Bushe Ifunde lya Kuupa Nelyo Ukuupilwa “Muli Shikulu Epela” Licili Lyalicindama?

Ifi twalandapo e fyo ababomfi ba kwa Lesa bamo balanda ilyo bashilasanga uwa kuupana nankwe mu cilonganino. Lelo balishiba bwino ukufunda ukwa mutumwa Paulo ukwa kuupila nelyo ukuupilwa “muli Shikuli epela.” Abena Kristu bonse bafwile ukukonka uku kufunda. (1 Kor. 7:39) Nomba mulandu nshi balandila ifi?

ICO BAMO BATWISHIKILA UKU KUFUNDA

Nalimo abalanda amashiwi ayo tulandile pa muulu batontonkanya ukuti bamunyinefwe abafika pa mushinku wa kuupa balicepa ukucila bankashi. Kwena, ifi e fyo caba na mu fyalo ifingi. Ku ca kumwenako: Mu Korea, pali ba Nte abashimbe 100, palaba bankashi 57 e lyo bamunyina baba 43. Pali ba Nte bonse ababa mu Colombia bankashi balifula sana ukucila bamunyina.

Na cimbi icalenga ukuti bamo baletwishika ukufunda kwa mutumwa Paulo ca kuti, mu fyalo fimo abafyashi abashili ba Nte balapingula indalama ishingi pa bana babo, ne ci cilenga bamunyinefwe abashakwata sana indalama ukufilwa ukulauupa. Pa mulandu ne fi twalandapo, nkashi nalimo kuti atendeka ukutontonkanya ukuti calyafya ukusanga uwa kuupana nankwe “muli Shikulu.” Nalimo kuti ayipusha ukuti “Bushe kuti caba fye bwino ukulatontonkanya ukuti kuti nasanga uwa kuupana nankwe mu Bena Kristu banandi?”a

UKUCETEKELA MULI YEHOVA KWALICINDAMA

Ifi nga e fyo mutontonkanya, mufwile ukwishiba ukuti Yehova alishiba ifyo mufwaya. Alishiba ne fyo mutontonkanya pali uyu mulandu.—2 Imila. 6:29, 30.

Nangu cibe ifyo, Yehova alitupeela mu Cebo cakwe ifunde ilya kuupa nelyo ukuupilwa muli Shikulu epela. Mulandu nshi atupeelela ili funde? Pantu alishiba icingawamina abantu bakwe. Tafwaya fye ukucingilila ababomfi bakwe kufingabakalifya nga bakonka ifyo imitima yabo ilefwaya lelo afwaya no kuti baleba ne nsansa. Mu nshiku sha kwa Nehemia ilyo abaYuda abengi baleupa abena fyalo abashalepepa Yehova, Nehemia alandile pa fyabipa ifyacitikile Solomone. Nangu ca kuti Solomone “ali uwatemwikwa kuli Lesa, . . . abanakashi bambi bambi bamulengele ukubembuka.” (Nehe. 13:23-26) Kanshi pa kuti ifintu filetuwamina, Lesa aeba fwe babomfi bakwe ukuti tuleupa nelyo ukuupwa kuli bakapepa ba cine epela. (Amalu. 19:7-10; Esa. 48:17, 18) Abena Kristu ba cine balatasha pa fyo Lesa abasakamana kabili balicetekela sana ukufunda kwakwe. Kanshi ifi bamunakila ukuti ni Kateka, balanga ukuti Yehova e walinga ukuteka.—Amapi. 1:5.

Ukwabula no kutwishika tamufwaya ukuba “kwi koli limo line” no muntu uwingalenga mwaleka ukubombela Lesa. (2 Kor. 6:14) Abena Kristu abengi balakonka ili funde lya kwa Lesa ilibacingilila kabili balishininkisha ukuti ifi bapingulapo ukuupwa nelyo ukuupilwa muli Shikulu balicita bwino sana. Lelo bamo tabakonka ili ifunde.

