ICIPANDWA 8
Ababila Imbila Nsuma
YEHOVA alitupeela Umwana wakwe Yesu Kristu uo tufwile ukulapashanya. (1 Pet. 2:21) Umuntu nga aba umusambi wa kwa Yesu, alatendeka ukubila imbila nsuma. Pa kulangilila ukutila umuntu kuti aba ne nsansa ilyo alebombako uyu mulimo, Yesu atile: “Iseni kuli ine imwe bonse mwe balecula kabili abafininwa, na ine nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya, e lyo mwalasanga ukutuusha.” (Mat. 11:28, 29) Ala ifi fine e fyo ciba nga ca kuti umuntu acita ifyo Yesu alandile!
2 Apo Yesu e Mubomfi Mukalamba uwa kwa Lesa, alitile abantu bamo ukuti babe abasambi bakwe. (Mat. 9:9; Yoh. 1:43) Alibasambilishe ifya kubomba umulimo wa kubila imbila nsuma kabili alibatumine ukuya mu kubomba uyu mulimo uo na o alebomba. (Mat. 10:1–11:1; 20:28; Luka 4:43) Pa numa, alitumine abasambi na bambi 70 ukuya mu kubomba umulimo wa kubila imbila nsuma iya Bufumu bwa kwa Lesa. (Luka 10:1, 8-11) Ilyo Yesu atumine aba abasambi, abebele ati: “Uwaumfwa kuli imwe, ninshi aumfwa na kuli ine. No wasuula imwe, ninshi asuula na ine. Kabili uwasuula ine, ninshi asuula no wantumine.” (Luka 10:16) Aya mashiwi ayo Yesu abebele yalelangilila ukuti umulimo abapeele wali uwacindama. Baali no kulalandilako Yesu na Lesa Uwapulamo! Ifi fine e fyo ciba na muno nshiku kuli bonse abakonka amashiwi ya kwa Yesu aya kuti: ‘Iseni mube abasambi bandi.’ (Luka 18:22; 2 Kor. 2:17) Bonse abakonka aya mashiwi bafwile ukulabomba umulimo wa kwa Lesa uwa kubila imbila nsuma iya Bufumu no kupanga abasambi.—Mat. 24:14; 28:19, 20.
3 Ukumfwila filya Yesu alandile ukuti tulemukonka, kwalilenga ‘twaishiba’ Yehova Lesa na Yesu Kristu wine. (Yoh. 17:3) Twalisambilila ifyo Yehova afwaya. Apo alatwafwa, twalyalula amatontonkanyo yesu, twalifwala ubuntu bupya kabili tulacita ifintu ukulingana na mafunde ayalungama aya kwa Yehova. (Rom. 12:1, 2; Efes. 4:22-24; Kol. 3:9, 10) Ukulatasha sana pa fyo Yehova atucitila, kwalilenga twaipeela kuli ena no kubatishiwa. Nga twabatishiwa, e lyo tuba ababomfi ba kwa Lesa abo asala.
4 Tufwile ukulaibukisha ukuti ilyo tulebombela Lesa tufwile ukuba aba kaele no kuba no mutima uwasanguluka. (Amalu. 24:3, 4; Esa. 52:11; 2 Kor. 6:14–7:1) Apo twalitetekela Yesu Kristu, twalikwata kampingu iyasanguluka. (Heb. 10:19-23, 35, 36; Ukus. 7:9, 10, 14) Umutumwa Paulo aebele Abena Kristu ukulacita fyonse ku kucindika Lesa te kulapunwisha abantu. Umutumwa Petro alilandile pa fyo cawamina ukuba ne mibele iisuma nga tulefwaya ukuti abashili ba Nte basambilile icine. (1 Kor. 10:31, 33; 1 Pet. 3:1) Kuti mwacita shani pa kuti mwafwe umuntu ukufikapo ukuba kabila wa mbila nsuma?
