Ubufumu bwa kwa Lesa—Ico Bwacindamina Kuli Yesu

Nge fyo tumwene mu cipande cifumineko, Yesu abikile sana amano ku ‘kushimikila no kubila imbila nsuma ya bufumu.’ (Luka 8:1) Alebombesha, alishingulwike mu Israele monse pa kuti fye asambilishe abantu pa Bufumu bwa kwa Lesa. Ifyo Yesu alebomba umulimo wa kushimikila fyalilembwa mu mabuuku yane aya Mbila Nsuma, umo balanda pa Bufumu imiku ukucila pali 100. Kabili imiku iingi, baleambula ifyo Yesu umwine alandile, na lyo line iyi mpendwa inono nga kuilinganya ku miku yonse iyo Yesu alandile pa Bufumu bwa kwa Lesa!—Yohane 21:25.

Mulandu nshi Ubufumu bwacindamine sana kuli Yesu ilyo ali pe sonde? Pantu Yesu alishibe ukuti e o Lesa asalile ukuba Imfumu. (Esaya 9:6; Luka 22:28-30) Lelo Yesu tabikile amano ku kuba na maka nelyo ku kupokelela umucinshi. (Mateo 11:29; Marko 10:17, 18) Talesabankanya Ubufumu pa kuti fye aisekeshe umwine. Icikalamba ico Yesu abikile amano ku Bufumu bwa kwa Lesa, ne co abikilako amano pali ino nshita,a ni co alishiba ifyo buli no kucitila abo atemwa, e kutila Wishi wa ku muulu e lyo na basambi bakwe aba cishinka.

IFYO UBUFUMU BUKACITILA WISHI WA KWA YESU

Yesu alitemwa sana Wishi wa ku muulu. (Amapinda 8:30; Yohane 14:31) Alitemwa sana imibele iisuma iya kwa Wishi pamo nga ukutemwa, uluse, no mulinganya. (Amalango 32:4; Esaya 49:15; 1 Yohane 4:8) Kanshi Yesu afwile alomfwa ububi pa bufi ubo babepesha Wishi, pamo nga ubufi bwa kuti Lesa tatubikako amano no bwa kuti afwaya tulecula. Uyu e mulandu wine Yesu abikile amano ku kubila “imbila nsuma ya bufumu” pantu alishibe ukuti Ubufumu e bukafumyapo ubufi ubo babepesha Wishi. (Mateo 4:23; 6:9, 10) Bushe Ubufumu bukafumyapo shani ubufi?

Yehova akabomfya Ubufumu ku kuwamya ifintu pa kuti abantu bakaleikala bwino. “Akafuuta ifilamba fyonse” ku menso ya bantu bakwe aba cishinka. Yehova akafumyapo fyonse ifilenga abantu ukulila. “Imfwa tayakabeko na kabili, takwakabe no kuloosha nangu ukuteta nangu ukukalipwa na kabili.” (Ukusokolola 21:3, 4) Lesa akabomfya Ubufumu bwakwe pa kufumyapo fyonse ifilenga abantu balecula.b

Kanshi e mulandu wine Yesu abelele uwacincila ukubila pa Bufumu! Alishibe ukuti ukusabankanya Ubufumu kwali no kulenga abantu baishiba ukuti Wishi wa maka kabili wa luse. (Yakobo 5:11) Yesu alishibe no kuti Ubufumu bukalenga na bambi abo atemwa ukwikala bwino, na aba bantu aba cishinka.

IFYO UBUFUMU BUKACITILA ABANTU ABA CISHINKA

Ilyo ashilaisa pe sonde, Yesu aleikala na Wishi ku muulu. Wishi abomfeshe Umwana, pa kubumba ifintu fyonse, ukutendekela ku mintapendwa ya ntanda na maplaneti ukufika kuli planeti yesu iisuma nga nshi ne nama shonse ishabamo. (Abena Kolose 1:15, 16) Lelo pali fyonse ifyo Lesa apangile, Yesu ‘atemenwe’ sana abantu.—Amapinda 8:31.

