Ifyo ishina lya kwa Lesa (ilili umo bapentele) limoneka mu manyuskripti ya kale aya Baibolo
Cinshi Baibolo Isambilisha?
Bushe Lesa alikwata ishina?
ABANTU BAMO BATILA takwata ishina, bambi batila ishina lyakwe ni Lesa nelyo Shikulu, e lyo bambi nabo batila alikwata amashina ayengi. Inga imwe mwaishibapo shani?
IFYO BAIBOLO ILANDA
“Mwe bakwata ishina lya kuti Yehova, ni mwe Mwapulamo pano isonde ponse.”—Amalumbo 83:18.
FINSHI FIMBI IFYO TUSAMBILILAKO KU FYO BAIBOLO ILANDA?
Nangu ca kuti Lesa alikwata amalumbo ayengi, akwata fye ishina limo.—Ukufuma 3:15.
Lesa afwaya ukuti twamwishiba.—Imilimo 17:27.
Pa kuba cibusa wa kwa Lesa, tulingile ukubalilapo ukwishiba ishina lyakwe.—Yakobo 4:8.
Bushe calibipa ukulumbula ishina lya kwa Lesa?
BUSHE KUTI MWATILA?
Ee
Awe
Nalimo
IFYO BAIBOLO ILANDA
“Wilalumbula apa fye ishina lya kwa Yehova Lesa obe.” (Ukufuma 20:7) Icabipa fye kulumbula ishina lya kwa Lesa apa fye.—Yeremia 29:9.
FINSHI FIMBI IFYO TUSAMBILILAKO KU FYO BAIBOLO ILANDA?
Yesu alishibe ishina lya kwa Lesa kabili alelibomfya.—Yohane 17:25, 26.
Lesa alitweba ukuti tulebomfya ishina lyakwe. —Amalumbo 105:1.
Abalwani ba kwa Lesa bafwaya ukuti abantu balelaba ishina lya kwa Lesa.—Yeremia 23:27.