Fimo Filacitika, Lelo Ifingi Taficitika

Bushe kuti mwatemwa ukwishiba ifyo mukekala ku ntanshi? Abengi balafwaya sana ukwishiba ifya ku ntanshi. Kabili kwaliba abantu abengi abasobela ifikacitika ku ntanshi, lelo ifingi taficitika. Natulande pali bamo:

• BASAYANTISITI balabomfya fimashini ifya maka ne ndalama ishingi nga nshi pa kuti beshibe ifya ku ntanshi pamo nga ifyo abantu bacita nga fikonaula isonde, ukwishiba nga ca kuti imfula ikaloka mailo, e lyo na fimbipo.

• ABASAMBILILA SANA balalanda ifikacitika mu makwebo e lyo na mu fikansa fya mitekele ya calo. Abengi batila ba Warren Buffett, ababa pa bantu aba cuma sana mu calo, baleshiba amakwebo ayengabaletela sana icibwesha. E lyo ba Nate Silver bena baleshiba ifingi ificitika mu America, pamo nga abakawina mu fikansa fya mitekele ya calo, abapanga amafilimu abo bakapeela ifilambu, na fimbipo.

• IFYALEMBELE ABA KALE bafimona kwati kusesema. Abantu bamo batila ifilecitika muno nshiku filefikilisha ifyalembele Michel de Notredame (Nostradamus) muli ba 1500. Kabili abengi balemona kalenda ya ba Maya iyapwile pa 21 December mu 2012, ukuti yalelanda pa kupwa kwa calo.

• BASHIMAPEPO limo balasoka abantu ukuti ifyabipa fikacitika mu calo pa kuti bakwate abantu abengi mu macalici yabo. Harold Camping na basambi bakwe baleshimikila ukuti icalo cikonaulwa mu 2011. Nomba icalo tacaonaulwa ukufika na lelo.

• ABATUNGULULWA NE MIPASHI batila balikwata amaka ya kusobela ifikacitika ku ntanshi. Ba Edgar Cayce na ba Jeane Dixon bonse balisobelepo ifintu ifyaishilecitika no kucitika muli ba 1900. Lelo balisobele na fimbi ifingi ifishacitike. Ku ca kumwenako, ba Dixon basobele ukuti Inkondo ya Calo iya Butatu yali no kutendeka mu 1958, e lyo ba Cayce basobele ukuti umusumba wa New York wali no kubunda muli ba 1970.

Bushe kwaliba ifintu ifyacetekelwa ifingatwafwa ukwishiba ifikacitika ku ntanshi? Ici cipusho calicindama sana. Nga mwali na maka ya kwishiba ifikacitika ku ntanshi, kuti mwaishiba ne fyo mufwile ukucita mu mikalile yenu.