CINSHI BAIBOLO ISAMBILISHA?

Bushe tuba shani nga twafwa?

ABANTU BAMO BASUMINA ukuti umuntu nga afwa, alatwalilila ukuba no mweo mu cintu cimbi, e lyo bambi nabo batila umuntu nga afwa ninshi calaala capwa. Inga imwe, finshi mwasumina?

IFYO BAIBOLO ILANDA

“Abafwa, tabaishiba akantu nangu kamo.” (Lukala Milandu 9:5) Kanshi nga twafwa, tatuba aba mweo.

FIMBI IFYO TUSAMBILILA KU FYO BAIBOLO ILANDA

• Umuntu wa kubalilapo Adamu, aile ku lukungu ilyo afwile. (Ukutendeka 2:7; 3:19) Ifi fine e fyo ciba na ku bantu bonse abafwa, balabwelela ku lukungu.—Lukala Milandu 3:19, 20.

• Umuntu nga afwa, ninshi umulandu wakwe uwa lubembu wapwa. (Abena Roma 6:7) Takakandilwe pa membu acitile ilyo ashilafwa.

Bushe abafwa bakabuuka?

BUSHE KUTI MWATILA . . .

• Ee

• Awe

• Nalimo

IFYO BAIBOLO ILANDA

“Kukaba ukubuuka.”—Imilimo 24:15.

FINSHI FIMBI IFYO TWINGASAMBILILA KU FYO BAIBOLO ILANDA?

• Baibolo ilingi line ilanda pa bantu abafwa ukuti baleele fye utulo. (Yohane 11:11-14) Lesa kuti abuusha abafwa, nga filya fine twingabuusha umuntu uuleele utuulo.—Yobo 14:13-15.

• Apo mu Baibolo mwaliba amalyashi ayengi ayalanda pa bantu ababuushiwe, kuti twacetekela ukuti abafwa bakabuuka.—1 Ishamfumu 17:17-24; Luka 7:11-17; Yohane 11:39-44.