Impaanga sha kwa Yehova Shikabila Ukusakamana Kwabondoka

“Ishibeni ukuti Yehova wene e Lesa . . . Tuli bantu bakwe, umukuni wa bucemi bwakwe.”—ILUMBO 100:3.

1. Ni shani fintu Yehova asunga ababomfi bakwe?

YEHOVA e Mucemi Wakulisha. Nga ca kuti tuli babomfi bakwe, atumona nge mpaanga shakwe kabili atusakamana mu kubondoka. Shifwe wa mu muulu alatusansamusha no kutubweseshamo umweo kabili alatutungulula “mu makuba ya bulungami pa mulandu we shina lyakwe.” (Ilumbo 23:1-4) Umucemi Musuma, Yesu Kristu, alitutemwa nga nshi ica kuti atutuulile no mweo wakwe.—Yohane 10:7-15.

2. Ni mu mibele nshi abantu ba kwa Lesa baisanga?

² Pamo nga bapokelela ukusakamanwa kwabondoka, kuti twasuminishanya na kemba wa malumbo uwatile: “Bombeleni Lesa ne nsansa; iseni ku cinso cakwe na ’kapundu. Ishibeni ukuti Yehova wene e Lesa; wene e watulenga, na ifwe tuli bakwe, tuli bantu bakwe, umukuni wa bucemi bwakwe.” (Ilumbo 100:2, 3) Ee, twaliba aba buseko kabili abacingililwa. Caba fye kwati twaba mwi cinka ilyapangwa ne linga lyakosa ilya njelwa abacingililwa ku filwani fibifi.—Impendwa 32:16; 1 Samwele 24:3; Sefania 2:6.

Abacemi ba Mukuni Abaitemenwa

3. Ni shani fintu baeluda basontwa aba Bwina Kristu basunga umukuni?

³ E mulandu wine kanshi twabela aba buseko pa kuba impaanga sha kwa Lesa! Pa kati kesu ni baeluda basontwa e batungulula. “[Tabomya] bucilolo,” ukuumyo lupaka pali ifwe, nelyo ukwesha ukuba bacibinda pa citetekelo cesu. (Impendwa 16:13; Mateo 20:25-28; 2 Abena Korinti 1:24; AbaHebere 13:7) Mu cifulo ca kube fyo, baba bakacema ba kutemwa ababomfya ukufunda kwa mutumwa Petro ukwa kuti: “Cemeni umukuni wa kwa Lesa uuli kuli imwe, ukuumona, te ku kupatikishiwa lelo ku kuitemenwa; te ku kumwenamo ubunonshi bwa nsoni, lelo ku kucincila kwa mutima; te kuumyo lupaka pa baseekeshiwa kuli imwe, kano ukube ca kumwenako ku mukuni.” (1 Petro 5:2, 3) Umutumwa Paulo aebele baeluda banankwe ukuti: “Muleyangwa mwe bene no mukuni onse uo Umupashi wa mushilo wamubikileko bucilolo; akucemeni ulukuta lwa kwa Shikulu ulo anonkeele mu mulopa [wa mwana, NW] wakwe wine.” Kabili fintu impaanga shaba isha kutasha pa kuti aba baume basontwa no mupashi wa mushilo “basunga umukuni mu mutembo”! (NW)—Imilimo 20:28-30.

4. Bushe Charles T. Russell alumbwike ku kwampana kwa musango nshi no mukuni?

⁴ Yesu apeele icilonganino “ifya bupe ku bantu,” bambi ukuba “bapasta,” nelyo abacemi, ababombela pa mukuni wa kwa Yehova mutembo mutembo. (Abena Efese 4:8, 11; King James Version) Umo uwa aba bantu aali ni Charles T. Russell, presidenti wa kubalilapo uwa Watch Tower Society. Aleitwa Pasta Russell pa mulandu wa mibombele yakwe iyabamo ukutemwa iya cililishi mu kukumba umukuni ukubombela pe samba lya Mucemi Mukalamba, Yesu Kristu. Ilelo, baeluda ba Bwina Kristu basontwa ne Bumba Litungulula ilya Nte sha kwa Yehova, kabili kulabako ukusakamana pa kuti inumbwilo pamo nga “pasta,” “eluda,” nelyo “kasambilisha” tashibomfiwe nga malumbo. (Mateo 23:8-12) Lelo, baeluda ba muno nshiku babomba umulimo wa bupasta, nelyo uwa kucema, pa kuti impaanga shaba mu bucemi bwa kwa Yehova shingamwenamo.

