ICIPANDE ICIKALAMBA | IFIMONWA IFITWAFWA UKWISHIBA UKWIKALA IMIPASHI
Ifyo Twingeshiba Ifyo Ku Cifulo Ca Mipashi Kwaba
Bushe mwalibala amutontonkanyapo pa fyo ku cifulo ca mipashi kwaba e lyo na pa babako? Nga mwalitontonkanyapo, ninshi tamwaba mweka. Pa myaka iingi, abantu balalanda ifyalekanalekana pali ili ilyashi. Bamo batila ku cifulo ca mipashi e kwaba ifikolwe fyabo, kabili bafwile ukuficindika. Bambi batontonkanya ukuti cifulo ukwaba sana insansa ico beta ukuti ku muulu, kabili kwaba bamalaika na bantu abasuma abafwa. Bambi nabo batila cifulo ukwaba balesa abengi nga nshi.
Abantu abengi balanda ukuti apo takwaba umuntu nangu umo uwaisapo ukufuma ku cifulo ca mipashi, te kuti twishibe ifyabako. Na lyo line, ifi balanda, te fya cine. Ilyo Yesu Kristu ashilaisa pa calo, aleikala ku cifulo ca mipashi, ku muulu. Ilyo alelanda ne ntungulushi sha mapepo ishaliko ilyo aali pa calo, alandile ukwabula no kupita mu mbali ukuti: “Ico nafumina ku muulu te ku kucita ukufwaya kwandi, lelo ni ku kucita ukufwaya kwa wantumine.” Kanshi Yesu alelanda ifyo aimwenene na menso ilyo aebele abatumwa bakwe ukuti: “Mu ng’anda ya kwa Tata mwaba apa kwikala apengi.”—Yohane 6:38; 14:2.
Wishi uo Yesu alelandapo ni Lesa, uo ishina lyakwe ni Yehova, kabili “ing’anda” yakwe yaba ku muulu. (Amalumbo 83:18) Kanshi takwaba uwingalondolola bwino ifyaba ku muulu nga Yehova Lesa na Yesu Kristu. Yehova Lesa na Yesu Kristu balangile abantu ba cishinka ifyo icifulo ca mipashi cimoneka ukubomfya ifimonwa.
Icipande cikonkelepo nacilondolola amalembo ya muli Baibolo ayalanda pa fyo abantu bamwene mu fimonwa fimo. Ilyo tulelanda pali ifi ifimonwa, mufwile ukwishiba ukuti ku cifulo ca mipashi takwaba ifintu ifyo twingamona na menso nelyo ukwikata. Nomba Lesa alitulondolwela ifi fintu mu nshila iyayanguka ukumfwa. Ifi ifimonwa fyalamwafwa ukwishiba abekala ku cifulo ca mipashi ico Yesu atile kwaba “apa kwikala apengi.