IFIPANDE IFIKALAMBA | UBUFUMU BWA KWA LESA—KUTI MWANONKELAMO SHANI?

**Ubufumu bwa kwa Lesa—Kuti Mwanonkelamo Shani?**

Mufwile namumona mu fipande fifumineko ukuti Ubufumu bwa kwa Lesa bwalicindama sana ku Nte sha kwa Yehova. Kabili mufwile namutemwapo amapaalo yamo ayo Ubufumu bwa kwa Lesa bukaleta. Lelo, nalimo muletwishika nga ca kuti aya malayo yakafikilishiwa.

Calicindama sana ukukanasumina fye fyonse ifyo mwaumfwa. (Amapinda 14:15) Kuti twamupashanya ku bena Berea.a Ilyo baumfwile imbila nsuma ya Bufumu pa muku wa kubalilapo, abena Berea balisumine ifyo baumfwile, lelo tabasuminine fye ico cine. Balefwailisha mu Malembo “pa kuti bashininkishe nga ca kutila ifi fintu fya cine.” (Imilimo 17:11) Mu mashiwi yambi, abena Berea balingenye imbila nsuma baumfwile ku fyo Amalembo yalanda. E calengele bashininkishe ukuti imbila nsuma baumfwile yalefuma mu Cebo ca kwa Lesa.

Inte sha kwa Yehova shilemukoselesha ukuti na imwe mucite ifi fine. Nga mwasumina ukulasambilila Baibolo na ifwe apa fye, kuti mwakwata ishuko lya kulinganya ifyo fwe Nte sha kwa Yehova twasuminamo pa Bufumu bwa kwa Lesa ku fyo Baibolo isambilisha.

Ukulunda pa kusambilila pa Bufumu bwa kwa Lesa, ukusambilila na ifwe Baibolo kukalenga mukasange amasuko ku mepusho ayacindama nga nshi.

Bushe fwe bantu twafumine kwi?
Cinshi twabela pano calo?
Mulandu nshi Lesa asuminishisha ukucula?
Cinshi cicitika nga twafwa?
Bushe isonde likonaulwa?
Cinshi cingalenga ulupwa ukuba ulwa nsansa?

Ne cacindama sana ca kuti ukusambilila Baibolo kukalenga ‘mukapalame kuli Lesa.’ (Yakobo 4:8) Nga mwapalama kuli Lesa, e lyo mukamona ifyo mukanonkelamo mu Bufumu bwa kwa Lesa, te pali ino nshita fye lelo umuyayaya. Yesu apepele kuli Wishi ati: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—Yohane 17:3.

Inte sha kwa Yehova kuti babomfya ici citabo pa kusambilila Baibolo na imwe.

Nga mulefwaya ukulasambilila Baibolo, ipusheni Inte sha kwa Yehova nelyo isushisheni formu iyaba pa www.jw.org/bem.

(Kabiyeni apaleti LOMBENI UKUTI MULESAMBILILA BAIBOLO pa intendekelo)

a Berea musumba uwali mu Makedonia akale.

Ico Ubufumu bwa kwa Lesa Bwacindamina Kuli Ena

Nomba line, ilyo Folake, umukashana wa myaka 10 ali ku sukulu, bamwebele ukulemba ilyashi pa mutwe waleti “Ico Natemwa Sana Muli Cino Calo.” Asalilepo ukulemba pa mulandu atemenwa ukwebako bambi pa Bufumu bwa kwa Lesa.

Alondolwele ukuti: “Ubufumu bwa kwa Lesa buteko ubwa cine cine. Lelo tabumoneka, e co te kuti mubumone, nangu fye mufwale amagalasi!”

Folake alembele na pa mapaalo atemwa sana ayo Ubufumu bwa kwa Lesa bukaleta. Ilyo alelanda pa mafya Ubufumu bukafumyapo, alembele ukuti, “Ndomfwa ububi nga namona abantu abashakwata amayanda baleikala mu misebo” ukubikako na “bana abafwa ku nsala mu fyalo ifyalekanalekana.” Alundilepo ukuti, “Lelo, ndaba ne nsansa nga nabelenga pali Esaya 65:21.” Ici cikomo calaya abantu abo Ubufumu bwa kwa Lesa bukalateka ukuti: “Bakakuula amayanda no kwikalamo; bakalima na mabala ya myangashi no kulya ifisabo fya yako.”

Folake alembele ukuti alafwaisha ukwisamonako ilyo Lesa akabomfya Ubufumu Bwakwe pa kufumyapo amalwele. Mu lyashi alembele ayambwile amashiwi yaba pa Ukusokolola 21:4, ayatila Lesa “akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili.” Alekeleshe na mashiwi ya kuti ukulanda pali Yehova na pa Bufumu bwakwe e co atemwa sana muli cino calo. Ukwabula no kutwishika, Ubufumu bwa kwa Lesa bwalicindama sana kuli uyu mukashana!