5. Mulandu nshi abapya balingile ukwishibila baeluda basontwa aba mu cilonganino ca Bwina Kristu?

⁵ Apantu bacemi, baeluda balabomba ulubali lukalamba mu kulunduluka kwa bapya. Muli fyo, icitabo cipya ica Ukwishiba Uko Kutungulula ku Mweo wa Muyayaya pe bula 168 cisoso kuti: “Beleshanya na baeluda basontwa aba mu cilonganino. Balibelesha apakalamba ukubomfya amano ya kwishiba Lesa, pantu balifikapo pa milingo ya bakangalila iyaimikwa muli Baibolo. (1 Timote 3:1-7; Tito 1:5-9) Wishimba ukuya kuli umo uwa bene nga ca kuti ulekabila ukwaafwa kwa ku mupashi ku kucimfya icibelesho nelyo imibele iyo iilwishanya na cintu Lesa afwaya. Ukasanga ukuti baeluda balakonka ukukonkomesha kwa kwa Paulo ukwa kuti: ‘Kosheni abatompoke mitima, koselesheni abanaka, tekanyeni kuli bonse.’—1 Abena Tesalonika 2:7, 8; 5:14.”

Lintu Abapya Balefwaya Ukutampa Ukushimikila

6. Ni nshila nshi ikonkwa nga ca kuti umusambi wa Baibolo alefwaya ukuba kasabankanya wa Bufumu?

⁶ Pa numa umusambi wa Baibolo abe nasambilila kabili nasangwa ku kulongana pa nshita yalepako, kuti pambi afwaya ukuba kasabankanya wa Bufumu, kashimikila wa mbila nsuma. (Marko 13:10) Nga cabe fyo, Nte uumutungulula isambililo lya Baibolo alingile ukumonana na kangalila wa kutangilila, uyo ukatantika umo uwa baeluda uwaba muli Komiti wa Mulimo uwa Cilonganino na eluda umbi ukukumana no musambi wa Baibolo na kasambilisha wakwe. Ukulanshanya kukashimpwa pa citabo ca Abateyanishiwa ku Kupwilikisha Ubutumikishi Bwesu, amabula 98 na 99. Nga ca kuti aba baeluda babili basanga ukuti umupya alisumina mu fisambilisho fya kutendekelako ifya mu Baibolo kabili alibombelapo ku kulenga ubumi bwakwe ukumfwana ne fishinte fya kwa Lesa, ali no kwebwa ukuti nafikapo nomba kuti aleya mu butumikishi bwa pa cintubwingi.a Lintu alemba lipoti wakwe uwa mu mulimo wa mwi bala no kutuma, lipoti wakwe akalembwa pa Icalembwa ca Bukasabankanya ica Cilonganino icikalembwa mwi shina lyakwe. Uyu mupya nomba kuti aletuma lipoti wakwe uwa mibombele ya kucitilo bunte capamo na mamilioni ya bambi ‘ababile cebo ca kwa Lesa’ mu buseko. (Imilimo 13:5) Cikabilishiwa ku cilonganino ukuti nomba ali ni kasabankanya ushabatishiwa.

7, 8. Ni mu nshila nshi umo kasabankanya uushabatishiwa engapeelelwa ukwaafwa kukabilwa mu butumikishi?

⁷ Kasabankanya ushabatishiwa akabila ukwaafwa kwa baeluda na Bena Kristu bambi abakosoka. Ku ca kumwenako, ukulunduluka kwakwe ukwa ku mupashi kwaba mulandu uyo katungulula wakwe uwe Sambililo lya Citabo pa Cilonganino aaba uwasekelela ukwishiba. Kasabankanya mupya kuti pambi acisanga ukuba icakosa ukulanda mu kufumamo cimo mu mulimo wa ku mwinshi no mwinshi. (Imilimo 20:20) E co mu kupalishako kuti atemwa ukupokelela ukwaafwa, ukucilisha nga kufuma kuli uyo uwalemutungulula isambililo mu citabo ca Ukwishiba. Ukwaafwa kubomba ukwa uyo musango kwaliba ukwalinga, pantu Yesu Kristu alipekanishishe abasambi bakwe ku butumikishi.—Marko 6:7-13; Luka 10:1-22.