BAKASABANKANYA ABAPYA
5 Lilya line fye mwatendeka ukusambilisha umuntu Baibolo, mulingile no kulamukoselesha ukulaebako abantu ifyo alesambilila. Kuti ale-ebako balupwa lwakwe, ifibusa fyakwe, abo abomba nabo, e lyo na bantu bambi ilyo baleshimika fye ilyashi. Ukucita ifi kwalicindama pantu ninshi tulesambilisha abapya ukuba abasambi ba kwa Yesu Kristu kabili bakabila ba mbila nsuma. (Mat. 9:9; Luka 6:40) Umupya nga alelunduluka mu fya kwa Lesa, aleshimikilako na bambi ifyo alesambilila, ukwabula no kutwishika akalafwaisha ukulabombako umulimo wa kubila imbila nsuma.
UKUFIKA PA FIFWAIKWA
6 Ilyo mushilatendeka ukuya no musambi mu kubila imbila nsuma ku ng’anda ne ng’anda, mufwile ukushininkisha ukuti nafika pa fifwaikwa ifya kuba kasabankanya. Umusambi nga aya na ifwe mu kushimikila, cilangililo ca kuti alefwaisha ukuba Inte ya kwa Yehova. Nangu ca kuti tabalamubilisha ukuti ni kasabankanya, pali iyi nshita ninshi alitendeka ukukonka amafunde ya kwa Yehova ayalungama kabili kuti alinga ukuba kasabankanya uushabatishiwa.
7 Nga mulasambilisha umuntu no kulanshanya nankwe ifyo Baibolo yalanda, nalimo mwalishiba ifyo aba. Nalimo mwalimona no kuti alakonka ifyo asambilila. Lelo kwaliba fimo ifyo baeluda bafwaya ukwishiba pa musambi ifyo bengatemwa ukulanshanya nenu capamo no musambi wenu, ilyo mushilatendeka ukuya nankwe mu kushimikila.
8 Kampanya we bumba lya baeluda akeba baeluda babili (umo afwile ukuba wa muli komiti ya mulimo) abalingile ukulanshanya nenu e lyo no musambi wenu. Mu filonganino umwaba baeluda abanono sana, eluda kuti abombela pamo no mubomfi utumikila uwingafikapo ukubomba uyu mulimo. Bamunyinefwe abo kampanya asalile bafwile ukubomba uyu mulimo bwangu bwangu. Na kuba, nga ca kuti babeba ukuti umusambi wenu alefwaisha ukuba kasabankanya ilyo muli pa kulongana, nalimo kuti balanshanya nenu no musambi wenu pa numa fye ya kulongana. Baeluda bafwile ukalanshanya bwino no musambi pa kuti tomfwile umwenso. Ilyo umusambi tabalamusuminisha ukuba kasabankanya uushabatishiwa, baeluda bafwile ukushininkisha ukuti:
(1) Alisumina ukuti Baibolo Cebo ca kwa Lesa. —2 Tim. 3:16.
(2) Alishiba no kusumina mu masambililo ya kutendekelako aya mu Baibolo ica kuti nga bamwipusha, akasuka ukulingana ne fyo Baibolo isambilisha te kulingana ne fyo imipepele ya bufi isambilisha nelyo ifyo umwine atontonkanya.—Mat. 7:21-23; 2 Tim. 2:15.
(3) Alakonka ifunde lya mu Baibolo ilya kulongana pamo na bantu ba kwa Yehova nga kuti akumanisha ukucita ifyo.—Amalu. 122:1; Heb. 10:24, 25.
(4) Alishiba ifyo Baibolo isambilisha pa bulalelale, umwaba no kucita ubucende, ukuupa impali, ukulaalana kwa baume nelyo abanakashi beka beka. Afwile no kulataluka kuli ifi fintu. Nga ca kuti alyupa nelyo alyuupwa, afwile ukuupa nelyo ukuupwa ukulingana ne funde.—Mat. 19:9; 1 Kor. 6:9, 10; 1 Tim. 3:2, 12; Heb. 13:4.
(5) Alakonka ifunde lya mu Baibolo ilya kukanaba cakolwa kabili tabomfya imiti icibomfye bomfye.—2 Kor. 7:1; Efes. 5:18; 1 Pet. 4:3, 4.
