonganika abantu bakwe no kusansa abantu ba kwa Lesa aba mutende, abamoneka kwati tabakwata uwa kubacingilila. Uyu muku Satana akasansa abantu ba kwa Lesa icabipisha. (Esekiele 38:8-12; Ukusokolola 16:13, 14, 16) Kuti mwashininkisha shani ukutila ici cikacitika? Baibolo yalilondolola ifyo twingeshibilako ukuti inkondo ya Armagedone ili mupepi. Ifingi ifyo yalandapo filecitika.

Amasesemo Ayalefikilishiwa

Abasambi ba kwa Yesu balimwipwishe ifyo abantu bali no kwishibilako ukuti “icalo cili ku mpela.” (Mateo 24:3) Yesu abebele ukuti “uluko lukemina uluko lubiye no buteko bukemina ubuteko bubiye, kabili kukaba ifipowe ne finkukuma mu ncende shimo shimo.” Lyena atile: “Fyonse ifi e kutendeka kwa bucushi ubukaba ngo kucula kwa pa kupaapa.” (Mateo 24:7, 8) Umutumwa Paulo alondolwele iyi nshita ukuti ni “nshiku sha kulekelesha,” alandile no kuti ikaba ni ‘nshita iya-afya nga nshi.’ (2 Timote 3:1) Bushe tamulesumina ukuti aya masesemo yalefikilishiwa muno nshiku?

Mulandu nshi ishi nshita shayafisha nga nshi? Umutumwa Yohane alitweba icalenga. Asobele ukuti inshita Satana ne fibanda fyakwe bakaba na maka pe sonde ikaba ni “nshita iinono” fye. Baibolo yalondolola ukuti pali iyi nshita Satana aliba ne “cipyu icikalamba.” (Ukusokolola 12:7-12) Bushe tamumona ukuti abantu mwi sonde fye lyonse, balikalipa kabili bankalwe icine cine?

Yesu na o atile muli ishi shine inshita ishayafya, umulimo uwacindama sana ukulabombwa. Atile: “Imbila nsuma iyi iya bufumu [bwa kwa Lesa] ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mateo 24:14) Muno nshiku, Inte sha kwa Yehova balashimikila imbila nsuma iya Bufumu bwa kwa Lesa mu fyalo ukucila pali 235 mu ndimi ukucila 500. Magazini iilanda pa fya mu Baibolo iya Ulupungu lwa kwa Kalinda na Loleni!, e mpapulo shisabankanishiwa sana mu calo. Na kabili ba Nte balipilibula Baibolo mu ndimi mupepi na 100. Baitemenwa fye ukubomba umulimo wa kushimikila kabili indalama babomfya basangula fye mu kuitemenwa. Bushe kuti twatila uyu mulimo wa kushimikila babomba ulafikilisha ifyo Yesu aseseme?

Na kabili Baibolo yalilanda pa fikacitika ifikabalamuna inkondo umo Yehova Lesa akalwa na balwani bakwe. Natulande pa kusesema kutatu ukuli no kufikilishiwa.

Amasesemo Ayali no Kufikilishiwa Nomba Line

Ukusesema kwa kubalilapo. Baibolo itila inko shikasosa ukuti kuli “umutende no mutelelwe.” Nalimo shikamona kwati shili no kupwisha amafya ayakalamba mu calo. Lelo pa numa ya kulanda aya mashiwi, mu calo tamwakabe umutende nakalya.—1 Abena Tesalonika 5:1-3.

Ukusesema kwa bubili. Pa numa, amabuteko ya bantunse yakemina utubungwe twa mapepo. Muli Baibolo, aya mabuteko yaimininwako ne ciswango; ne mipepele ya bufi imininwako no mwanakashi uwaikala pa ciswango. (Ukusokolola 17:3, 15-18) Iciswango ca mampalanya cikacita ico Lesa afwaya ukuti cicite, e kutila, cikonaula imipepele iitunga ukuti imininako Lesa.

Umutumwa Yohane alandile ifikacitika ukuti: “Insengo 10 ne ciswango ifyo wacimona, fikapata cilende no kumupokolola fyonse ukumusha ubwamba, kabili fikalya umubili wakwe no kumoca fye onse mu mulilo. Pantu ni Lesa e walengele imitima ya fiko ukuti icite ifyo umwine alefwaya.”—Ukusokolola 17:16, 17.

Ukusesema kwa butatu. Pa numa ya konaula imipepele ya bufi, Satana akalonganika inko pa kuti shikasanse bakapepa ba kwa Yehova Lesa.—Ukusokolola 7:14; Mateo 24:21.

Finshi Muli no Kucitapo?

Nga ca kutila tamwasambilila Baibolo bwino bwino, nalimo kuti camukosela ukusumina ukuti ifyo twalandapo fikacitika. Lelo kwaliba ifingalenga mwacetekela ukuti fyonse ifyasobelwe fikafikilishiwa kabili fili no kucitika nomba line. Ukusesema ukwalembwa mu Baibolo ukwafikilishiwa e bushininkisho bwa kuti fikacitika.a

Kuti cawama sana nga mwapaatwileko inshita ya kulanshanya ne Nte sha kwa Yehova pa kuti mwishibe umulandu bashininkishisha ukuti “inkondo ya bushiku bukalamba ubwa kwa Lesa Wa Maka Yonse” naipalama, no mulandu mushilingile ukulaitiinina. Kuti bamulondolwela ne fyo Baibolo ilanda ifyo mulingile ukucita pa kuti mukabe pa bantu Yehova Lesa akacingilila. (Ukusokolola 16:14) Ifyo mukasambilila nalimo fikalenga mwikalatiina ifikacitika ku ntanshi.

[Futunoti]

[Amashiwi pe bula 8]

Bushe umulimo Inte sha kwa Yehova babomba ulefikilisha ukusesema kwa mu Baibolo?