⁸ Nga ca kuti ubutumikishi bwesu buli no kuba ubufumamo cimo, ukupekanishisha kabela ukusuma kulakabilwa. Muli fyo, aba bakasabankanya babili kuti baikala capamo no kubelesha imipeelele itubululwa mu Ubutumikishi Bwesu Ubwa Bufumu ubwa mweshi no mweshi. Ilyo batendeka umulimo wabo uwa mwi bala, uucililepo ukubelesha pali bene e wingalanda pa mwinshi wa kubalilapo nelyo no wakonkapo. Pa numa ya kuilondolola abene mu nshila ya bucibusa, bakasabankanya bonse babili kuti bayakanamo ukushimikila. Ukubombela capamo mu butumikishi pa milungu inono kuti pambi kwatungulula ku kukwata ifipempu fya kubwelelamo ifishaiwamina nelyo fye ukufumamo amasambililo ya Baibolo aya mu ŋanda mu citabo ca Ukwishiba Uko Kutungulula ku Mweo wa Muyayaya. Kasabankanya uucililepo ukubelesha kuti pambi atungulula isambililo pa nshita inono kabili lyene ukulipeela kuli kabilisha wa Bufumu umupya. Fintu aba bakasabankanya bonse babili bakaba aba nsansa nga ca kuti umusambi wa Baibolo alanga ukuti aletesekesha ukwishiba Lesa!

9. Kutantika nshi kubako lintu kasabankanya alefwaya ukubatishiwa?

⁹ Ilyo kasabankanya uushabatishiwa alelunduluka lwa ku mupashi, kuti pambi aipeela kuli Lesa mwi pepo no kufwaya ukubatishiwa. (Linganyako Marko 1:9-11.) Uku kufwaisha kwa kubatishiwa alingile ukukwishibisha kuli kangalila wa kutangilila uwa cilonganino, uuli no kutantika ukuti baeluda bapituluke no yu kasabankanya ifipusho fya mu citabo ca Abateyanishiwa ku Kupwilikisha Ubutumikishi Bwesu pa mabula 175 ukufika ku 218. Shilya mbali shine umwayakanishiwa ifipusho kuti shayakanishiwa pa kuti shikapitulukwemo mu kukumana kutatu na baeluda batatu abapusanapusana nga cingacitika. Nga ca kuti basumina ukuti kasabankanya uushabatishiwa naumfwikisha ifisambilisho fya Baibolo mu kulinga kabili nafikapo na mu nshila shimbi, bakamwebe fyo kuti abatishiwa. Pa mulandu wa kuipeela kwakwe no kubatishiwa, ‘alashilwa akashilwa’ ka kupusunsuka.—Esekiele 9:4-6.

Ifya Kubomba no Kukabila Kwaibela

10. Pa numa ya kupwisha ukusambilila icitabo ca Ukwishiba no kubatishiwa abatishiwa, ni shani fintu umuntu engengilishako ukwishiba kwakwe ifya mu Malembo?

¹⁰ Pa numa uyu muntu abe napwisha isambililo lya Baibolo mu citabo ca Ukwishiba kabili nabatishiwa, te kuti cibe icakabilwa ukumutungulula isambililo mu citabo ca cibili, pamo nga icitabo ca Abaikatana mu Kupepa Lesa Umo Eka Uwa Cine.b Kwena, uyo uubatishiwe nomba line akasambilila ifyafulilako ilyo alepekanishisha ukulongana kwa Bwina Kristu no kusangwako lyonse fye. Na kabili akanonka ukwishiba kwalundwapo ilyo icilaka cakwe ica kufwaya icine cilemusesesha ku kubelenga no kusambilila impapulo sha Bwina Kristu pa lwakwe no kulanshanya imilandu ya mu Malembo na basumina banankwe. Lelo ni shani nga ca kuti kwaimako ukukabila kwaibela?

11. (a) Ni shani fintu Apolo ayafwiwe kuli Priskila na Akula? (b) Kwaafwa nshi kwingapeelwa ku mulumendo nelyo umukashana uwabatishiwe nomba line uulefwaya ukwingila mu cupo?