(6) Alishiba ububi bwaba mu kwangala na baba ne mibele yabipa.—1 Kor. 15:33.
(7) Alifuma mu mipepele ya bufi iyo alepepamo kale, kabili tabombako nelyo ukutungilila imilimo yabo.—2 Kor. 6:14-18; Ukus. 18:4.
(8) Taitumpa mu fikansa fya calo.—Yoh. 6:15; 15:19; Yako. 1:27.
(9) Alisumina kabili alakonka ifyo Baibolo yalanda pe lembo lya kwa Esaya 2:4 ililanda pa kukanaitumpa mu fya calo.
(10) Alefwaisha ukuba Inte ya kwa Yehova.—Amalu. 110:3.
9 Nga ca kuti ilyo baeluda balelanshanya no musambi tabeshibe bwino ifyo atontonkanya pali fimo ifyo tulandilepo pa muulu, bafwile ukumwipusha amepusho ayengalenga baishiba ifyo atontonkanyapo, kabili nalimo kuti balanshanya nankwe amalembo ayali pali ifyo fishinka. Calicindama sana umusambi ukwishiba ukuti, abashimikila ne Nte sha kwa Yehova bafwile ukulakonka ifyo Amalembo yalanda pa fyo tulandilepo pa muulu. Ifyo aleasuka fikalenga baeluda ukwishiba nga ca kuti umusambi naishiba ifyo afwile ukucita kabili nga nalinga ukuba kasabankanya.
10 Baeluda bafwile ukweba umusambi bwangu bwangu nga nafikapo ukuba kasabankanya nelyo iyo. Ilingi line beba umusambi pa numa fye ya kulanshanya nankwe. Nga nafikapo, baeluda balingile ukumutasha pa kufikapo ukuba kasabankanya wa mbila nsuma. (Rom. 15:7) Bafwile ukumukoselesha ukutendeka ukushimikila ilyo line fye, kabili bafwile ukumweba no kuti akatume lipoti ya mulimo wa mwi bala pa mpela ya mweshi. Bafwile no kumweba ukuti nga atuma lipoti e lyo bakamulembela Icalembwa ca Bukasabankanya ica Cilonganino kabili bakacisungila pamo ne fyalembwa fimbi ifya cilonganino. Baeluda balapoka ifyebo kuli bakasabankanya no kufilemba pa Icalembwa ca Bukasabankanya ica Cilonganino pa kuti icilonganino cilefibomfya pa kutungulula imilimo Inte sha kwa Yehova babomba mwi sonde lyonse, na pa kuti bakasabankanya balebombako iyi milimo ya kwa Lesa, kabili balebafwa mu fya kwa Lesa. Na kabili baeluda kuti bacinkulako bakasabankanya abapya ukuti ifyebo bapoka kuli bena bafibomfya ukulingana na mafunde ya Global Data Protection Policy of Jehovah’s Witnesses ayo balemba pa jw.org.
11 Nga twaishiba bwino kasabankanya umupya kabili tulelanga ukuti natutemwa ifyo alelunduluka mu fya kwa Lesa, kuti alabomba bwino, kabili kuti alabombesha mu mulimo wa kwa Yehova no kulatuma lipoti ya mulimo wa mwi bala cila mweshi.—Fil. 2:4; Heb. 13:2.
12 Baeluda nga bamona ukuti umusambi nafikapo ukulashimikilako abantu imbila nsuma, bafwile ukumupeela icitabo ca kuti Abateyanishiwa ku Kucita Ukufwaya kwa kwa Yehova. Nga atuma lipoti ya mulimo wa mwi bala iya kubalilapo, baeluda bafwile ukubilisha mu kwipifya ku cilonganino ukuti ni kasabankanya uushabatishiwa.
