Amepusho Ukufuma Ku Babelenga

Nga ca kuti abantu abashaupana balaala mu ng’anda imo ine ukwabula umulandu wine wine, bushe ninshi nababembuka kabili balingile ukubapangila komiti ya bupingushi?a

Ee, kuti babapangila komiti ya bupingushi nga ca kuti kuli ifishinka ifilelanga ukuti balicita ubulalelale.—1 Kor. 6:18.

Ibumba lya baeluda likabebeta fyonse ifyacitike pa kuti bamone nga ca kutila balingile ukupanga komiti ya bupingushi. Ku ca kumwenako: Bushe abo abashaupana baleshishanya? Bushe kale balicitilepo ifyalengele baeluda babafunde pa mibele balingile ukukwata ilyo bali pamo? Finshi fyalengele balaale mu ng’anda imo? Bushe balipangene ukulaala mu ng’anda imo? Bushe kwali ifyo balingile ukucita pa kuti belaala mumo, nelyo bushe tabakwete umwa kulosha, nalimo kwali ifintu ifyabula ukwenekela ifyalengele nelyo kwali umulandu uukalamba uwalengele balaale mu ng’anda imo? (Luk. Mil. 9:11) Ni pi baleele? Ifingacitikila umuntu umo kuti fyapusana ne fingacitikila umbi, kuti kwaba imilandu imbi iyo baeluda bengatontonkanyapo.

Nga ca kuti ibumba lya baeluda lyafwailisha ifishinka, bakamona nga ca kutila kuti bapangila abo Abena Kristu komiti ya bupingushi nelyo iyo.