¹¹ Nelyo fye ni Apolo, uwali “uwa maka mu kwishiba amalembo” no kusambilisha no mucetekanya ulwa kwa Yesu, alinonkelemo lintu Abena Kristu babelesha Priskila na Akula “[bamubuulile] bamutwele ku mwabo no kumukolobondelamo Inshila ya kwa Lesa ukwa kushikimikisho kucilamo.” (Imilimo 18:24-26; linganyako Imilimo 19:1-7.) Kanshi, tutile umulumendo nelyo umukashana uwabatishiwe nomba line alelanguluka ukwishisha no kwingila mu cupo. Umwina Kristu wacilapo ukubelesha kuti amwaafwa ukusanga ifyebo ukukuma kuli iyi milandu mu mpapulo sha Watch Tower. Ku ca kumwenako, ifyebo fya kwaafwa pa lwa uyu mulandu e mo fyaba mu citabo ca Ifipusho Abacaice Bepusha—Ifyasuko Fibomba, Iciputulwa 7.c Kasabankanya uwalemutungulula isambililo lya Baibolo pambi e wingalanshanya ifi fyebo no yu mupya, nangula ca kuti te kuti mubimbwe isambililo lya lyonse.

12. Kwaafwa nshi pambi kwingapeelwa ku baupana ababatishiwe nomba line abakwete amafya?

¹² Languluka ica kumwenako na cimbi. Napamo abaupana babili ababatishiwe nomba line balecisanga icakosa ukubomfya ifishinte fya bukapepa. Kuti baipusha ukupandwa amano kuli eluda, uyo uwingapoosako ifyungulo bushiku fimo fimo ukulanshanya Amalembo na bene no kubatwala ku fyebo fisangwa mu mpapulo sha Watch Tower. Nangu cibe fyo, uyu eluda takatendeke isambililo lya Baibolo ilya lyonse na ba baupana.

Nga ca Kuti Umupya Atena

13. Mulandu nshi baeluda ba mu cilonganino balingile ukubelelo luse uwabatishiwe nomba line uwatena lelo nalapila?

¹³ Baeluda bapashanya Umucemi Wakulisha, Yehova, uusoso kuti: “Ine nkalacemo mukuni wandi, . . . ne yafunika nkakakako, ne yalwala nkakosha.” (Esekiele 34:15, 16; Abena Efese 5:1) Mu kumfwana ne yo mibele ya mutima, umusambi Yuda acincishe ukuti Abena Kristu basubwa abaaletwishika nelyo abawilile mu lubembu babelelwe uluse. (Yuda 22, 23) Apantu twenekela ifyafulilako ukufuma ku Bena Kristu babelesha kabili ico calilungama, mu kushininkisha umuntu wabatishiwa umupya uwatena lelo alapila, uuli fye kana ka mpaanga, alingile ukubelelwo luse. (Luka 12:48; 15:1-7) Baeluda, ‘abapingwila Yehova,’ muli fyo bapeela impaanga ya musango yo ukusakamana kwabondoka no kuipuupuutula no mutima uwanakilila.—2 Imilandu 19:6; Imilimo 20:28, 29; Abena Galatia 6:1.d

14. Cinshi cingacitwa lintu kasabankanya uwabatishiwe nomba line acito lubembu lwabipisha, kabili ni shani fintu engaafwiwa?

¹⁴ Tutile, lyene, kasabankanya uwabatishiwe nomba line uyo kale uwakwete ubwafya no kunwensha kabili apusumukila mu kunwensha na kabili pa kashita kamo nelyo tubili. Nelyo tutile alicimfishe icibelesho cakokwesha ica kupeepa fwaka lelo aumfwe cilaka ca kupeepa kabili mu bumfisolo apeepa akashita kamo nelyo tubili. Nangu ca kuti munyinefwe umupya alipepa ukuti Yehova amubelele uluse, alingile ukulomba ukwaafwa kwa kwa eluda umo pa kuti ulubembu talusangwike cibelesho. (Ilumbo 32:1-5; Yakobo 5:14, 15) Lintu asosa icilubo cakwe kuli umo uwa baeluda, uyo eluda alingile ukwesha ukupuupuutula uyu mupya mu nshila yabamo inkumbu. (Ilumbo 130:3) Ukufunda kwa mu Malembo kuti kwaba ukwakumanina mu kumwaafwa ukutambalike nshila sha kwendamo amakasa yakwe ku ntanshi. (AbaHebere 12:12, 13) Uyu eluda ali no kulanshanya imibele na kangalila wa kutangilila uwa mu cilonganino ku kumona umusango wa kwaafwa kwalundwapo ukulingile ukupeelwa.