ILI FUNDE LICILI LYALICINDAMA

Maggy,b nkashi uwa ku Australia uwaleishishanya no muntu uushali Nte, atile: “Nshalesangwa sana mu kulongana pa mulandu wa kuti inshita iikalamba naleba nankwe. Nalinakile sana mu fya kwa Lesa.” Ratana uwikala ku India alitemwanene sana no mulumendo uo alesambilila nankwe pa sukulu kabili uwatendeke ukusambilila Baibolo. Lelo mu kupita kwa nshita, Ratana aishileishiba ukuti uyu mulumendo alefwaya fye ukuti balecita nankwe ubulalelale. Ici calengele ukuti aleke ukulongana no kutendeka ukulapepa ku mipepele imbi pa mulandu wa kufwaya fye ukuupwa.

Umbi na o ni Ndenguè uwikala ku Cameroon. Ali fye ne myaka 19 ilyo aupilwe. Umulumendo uwamukobekeele amwebele ukuti nangu baupana akatwalilila ukulapepa uko apepa. Papitile fye imilungu ibili ukutula apo baupanine, umulume alimuleseshe ukulasangwa mu kulongana. Ndenguè atile: “Nalipopomenwe kabili nalelila fye cila bushiku. Nalishibe ukuti nailetelele fye ne mwine. Naleba no bulanda sana.”

Kwena te bonse abashili ba Nte abo abena mwabo ni ba Nte ababa abankalwe kabili abaumina kumo. Lelo, nangu ca kuti tamupita mu mafya ayapitamo abaupana na bashili ba Nte, bushe bucibusa bwenu na Shinwe wa ku muulu bwaba shani? Bushe mumfwa shani pa kwishiba ukuti tamwaumfwilile ifunde ilya kumucingilila ilyo Lesa amupeela? Kabili icacindamisha ca kuti, bushe Shinwe wa ku muulu omfwa shani pa fyo mwasalapo ukuupana no uushili Nte?—Amapi. 1:33.

Bamunyina ne nkashi mu calo conse kuti balanda ukuti ukumfwila ifunde lya kuupila nelyo ukuupilwa “muli Shikulu epela” kwalicindama. Bamunyinefwe bonse abashimbe balafwaisha ukulenga Lesa ukusekelela, pa kuitemenwa ukuupana na babomfi ba kwa Lesa abo batemenwe. Michiko, nkashi umushimbe umwina Japan balemupatikisha kuli balupwa lwakwe ukuti oopwe ku ushili Nte. Kabili ubwafya na bumbi ubo akwete bwa kuti, ilyo akeene ukuupwa ku uushili Nte, alemona bankashi bamo mu cilonganino baleupwa kuli bamunyina abali cilonganino aali. Alandile ukuti: “Natwalilile ukutontonkanya ukuti apo Yehova ni ‘Lesa wa nsansa,’ kanshi kuti twaba ne nsansa nampo nga twalyupwa nelyo iyo. Na kabili nalishiba ukuti alatupeela ifyo tufwaisha. E ico nga tatusangile uwa kuupana nankwe, kuti caba bwino ukutwalilila abashimbe ukufikila tukasange uwa kuupana nankwe.” (1 Tim. 1:11) Na mukulekelesha, Michiko alyupilwe kuli munyina uwa mibele iisuma, kabili aliba ne nsansa pantu alilolelele.

Na bamunyinefwe bamo balilolelele pa kusanga uwa kuupana nankwe. Bill, munyinefwe uwa ku Australia na o e fyo acitile. Alandile ukuti, pa nshita imo alitemenwepo abanakashi abashali ba Nte. Lelo, talefwaya ukwishibana sana nabo. Mulandu nshi? Talefwaya ukucita ifingalenga aba “kwi koli limo line” no muntu uushatetekela. Pa myaka iingi, alitemenweko bankashi bamo, lelo tabalefwaya ukuupana nankwe. Bill alilolelele pa myaka 30 ilyo ashilasanga nkashi uo aupene nankwe. Bill alandile ukuti: “Nshilanguluka pa fyo naikele ukwabula ukuupa pa myaka iingi.” Na kabili atile: “Nalipaalwa pantu tulabombela pamo umulimo wa mwi bala, tulasambilila pamo Baibolo, kabili tulapepela Lesa pamo. Ndaba ne nsansa nga twamonana no kubishanya ne fibusa fya mwina mwandi apo nabo ni ba Nte. Tulakonka ifyo Baibolo ilanda mu cupo cesu.”

