AMASUKO KU MEPUSHO YA MU BAIBOLO

Bushe Baibolo cine cine Cebo ca kwa Lesa?

Apo Baibolo yafuma kuli Lesa, kanshi ifwile ukupusanako ku mabuuku yambi. Baibolo yalipulintwa mu ndimi ishingi sana. Ifyaba mu Baibolo filalenga abantu ukuba ne mibele isuma.—Belengeni 1 Abena Tesalonika 2:13; 2 Timote 3:16.

Twalishiba ukuti Baibolo yafuma kuli Lesa pantu ifyo ilanda ukuti e fikacitika, filacitika. Takwaba umuntu uwingeshiba ifikacitika ku ntanshi. Natulande pe buuku lya kwa Esaya. Ili ibuuku ilyo bapangile imyaka ukucila pali 100 ilyo Yesu ashilafyalwa, balisangile mu lucengo, mupepi na Bemba Wafwa. Ili ibuuku litila takwakabe uukekala mu Babiloni na kabili nga bayonaula. Na cine ilyo Babiloni yaonawilwe, takwali abaikelemo nangu fye ni lintu Yesu abwelelemo ku muulu.—Belengeni Esaya 13:19, 20; 2 Petro 1:20, 21.

Cali shani pa kuti balembe Baibolo?

Baibolo yalembelwe pa myaka ukucila 1,600. Abantu 40 e balembele Baibolo, e lyo balembele fye pa cintu cimo kabili ifyo balembele tafyapusana. Cali shani pa kuti belemba ifyapusana? Ni co Lesa e walebatungulula.—Belengeni 2 Samwele 23:2.

Inshita shimo, Lesa alelanda na bakalemba ba Baibolo ukupitila muli bamalaika kabili alebomfya ifimonwa nelyo ifiloto. Ilingi line, Lesa alebika ifyo alefwaya ukuti balembe mu matontonkanyo yabo kabili alebaleka ukusala amashiwi ayo balefwaya ukubomfya abene pa kulemba ifyo Lesa alefwaya.—Belengeni Ukusokolola 1:1; 21:3-5.