15. Cinshi cingacitwa, mu milandu imo imo lintu uwabatishiwe nomba line abembuka?

¹⁵ Mu milandu imo imo kuti kwaba ifyafulilako ifingakabilwa. Nga ca kuti umulandu nawishibikwa ku bengi, kuliko ubusanso ku mukuni, nelyo amafya yambi ayabipisha nayabimbwamo, ibumba lya baeluda kuti lyaeba baeluda babili ukufwailisha umulandu. Nga ca kuti aba baeluda basanga ukuti umulandu naubipisha ica kuti komiti wa bupingushi alekabilwa, balingile ukuleta lipoti kwi bumba lya baeluda. Ibumba lya baeluda lyene lili no kusonta komiti wa bupingushi ku kwaafwa uulufyenye. Komiti wa bupingushi alingile ukubomba nankwe mu nshila yabondoka. Balingile ukwesha ukumupuupuutula ukupitila mu kubomfya Amalembo. Nga ca kuti ayankulako bwino ku kubombesha kwa cikuuku ukwa komiti wa bupingushi, lyene kuti bapima nampo nga kuti caba bwino ukuleka ukumubomfya mu mbali sha pa cisebele ku kulongana kwa ku Ŋanda ya Bufumu nelyo nga kuti asuminishiwa ukulayasukapo pa kulongana.

16. Cinshi baeluda bengacita ku kwaafwa uulufyenye?

¹⁶ Nga ca kuti uwalufyenye ayankulako bwino, eluda umo nelyo babili ababombele muli komiti wa bupingushi kuti batantika ukulamucema ukupitila mu fipempu fya bucemi mu kuba ne mifwaile ya kusumbamo icitetekelo cakwe no kukuulilila ukutesekesha kwakwe ukwa fipimo fya kwa Lesa ifyalungama. Umo na umo uwa aba baeluda napamo kuti abomba nankwe mu butumikishi bwa mwi bala mu nshita mu nshita. Kuti balelanshanya nankwe ukushimpa ukulanshanya mu Malembo, napamo ukubomfya ifipande fyalinga ifya mu Ulupungu lwa kwa Kalinda na Loleni! lelo te kwimika isambililo lya Baibolo ilya lyonse. Ukwaafwa kwabondoka ukwa musango yo, kuti kwakosha uwa cilubo ukucincintila amabunake ya mubili ku ntanshi.

17. Cinshi cicitwa nga ca kuti kacita wa fibi uwabatishiwa talapiile no kusha inshila yakwe iya lubembu?

¹⁷ Kwena, ukuba umupya mu lubatisho tacili e mwa kulesesha ku kucita ulubembu no kukanalapila. (AbaHebere 10:26, 27; Yuda 4) Nga ca kuti kacita wa fibi uwabatishiwa uuli onse talapile kabili atwalilila mu nshila yakwe iya lubembu, ali no kutamfiwa ukufuma mu cilonganino. (1 Abena Korinti 5:6, 11-13; 2 Abena Tesalonika 2:11, 12; 2 Yohane 9-11) Lintu ukubombapo kwa musango yu kwamoneko kwakabilwa, ibumba lya baeluda bakasala komiti wa bupingushi. Nga ca kuti kwaba ukutamfya, kuti kwaba ukubilisha kwakonkapo ukwipi: “Kantwa natamfiwa.”e

Baafweni “Ukulola ku Bukalamba”

18. Mulandu nshi twingabela abashininkisha ukuti Abena Kristu ababatishiwa abapya na bambi lyonse bakalaba ne fingi ifya kusambilila pa lwa kwa Yehova no kufwaya kwakwe?