IFYO MUFWILE UKUCITA ILYO MULELOLELA PALI YEHOVA

Finshi mufwile ukucita ilyo mulelolela pali Yehova? Ica kubalilapo, mufwile ukulatontonkanya pa calenga ukuti mwiupa nelyo ukuupwa. Nga mwasanga ukuti icalenga ni co mulomfwila ifunde lya mu Baibolo ilya kuupila nelyo ukuupilwa “muli Shikulu epela,” ala tulemutasha pa kulaumfwila ili funde lya kwa Lesa. Mwilatwishika ukuti Yehova alasekelela pa fyo mumfwila ifyo alanda mu Cebo cakwe. (1 Sam. 15:22; Amapi. 27:11) Mulepepa kuli Lesa ‘ukumupongolwela ifyaba mu mitima yenu.’ (Amalu. 62:8) Amapepo yenu yakulaba ayasuma nga mulepepa lyonse kuli Lesa ukufuma pa nshi ya mutima. Bucibusa bwenu na Lesa bukalakoselako cila bushiku ilyo muletwalilila ukushipikisha amafya ya kukanasanga uwa kuupana nankwe. Mufwile ukucetekela ukuti Yehova alitemwa ababomfi bakwe bonse aba cishinka, kabili Yehova alamumona ukuti mwalicindama. Alamusakamana muli fyonse ifyo mukabila. Talaya uuli onse ukuti akamupeela uwa kuupana nankwe. Lelo nga mulefwaya sana uwa kuupana nankwe, Lesa alishiba bwino ifyo engamupeela ifyo mufwaisha.—Amalu. 145:16; Mat. 6:32.

Inshita shimo kuti mwaumfwa nga filya Davidi uwaimbile amalumbo aumfwile, atile: “Shi angufyanyeni, njasukeni, mwe Yehova. Umupashi wandi wafika ku mpela. Mwifisa icinso cenu kuli ine.” (Amalu. 143:5-7, 10) Pali utu tushita, mufwile ukulolela pali Shinwe wa ku muulu ukuti amulange ifyo afwaya. Ilyo mulelolela pali ena mufwile ukulabelenga Icebo cakwe no kulatontonkanya pa fyo mulebelenga. Mukeshiba amafunde ya kwa Lesa e lyo ne fyo ayafwile abantu bakwe aba ku kale. Nga mulekutika kuli ena, mukalamona ubusuma bwaba mu kumfwila Lesa.

Finshi fimbi ifingalenga ukuti mutwalilile ukuba ne nsansa no kulabombesha ilyo mucili abashimbe? Ilyo mucili abashimbe bombesheni ukuba ne mibele pamo nga ukwiluka umwalola ifyalembwa mu Cebo ca kwa Lesa, ukuba bakapekape, ukubombesha, ubusuma, bukapepa, ne shina lisuma. Iyi e mibele iilenga abaupana ukuba ne nsansa. (Ukute. 24:16-21; Ruti 1:16, 17; 2:6, 7, 11; Amapi. 31:10-27) Mulefwaya Ubufumu intanshi pa kulabombesha mu mulimo wa kubila imbila nsuma na mu milimo imbi iya Bwina Kristu; nga mulecita ifi mukacingililwa mu bushimbe bwenu. Bill uo tulandilepo kale, alandile pa nshita ilyo alefwaya ukuupa, ati: “Yalipitile bwangu! Pantu pali ilya nshita nalebombako bupainiya.”

Kanshi, ifunde lya kuupila nelyo ukuupilwa “muli Shikulu epela” licili lyalicindama. Ukumfwila uku kufunda kuti kwalenga mwalacindika Yehova no kulaba ne nsansa. Baibolo itila: “Alipaalwa umuntu uutiina Yehova, uusekelela nga nshi mu mafunde yakwe. Mu ng’anda yakwe mwaba ifipe ifyauma umutengo ne fyuma, no bulungami bwakwe bwaiminina pe.” (Amalu. 112:1, 3) E ico twalilileni ukukonka ifunde lya kwa Lesa ilya kuupa nelyo ukuupilwa “muli Shikulu epela.”