BUSHE KUTI MWAYASUKA IFI FIPUSHO?
Bushe balepanga shani ifimfungwa kale, kabili balefibomfya shani?
Ifimfungwa fya mpapa apalembwa ibuuku lya kwa estere ifyo batampile ukupanga muli ba 1700.
Mwi buuku lya kwa Luka, mwaliba amashiwi ya kuti Yesu alifungulwile icimfungwa ca kwa Esaya, abelengamo e lyo acifunga na kabili. Mu cipandwa ca kulekeleshako ice buuku lya kwa Yohane, Yohane atile te fipesha amano fyonse ifyo Yesu acitile ifyo alembele mu cimfungwa cakwe.—Luka 4:16-20; Yohane 20:30; 21:25.
Bushe balepanga shani ifimfungwa? Pa kupanga icimfungwa, balelundanya ifintu pamo nga impapa, amacinda e lyo ne fintu fimbi. Nga balundanya, balefipomba ku kamuti, kabili ifilembo fyalebela mu kati. Ifilembo ifyo balelembapo fyaleba mu misela iyipi iyalelola mu butali. Icimfungwa nga citali, calekwata utumuti tubili pa mpela, kabili uulebelenga alebomfya akamuti kamo ukufungulula e lyo kambi alekabomfya pa kufunga mpaka asanga apo acilafwaya ukubelenga.
Icitabo ca The Anchor Bible Dictionary citila, “Icimfungwa calelepa sana [ilingi line caleba nalimo amamita 10] pa kuti paba ifyebo ifingalingana fye ne buuku ilinono nga bafungulula.” Ku ca kumwenako, ibuuku lya kwa Luka lyalembelwe pa cimfungwa nalimo icalepele amamita 9.5. Limo limo icimfungwa baleciputula bwino bwino mu mbali kabili balekuusamo ukubomfya ilibwe e lyo bapentamo.
Bushe “intungulushi sha bashimapepo” abo balandapo mu Malembo ya Bwina Kristu aya ciGriki ni bani?
Ukutula apo batendekeele ukusala bashimapepo mu Israele, kwaleba fye umuntu umo uwaleba shimapepo mukalamba, kabili takwaleba ukusala umbi ukufikila uulipo afwa. (Impendwa 35:25) Aarone e wabalilepo ukuba shimapepo mukalamba. Lyena shimapepo mukalamba nga afwa, umwana wakwe ibeli e walemupyana. (Ukufuma 29:9) Abana abaume abengi abafumine muli Aarone baleba bashimapepo, lelo banono sana abalipo bashimapepo mukalamba.
Ilyo abena Israele balebateka ku bantu bambi, bakateka abashali abena Israele e balesala kabili e balefumyapo bashimapepo mukalamba apo balefwaila. Na lyo line, cimoneka kwati abo balesala ilingi line balefuma mu lupwa lwa kwa Aarone. Amashiwi ya kuti “intungulushi sha bashimapepo” nalimo yalanda pali bashimapepo abacindikwe sana. Abaleba intungulushi sha bashimapepo bafwile ni balya abaleba intungulushi sha mabumba 24 aya bashimapepo, abantu abacindikwe sana aba mu ndupwa sha bashimapepo mukalamba, e lyo nabalipo kale bashimapepo mukalamba, pamo nga Anasi.—1 Imilandu 24:1-19; Mateo 2:4; Marko 8:31; Imilimo 4:6.