ICIPANDE ICIKALAMBA BUSUMA NSHI BWABA MU KUPEPA?
Cinshi Abantu Bapepela?
“Naleteya sana ifyangalo fya kushitikapo kabili nalepepa ukuti nkawine indalama ishingi, lelo nshatalile ngwinapo.”—Ba Samuel,a aba ku Kenya.
“Ku sukulu twalepepa fye amapepo ya kusungila ku mutwe ayo batusambilishe.”—Teresa, uwa ku Philippines.
“Ndapepa nga ndi na mafya, ukuti Lesa alenjelela imembu e lyo no kuti ningaba Umwina Kristu umusuma.”—Ba Magdalene, aba ku Ghana.
Ifyo ba Samuel, Teresa, na ba Magdalene balandile filanga fye ukuti abantu balapepela pa fintu ifyalekanalekana. Na kuba, bamo balapepela fye na pa fintu ifishacindama. Abantu bamo balapepa amapepo ayafuma pa nshi ya mutima e lyo bambi tabapepa ukufuma pa nshi ya mutima. Na lyo line, abantu abengi balafwaisha ukupepa. Bamo balapepa ukuti bakapite amashindano, ukuti ibumba lya bakateya ba fyangalo abo batemwa bacimfye, ukuti Lesa alebatungulula mu lupwa lwabo, nelyo ukupepela fye pa fintu fimbi. Na kuba, abafwailisha pa fintu basanga ukuti nangu fye bantu abashiya ku cilonganino ca mapepo icili conse, balapepa cila bushiku.
Bushe mulapepa? Nga mulapepa, finshi mupepelapo? Nampo nga mulapepa nelyo iyo, nalimo mulatontonkanya amuti: ‘Bushe busuma nshi bwaba mu kupepa? Bushe kwaliba uukutika amapepo?’ Kalemba umo alandile pe pepo ukuti “ni nshila ya kuisansamushishamo fye . . . nga filya umuntu engacita nga alelanda ku citekwa.” Abantu bamo ababomba mu fipatala nabo e fyo bamona ipepo. Batila ipepo lilalenga umuntu aumfwako bwino nga filya fine umuntu omfwako bwino nga anwa umuti. Bushe abantu bapepela fye ico cine, nelyo bushe ico bapepela kufwaya fye ukuti baleumfwako bwino?
Baibolo itweba ukuti tatulingile fye ukupepa pa kuti tuleumfwako bwino. Itweba ukuti kwaliba uukutika ku mapepo ya bantu abapepa mu nshila iyo afwaya e lyo na pa fintu ifyo afwaya. Bushe ca cine kwaliba uukutika amapepo? Natulande pa filanga ukuti e ko aaba.
a Amashina yamo te yabo.