Yesu alelanga sana ukutemwa ku bantu ilyo alebomba umulimo wa kushimikila. Ukutula fye pa kutendeka, Yesu alandile ukuti ico aishile kwi sonde ni ku ‘kubila imbila nsuma’ ku balanda. (Luka 4:18) Lelo Yesu tapelele fye pa kulanda, imiku iingi alecita ifyalelanga ukuti alitemwa abantu. Ku ca kumwenako, ilyo ibumba ilikalamba lyaile mu kukutika kuli ena, Yesu “abomfwilile uluse, kabili aposeshe abalwele babo.” (Mateo 14:14) Ilyo umwaume uwalwele ubulwele ubwabipisha alangile ukuti alicetekele ukutila Yesu kuti amundapa nga alefwaya, Yesu alimumfwilile uluse. Alyundepe ulya mwaume, cikuuku cikuuku amwebele ati: “Ndefwaya. Pola.” (Luka 5:12, 13) Na lintu Yesu amwene cibusa wakwe Maria aleloosha ndume yakwe Lasaro, “aumfwile ubulanda nga nshi,” “alyumfwile ububi;” kabili “aponeshe ifilamba.” (Yohane 11:32-36) Lyena acitile icipesha mano. Nangu ca kuti ukutula apo Lasaro afwilile palipitile inshiku shine, Yesu alimubuushishe!—Yohane 11:38-44.

Kwena Yesu alishibe ukuti ifyo acitiile abantu fyali fye fya pa kashita. Alishibe ukuti bonse abo aundepe bali no kulwala na kabili na bonse abo abuushishe bali no kufwa. Nomba alishibe no kuti Ubufumu bwa kwa Lesa bwali no kufumyapo aya mafya umupwilapo. E mulandu wine Yesu ashalecitila fye ifipesha mano; lelo ali uwacincila na pa kubila “imbila nsuma ya bufumu.” (Mateo 9:35) Ifipesha mano Yesu alecita fyalelanga ifyo Ubufumu bwa kwa Lesa bukacita mwi sonde lyonse. Tontonkanyeni pa fyo Baibolo yatulaya ku ntanshi.

• 

  Takwakabe ukulwala.

  “Pali iyo nshita amenso ya mpofu yakamona, na matwi ya bankomamatwi yakakomonwa. Pali iyo nshita uwalemana amolu akacilauka nge nsebula, kabili ululimi lwa kwa cibulu lukaula akapundu.” Na kabili “takuli umwikashi uukatila: ‘Nindwala.’”—Esaya 33:24; 35:5, 6.

• 

  Takwakabe ukufwa.

  “Abalungama e bakekala mu calo, kabili bakekalamo umuyayaya.”—Amalumbo 37:29.

  “Akamina imfwa umuyayaya, kabili Shikulu Mulopwe Yehova akafuuta ifilamba ku menso yonse.”—Esaya 25:8.

• Abafwa bakabuuka.

  “Bonse ababa mu nshiishi bakebukishiwa kabili bakomfwa ishiwi lyakwe no kufumamo.”—Yohane 5:28, 29.

  “Kukaba ukubuuka.”—Imilimo 24:15.

• 

  Takwakabe uushakakwate ing’anda ne ncito.

  “Bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo. . . . Umulimo wa minwe yabo abasalwa bandi bakasekelamo nga nshi.”—Esaya 65:21, 22.

• 

  Takwakabe inkondo.

  “Alelenga inkondo ukupwa ukufika ku mpela sha pano isonde.”—Amalumbo 46:9.

  “Uluko talwakemishe uluko lunankwe ulupanga, nangu ukusambilila inkondo na kabili.”—Esaya 2:4.

• 

  Takwakabe insala.

  “Isonde likamesha ifilimwa fya liko; Lesa, Lesa wesu, akatupaala.”—Amalumbo 67:6.

  “Ingano shikafula nga nshi pano isonde; pa muulu wa mpili shikafula icine cine.”—Amalumbo 72:16.

• Takwakabe ubupiina.

  “Abapiina tabakalabwe umuyayaya.”—Amalumbo 9:18.

  “Akapususha umulanda uulekuuta mutuule, no wacula na onse uushakwata wa kumwafwa. Akomfwila ubulanda umulanda no mupiina, kabili akapususha imyeo ya bapiina.”—Amalumbo 72:12, 13.

Ilyo mwatontonkanya pali ayo malayo yalanda pa Bufumu bwa kwa Lesa, mufwile mwamona umulandu Ubufumu bwacindamina sana kuli Yesu? Ilyo ali pano isonde, ali uwacincila pa kulanda pa Bufumu bwa kwa Lesa ku balefwaya ukukutika, pantu alishibe ukuti Ubufumu buli no kupwisha amafya yonse ayo tupitamo pali ino nshita.

Bushe tamuyatemenwe aya malayo Baibolo yalaya pa Bufumu? Nga namuyatemwa, kuti mwacita shani pa kuti mwishibilepo na fimbi pali ubu Bufumu? Kabili kuti mwacita shani pa kuti mukanonkelemo muli aya mapaalo? Icipande ca kulekeleshako cala-asuka aya mepusho.