UKWAFWA ABANA ABANONO
13 Abana abanono nabo kuti bafikapo ukuba bakabila ba mbila nsuma. Yesu alipokelele abana abanono kabili alibapaalile. (Mat. 19:13-15; 21:15, 16) Nangu ca kuti abafyashi e bafwile ukusambilisha abana babo, aba mu cilonganino kuti ba-afwa abana abanono abalefwaisha ukulabombako umulimo wa kubila imbila nsuma ya Bufumu. Nga muli bafyashi, mufwile ukuba abacincila mu mulimo wa kusambilisha abantu icine, pa kuti abana benu balemupashanya ukubombesha mu mulimo wa kwa Lesa. Finshi mwingacita nga ca kuti umwana wenu aliba ne mibele iisuma kabili alefwaisha ukulabombako umulimo wa kubila imbila nsuma?
14 Abafyashi bafwile ukweba eluda uwaba muli Komiti ya Mulimo iya Cilonganino. Lyena kampanya we bumba lya baeluda akeba baeluda babili (umo pali aba afwile ukuba muli komiti ya mulimo) ukuti bakalanshanye no mwana na bafyashi bakwe ba Nte nelyo bambi abamusunga nga ni ba Nte, pa kuti bakamone nga ca kuti umwana nafikapo ukuba kasabankanya. Nga ca kuti umwana alishiba amasambililo ya kutendekelako aya mu Baibolo, kabili alecita ne filelanga ukuti alefwaisha ukulashimikilako bambi imbila nsuma, cilangililo ca kuti alelunduluka. Pa numa ya kulanshanya pali ifi, e lyo na fimo ifyo balanshanya na bakalamba abalefwaya ukuba bakasabankanya, baeluda babili kuti bamona nga ca kuti umwana nafikapo ukuba kasabankanya uushabatishiwa. (Luka 6:45; Rom. 10:10) Ilyo mulelanshanya no mwana, tamufwile ukumwipusha amepusho yamo ayashimukumine ayo mwingepusha fye abakalamba.
15 Ilyo baeluda balelanshanya no mwana, bafwile ukumutasha pa fyo alelunduluka kabili bafwile no kumukoselesha ukuti aletontonkanya pa kubatishiwa. Baeluda bafwile no kutasha abafyashi pa fyo babombesha ukusambilisha umwana wabo icine. Pa kuti abafyashi batwalilile ukwafwa umwana wabo, baeluda bafwile ukubeba ukuti bakabelenge pa mutwe utila, “Ifyebo ku Bafyashi Abena Kristu,” pe bula 179 ukufika kwi bula 181 muli cino cine citabo.
UKUIPEELA NO KUBATISHIWA
16 Nga ca kuti mwalimwishiba Yehova, mwalimutemwa no kumutemwa, mulakonka ne fyo afwaya kabili nga mulabila ne mbila nsuma, mulingile ukuipeela kuli Yehova kabili mulingile ukubatishiwa.—Mat. 28:19, 20.
17 Ukuipeela cilangililo ca kuti umuntu nasalapo ukulabomba umulimo washila. Ukuipeela kuli Lesa cipilibula ukupepa kuli ena no kumulaya ukuti mwakulamubombela no kulacita ifyo afwaya. Nga mwacita ifi ninshi cilepilibula ukuti e o mwakulapepa fye eka mpaka ne mfwa. (Amala. 5:9) Takuli nangu umo uwingamupepelako kuli Yehova pa kuti muipeele, mwe bene ni mwe mufwile fye ukupepa.
18 Lelo kuli na fimbi ifyo mulingile ukucita, te kupelela fye pa kweba Yehova ukuti mulefwaya ukulamubombela. Mulingile no kulanga abantu ukuti namuipeela kuli Lesa. Kuti mwalanga ukuti mwali-ipeela nga mwabatishiwa mu menshi nga filya fine Yesu acitile. (1 Pet. 2:21; 3:21) Cinshi mufwile ukucita nga ca kuti namupingulapo ukulabombela Yehova kabili mulefwaya no kubatishiwa? Mufwile ukweba kampanya we bumba lya baeluda. Lyena akapekanya ukuti baeluda babili bakalanshanye na imwe pa kuti bakeshibe nga ca kuti namufikapo ukubatishiwa. Nga mulefwaya ukwishibilapo na fimbi, moneni umutwe uleti, “Kuli Kasabankanya Uushabatishiwa,” pe bula 182 ukufika pe bula 184 muli cino cine citabo, e lyo na “Amepusho ku Balefwaya Ukubatishiwa,” pe bula 185 ukufika pe bula 207.
