Bushe Imipepele Ilalenga Abantu Ukuba ne Mibele Isuma?
Ba Sylvia, ababombela uko basungila abakote batile: “Abengi abo twali na bo ku koleji baleti bena Lesa. Lelo, balebepa pa kulemba amashindano kabili balebomfya ne miti ikola iyabindwa. Ifyo balesambilila ku macalici tafyabalengele ukuba ne mibele isuma.”
Ba Lionel batile: ‘Abo tubomba na bo balabepa abakalamba ba ncito ukuti nabalwala ilyo ninshi tabalwele. Batila bena Lesa, lelo tabakonka ifyaba mu Baibolo.’
Amacalici tayasambilisha sana abantu ukuba ne mibele isuma. Abantu abengi muno nshiku “bamoneka kwati ni bakapepa” lelo balakaana “amaka ya bukapepa.” (2 Timote 3:5) Bashimapepo tabakwata imibele isuma, e co bafililwa ukufunda abantu ifyaba mu Baibolo pa kuti babe ne mibele isuma. E mulandu wine abantu abengi bamwena kwati nangu bakwate imibele iibi, Lesa tasakamana.
BUSHE CINSHI BAIBOLO ISAMBILISHA?
Baibolo itusambilisha ukuti imibele yesu kuti yalenga Lesa ukutemwa nelyo ukumfwa ububi. Ilyo abena Israele balepondokela Lesa, ‘balemulungulusha.’ (Amalumbo 78:40) Lelo ico tufwile ukwishiba ca kuti umuntu nga aleka ukucita ifyabipa, kulaba “ukusekelela mu muulu.” (Luka 15:7) Umuntu nga aishiba imibele iisuma iya kwa Shifwe wa ku mulu, alatemwa sana Lesa kabili ici cilamulenga ukutemwa ifyo Lesa atemwa no kupata ifyo apata.—Amose 5:15.
CINSHI CALENGA UKUTI BA NTE BABE NE MIBELE ISUMA?
Inyunshipepala ya Deseret News iya ku Salt Lake City, mu citungu ca Utah, ku U.S.A. yatile, “Indupwa sha Nte sha kwa Yehova shilomfwana sana, bantu aba cishinka kabili balabombesha sana.” Na kabili inyunshipepala yatile, “BaNte baliba ne mibele iisuma. Basumina ukuti ukupeepa fwaka, ukunwesha ubwalwa, ukubomfya imiti ikola, ukuteya ifyangalo fya kushitikapo, ubulalelale, ukulaalana kwa baume bekabeka e lyo na banakashi bekabeka kuti fyalenga umuntu ukukanaba cibusa wa kwa Lesa.”
Bushe ukwishiba ifyo Lesa aaba, kwa-afwa shani Inte sha kwa Yehova? Ba Sylvia, abo tulandilepo kale batile: “Mu fifulo umo basungila abakote, abantu abengi balacita sana ifintu mu bufufuntungu. Nga taucenjele, kuti na iwe watendeka ukucita ifyo bacita. Lelo, ukwishiba ifyo Yehovaa apata ubufufuntungu kwalilenga natwalilila ukucita icalungama. Naliba ne nsansa e lyo nshisakamikwa.” Ba Sylvia balishininkisha ukuti ukulacita ifyo basambilila mu Baibolo, kwalilenga baaba ne mibele iisuma.
[Futunoti]
a Baibolo itila, ishina lya kwa Lesa ni Yehova.
[Amashiwi pe bula 6]
Bushe bashimapepo balasambilisha abantu ukuba ne mibele isuma?