Bushe Lesa Alimubikako Amano?

IFYO TUSAMBILILA KU FYO LESA ABUMBA

Ilyo umwana afyalwa fye, nyina afwile ukumufukatila pe awala lya kubalilapo. Mulandu nshi? Ni co umwana alakula bwino nga ca kuti nyina amufukatila pali iyi inshita.a

Cinshi cilenga nacifyashi ukubika sana amano ku mwana wakwe? Ba profesa Jeannette Crenshaw balembele muli magazini ya The Journal of Perinatal Education ukuti: “Ilyo nacifyashi apaapa, kwaliba ifyo umubili upanga ifiya mu mulopa ifilenga nacifyashi ukutemwa umwana nga amwikata, amulolesha, nelyo amonsha.” E lyo fimbi ifyo umubili upanga filalenga “nacifyashi ukulabika sana amano” ku mwana. Cinshi ifi fyacindamina?

Kabumba wesu Yehova Lesa, abumbile nacifyashi ukuti aletemwa sana umwana wakwe.b Imfumu Davidi yalitashishe Lesa pa ‘kuifumya mu nda’ muli nyina na pa kuilenga ukulaumfwa iyacingililwa ilyo nyina aifukatile. Yapepele ukuti: “Napeelwe kuli imwe ukufuma mwi fumo; Ukufuma mu nda muli mayo ni mwe Lesa wandi.”—Amalumbo 22:9, 10.

TONTONKANYENI PALI ICI: Nga ca kuti Lesa e walenga ukuti nacifyashi alebika sana amano ku mwana wakwe no kulamucitila ifyo alefwaya, ninshi alitubikako amano ifwe bonse ‘apo tuli bana bakwe.’—Imilimo 17:29.

IFYO BAIBOLO ILANDA PA FYO LESA ATUBIKAKO AMANO

Yesu Kristu uwaishiba Lesa ukucila umuntu uuli onse alandile ukuti: “Bushe tabashita inseba shibili mu kandalama akanono sana? Na lyo line takuli nangu lumo ulwingapona pa nshi ukwabula Shinwe ukwishiba. Lelo ne mishishi ya ku mitwe yenu yonse yalipendwa. E ico mwilatiina: Mwalicindama ukucila inseba ishingi.”—Mateo 10:29-31.

Abantu ababika amano ku tuni utunono na ku fyo tucita, tabafula sana. Nomba Shifwe wa ku muulu ena alibika amano ku tuni tonse. Na lyo line, utuni nangu tufule shani, tatwacindama kuli Lesa nga fintu umuntu acindama. Kanshi mwilamona kwati Lesa tamubikako amano.

Ifyo Baibolo ilanda

• “Amenso ya kwa Yehova yali mu ncende shonse, yalamona ababi na basuma.”—AMAPINDA 15:3.

• “Amenso ya kwa Yehova yalola pa balungama, Na matwi yakwe yomfwa inkuuta yabo.”—AMALUMBO 34:15.

• “Nkaanga no kusekelela mu cikuuku cenu, Pantu namumona ukucula kwandi; Namwishiba amacushi ya mweo wandi,”—AMALUMBO 31:7.

“NALEMONA KWATI YEHOVA TANTEMENWE”

Bushe tumfwa shani nga twaishiba ukuti Lesa alitutemwa kabili alamona ifiletucitikila? Tulatemwa. Ba Hannah,c aba ku England batile:

“Ilingi line, nalemona kwati Yehova tantemenwe no kuti taleyasuka amapepo yandi. Nalemona kwati icalengele ifi, ni co nshakwete icitetekelo. Nalemona kwati nshacindeme no kuti Lesa alenkanda, kabili naleti tambikako amano.”

Na lyo line, pali ino nshita ba Hannah tabatwishika ukuti Yehova alibabikako amano. Cinshi calengele baluke mu fyo baletontonkanya? Balandile ukuti: “Natendeke ukwaluka panono panono. Ilyashi lya Baibolo ilyalelanda pa fyo Yesu atulubwile, ilyo naumfwile imyaka iingi iyapita, lyalilengele natendeka ukumona ukuti Yehova alintemwa. Na kabili nga namona ifyo Yehova asuka amapepo yandi, ndatendeka no kulila, pantu ndamona ifyo antemwa. Cimbi icingafwa, kusambilila Baibolo no kuya mu kulongana uko tusambilila pali Yehova, pa fyo aba, na pa fyo atumona. Pali ino nshita, ndamona ifyo Yehova angafwa, ifyo atutemwa bonse, ne fyo afwaisha ukutusakamana.”

Ifyo ba Hannah balandile filatukoselesha. Nomba kuti mwashininkisha shani ukuti Lesa alishiba ifyo mumfwa kabili tafilaba? Twalayasuka ici icipusho mu cipande cikonkelepo.