LIPOTI YA FYO UMULIMO UBOMBWA
19 Pa myaka iingi, abantu ba kwa Yehova balatemwa ukumfwa lipoti pa fyo ukupepa kwasanguluka kulekulilako mwi sonde lyonse. Ukutula ilyo Yesu Kristu aebele abasambi bakwe ukuti imbila nsuma ikabilwa mwi sonde lyonse, Abena Kristu ba cine balafwaisha ukwishiba ifyo amashiwi alandile yakafikilishiwa.—Mat. 28:19, 20; Marko 13:10; Imil. 1:8.
20 Abasambi ba kubalilapo aba kwa Yesu baletemwa sana ukumfwa amalipoti ya fyo umulimo wa kubila imbila nsuma wale-enda bwino. (Marko 6:30) Ibuuku lya mu Baibolo ilya Imilimo lilanda ukuti umupashi wa mushilo walipongolwelwe pa basambi abali nalimo 120 pa Pentekoste mu mwaka wa 33. Tapakokwele abasambi balifuliileko, bafikile nalimo 3,000, lyena mu kupita kwa nshita bafikile nalimo 5,000. Baibolo itila, ‘Yehova cila bushiku atwalilile ukulunda kwi bumba lyabalepusuka’ kabili “bashimapepo abengi balitetekele.” (Imil. 1:15; 2:5-11, 41, 47; 4:4; 6:7) Uku kulunduluka kufwile kwalikoseshe abasambi! Ala aya malipoti ya fyo umulimo walebombwa bwino yafwile yalilengele abasambi ukutwalilila ukubomba umulimo wa kwa Lesa, nangu ca kuti bashimapepo abaYuda balebacusha sana!
21 Muli kalata iyo Paulo alembeele abena Kolose, nalimo mu mwaka wa 60 nelyo 61 ninshi Yesu alibwelelamo ku muulu, alandile ukuti imbila nsuma ‘yaletwala ifisabo kabili yalisalanganine pano calo ponse,’ kabili “yabililwe ku cibumbwa conse ica mwi samba lya muulu.” (Kol. 1:5, 6, 23) Abena Kristu ba kubalilapo balyumfwilile Icebo ca kwa Lesa, kabili umupashi wa mushilo walibafwile ukubombesha mu mulimo wa kubila imbila nsuma ilyo Yerusalemu ishilaonaulwa mu mwaka wa 70 ninshi Yesu alibwelelamo ku muulu. Ala balya Abena Kristu abali aba cishinka baletemwa nga nshi ukumfwa amalipoti ya fyo umulimo wa kubila imbila nsuma walebombwa!
Bushe mwalibika amano ku kubila imbila nsuma ilyo impela ishilaisa?
22 Na muno nshiku mwine, icilonganino ca kwa Yehova cilasunga ifyalembwa pa fyo umulimo wa kubila imbila nsuma ulebombwa ku kufikilisha amashiwi yaba pali Mateo 24:14, ayatila: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” Apo tuli babomfi ba kwa Lesa abaipeela, twalikwata umulimo uo tufwile ukubomba mukwangufyanya. Kanshi tufwile ukulabila sana imbila nsuma ilyo impela ishilaisa. Yehova akashininkisha ukuti uyu mulimo onse wabombwa, kabili nga tulebombako akatupaala.—Esek. 3:18-21.
LIPOTI YENU IYA MULIMO WA MWI BALA
23 Finshi ifyo mulingile ukulemba pali lipoti yenu? Pa kapepala tulembapo lipoti ako icilonganino ca kwa Lesa capekanya e paba ifyo tulingile ukulemba. Lelo ifyebo fyakonkapo kuti fyamwafwa ukwishiba ifya kulemba lipoti.