¹⁸ Icinabwingi cikalamba ica babomfi ba kwa Lesa bakekalilila mu mukuni. Ica kulenge nsansa, na cimbi ca kuti, ifwe bonse tukaba na maka ya kutwalilila ukupalamina kuli Shifwe wa mu muulu pantu lyonse tukalaba na maka ya kusambilila ifyafulilako pa lwa wene no kufwaya kwakwe. (Lukala Milandu 3:11; Yakobo 4:8) Amakana ya bantu ababatishiwe pa Pentekoste mu 33 C.E. mu cine cine kwali ifingi ifyo baali no kusambilila. (Imilimo 2:5, 37-41; 4:4) E fyo cali na ku Bena fyalo, abashaishibe Amalembo ukutula ku bwaice bwabo. Ku ca kumwenako, e fintu cali kuli balya babatishiwe pa numa ye lyashi lya kwa Paulo pa Areopagi mu Atena. (Imilimo 17:33, 34) Ilelo, nalyo line, kwaliba ifyafulilako ifyo ababatishiwa abapya bakabila ukusambilila kabili bakabila inshita no kwaafwa ukukosha ukupingulapo kwabo ukwa kutwalilila ukucite calungama mu menso ya kwa Lesa.—Abena Galatia 6:9; 2 Abena Tesalonika 3:13.

19. Ni shani fintu abo babatishiwa bengaafwiwa “ukulola ku bukalamba”?

¹⁹ Cila mwaka amakana ya bantu balabatishiwa kabili bakabila ukwaafwa pa kuti bengatwalilila “ukulola ku bukalamba.” (AbaHebere 6:1-3) Ukupitila mu cebo, ica kumwenapo, no kubapeela ukwaafwa kubomba ukwa mu butumikishi, kuti pambi mwaba na maka ya kwaafwa bamo ukufwala ubuntu bupya no kutwalilila ‘ukulaenda mu Cine.’ (3 Yohane 4; Abena Kolose 3:9, 10) Nga ca kuti uli kasabankanya wabelesha, baeluda pambi bakakulaalika ukwaafwa uwasumina munobe umupya mu mulimo wa mwi bala nelyo ukulanshanya ifishinka fimo ifya mu Malembo na wene pa milungu inono pa kuti icitetekelo cakwe muli Lesa cingakoshiwa, no kukosha ukutesekesha kwakwe ukwa kulongana kwa Bwina Kristu, na fimbipo. Ukwampana kwa bacemi ne mpaanga kwapala wishi ilyo alekonkomesha na mu kunakililila kwapala nyina. (1 Abena Tesalonika 2:7, 8, 11) Lelo, baeluda abanono fye na babomfi batumikila te kuti basakamane fyonse fye ifikabilwa mu cilonganino. Ifwe bonse twaba ngo lupwa ulo ifilundwa fya luko fyafwana. Umo na umo uwa ifwe kuti acitapo cimo mu kwaafwa bakapepa banensu. Iwe wine kuti pambi waba na maka ya kukoselesha, ukusansamusha abapopomenwa, no kwafwilisha abanaka.—1 Abena Tesalonika 5:14, 15.

20. Cinshi wingacita ku kusalanganya ukwishiba Lesa no kupayanishisha impaanga sha bucemi bwa kwa Yehova ukusakamana kwabondoka?

²⁰ Umutundu wa muntu ulekabila ukwishiba Lesa, kabili pamo nge Nte ya kwa Yehova, kuti wakwata ukwakanamo kwa nsansa mu kusalanganya uku kwishiba. Impaanga sha kwa Lesa shikabila ukusakamana kwabondoka, kabili kuti wasangwilako mu nshila yabamo ukutemwa ku kwaafwa ukupayanya uku kusakamana. Shi Yehova napaale ubutumikishi bobe, kabili shi nakulambule pa kubombesha kobe ukwa kufuma ku mutima mu kwaafwa impaanga sha bucemi bwakwe.

[Amafutunoti]

Ni Shani Fintu Wingaasuka?

◻ Ni shani fintu Yehova asunga impaanga shakwe?

◻ Cinshi cicitwa nga ca kuti umupya alefwaya ukutampa ukushimikila?

◻ Ni shani fintu abasumina banabo bengaafwa abapya abali no kukabila kwaibela?

◻ Kwaafwa nshi uko baeluda bapeela kuli abo abatena lelo abalapila?

◻ Ni shani fintu wingaafwa uwabatishiwe umupya “ukulola ku bukalamba”?

[Icikope pe bula 16]

Charles T. Russell aali uwalumbuka pa kuba umucemi wakwato kutemwa uwa mukuni

[Icikope pe bula 18]

Abacemi ba cililishi basunga umukuni wa kwa Lesa mu kubondoka