24 Mu mukululo utila “Impapulo Mwapeele Abantu (Ishapulintwa ne sha pa Kompyuta),” e mo mufwile ukulemba impapulo shonse isho mwapeele abantu abashili ba Nte, nampo nga shintu shapulintwa nelyo isho mwabatumiine ukubomfya kompyuta, tabuleti nelyo foni. Lyena mu mukululo utila “Amavidio Mwatambishe,” e mo mufwile ukulemba imiku mwatambishe abantu vidio nelyo amavidio ayo icilonganino cesu capanga.
25 Pa kulemba “Ifipempu fya Kubwelelamo,” lembeni imiku mwabwelele ku muntu uushili Nte uwatemenwe ifyo mwalanshenye nankwe umuku wa fumineko. Kuti mwapenda icipempu ca kubwelelamo nga mwabwelela ku muntu mwalanshenye nankwe, nga mwamulembela kalata, nga mwamutumina foni, nga mwamutumina meseji ya pa foni nelyo iya pa kompyuta, nangu nga mwamutwalila impapulo. Lyonse ilyo mwatungulula isambililo lya Baibolo, kuti mwapenda ne cipempu ca kubwelelamo. Nga ca kuti umufyashi alatungulula amapepo ya lupwa ninshi pali no mwana uushilabatishiwa, kuti alependa icipempu ca kubwelelamo cimo cila mulungu.
26 Nangu ca kuti mulasambilisha umuntu Baibolo cila mulungu, pa mpela ya mweshi mufwile ukulemba pali lipoti ukuti mwatungulwile fye isambililo limo. Bakasabankanya bafwile ukulemba ubwingi bwa masambililo ya Baibolo ayalekanalekana ayo batungulwile mu mweshi. Mufwile ukucita lipoti amasambililo ya Baibolo ayo mutungulula ku bashili ba Nte. Kuti mwacita lipoti ne sambililo lya Baibolo ilyo mutungulula kuli munyinefwe nelyo nkashi uwaleka ukushimikila nga ca kuti uwaba muli komiti ya mulimo amweba ukulatungulula, nelyo nga mulesambilisha uwabatishiwe nomba line uushilapwisha ukusambilila icitabo citila Kuti Mwaba ne Nsansa Umuyayaya!.
27 Mufwile ukucita lipoti “Ama-awala” yalya yene fye mwabombele mu mulimo wa kubila imbila nsuma. Ilingi line aya ma-awala yantu mwabombele ilyo mwaleshimikila ku ng’anda ne ng’anda, ilyo mwalecita ifipempu fya kubwelelamo, ilyo mwaletungulula amasambililo ya Baibolo, na lintu mwaleshimikila abashili ba Nte ukubomfya inshila shimbi, ukubikako fye no bunte bwa mu lyashi. Nga ca kuti bakasabankanya babili balebombela pamo, bonse kuti bapenda inshita, lelo umwine we sambililo e ufwile ukupenda icipempu ca kubwelelamo nelyo isambililo lya Baibolo ilyo batungulula. Abafyashi bonse babili nga balesambilishako abana babo pa Mapepo ya Lupwa, bonse kuti bapenda iawala limo cila mulungu. Munyinefwe kuti apenda inshita iyo alanda ilyashi lya ku cintubwingi. No ulepilibula ilyashi lya ku cintubwingi na o kuti apenda inshita. Tamufwile ukupenda inshita ilyo muleipekanya ukuya mu mulimo wa mwi bala, ilyo muli pa kukumana kwa kuya mu mulimo wa mwi bala, nelyo ilyo muli mu mulimo wa mwi bala, lelo mulecita ifishikumine umulimo wa kubila imbila nsuma, e lyo ne fyapala ifi.
28 Kasabankanya onse afwile ukubomfya kampingu yakwe iyasambilishiwa na Baibolo ilyo alependa inshita abomba mu mulimo wa mwi bala. Bakasabankanya bamo babombela mu fifulo umwaba abantu abengi, e lyo bambi babombela mu fifulo umo abantu baceepa, kabili balenda intamfu iitali pa kuti bafike kuli ifyo fifulo. Ififulo fya kubombelamo fyalipusanapusana kabili ifyo bakasabankanya babomba umulimo wa kubila na fyo fyalipusanapusana. Ibumba Litungulula talipatikisha icilonganino ca mwi sonde lyonse ukulankonka fye ifyo lifwaya ukuti e fyo tulependa inshita ya mulimo wa mwi bala, kabili talyasonta umuntu nangu umo ukuti e wakulatweba ifyo tulingile ukupenda inshita.—Mat. 6:1; 7:1; 1 Tim. 1:5.
29 Ilyo tulelemba lipoti ya fyo twabombele, tufwile ukulemba fye ama-awala, te mamineti iyo. Kano fye nga ca kuti kasabankanya alefilwa ukubomba bwino pa mulandu wa bukote, ukulwalilila, nelyo nga asungilwa umo basungila abakote nangu abalwalilila, nelyo nga alilemana ica kuti te kuti alebomba sana mu mulimo wa kubila imbila nsuma. Nga caba ifi kasabankanya kuti alemba lipoti mu fiputulwa fya mamineti 15. Ku ca kumwenako, kuti alemba amamineti 15, amamineti 30, amamineti 45, iawala limo, nelyo iawala limo na mamineti 15. Nangu abomba fye amamineti 15 mu mweshi afwile ukulemba lipoti. Bakalamupendela pali bakasabankanya ababomba lyonse. Nangu fye ni kasabankanya uwa kutila te kuti akumanishe ukubombesha mu mulimo wa mwi bala pa nshita iinono, pa mulandu wa kuti nalimo nalwalisha nelyo naicena sana ica kutila te kuti ende ukuya mu kubila imbila nsuma, kuti alemba lipoti mu fiputulwa fya mamineti 15. Kanshi abengalemba fye lipoti ya fiputulwa fya mamineti 15, ni bakasabankanya abashingaba na maka ya kubomba inshita iikalamba mu mulimo wa kubila imbila nsuma. Komiti ya mulimo e isuminisha bakasabankanya abalingile ukulatuma lipoti ya fiputulwa fya mamineti 15.
ICALEMBWA CA BUKASABANKANYA ICA CILONGANINO
30 Cila mweshi, baeluda balalemba ifyo mwabombele pa Calembwa ca Bukasabankanya ica Cilonganino. Ifi ifyalembwa, fya cilonganino. Nga mulekuukila ku cilonganino cimbi, mufwile ukweba baeluda ba mu cilonganino cenu. Kalemba akatuma icalembwa cenu ku cilonganino mwakuukila. Ici cikalenga baeluda ba mu cilonganino mwakuukila bakamusengele kabili bakalemwafwa mu fya kwa Lesa. Nga ca kuti mwafuma mu cilonganino mwaba pa mweshi umo nelyo ibili, mufwile fye ukutwalilila ukutuma lipoti yenu iya mulimo ku cilonganino mwafuma.
ICO TUTUMINA LIPOTI YA MULIMO WA MWI BALA
31 Bushe limo mulalaba ukutuma lipoti yenu iya mulimo wa mwi bala? Kwena limo bonse tulalaba kabili tulatemwa nga batwibukishako. Lelo nga tulebikako amano kabili twaishiba no kuti ukutuma lipoti kwalicindama, cikatwafwa ukulaibukisha ukulemba.
32 Bamo balepusha abati: “Apo Yehova alishiba ifyo momba, mulandu nshi ningile ukutumina lipoti ku cilonganino?” Ca cine Yehova alishiba ifyo tubomba, kabili alishiba nga ca kuti tubomba no mweo onse nelyo iyo. Lelo mwilalaba ukuti, Yehova alilembele inshiku isho Noa aikele mu cibwato ne myaka iyo abena Israele baikele mu matololo. Lesa alilembele impendwa ya bantu abali aba cishinka na bashamumfwilile. Alilembele ifyo abantu bakwe bacimfishe icalo ca Kanaani ne fyo abapingushi ba cishinka mu Israele balecita. Kwena fingi ifyo alembele pa fyo ababomfi bakwe balecita. Filya alelemba ifyalecitika, cilangililo ca kuti Yehova amona ukuti ukusunga ifyalembwa kwalicindama.
33 Ifyalecitika kale ifyalembwa mu Baibolo filangilila ukuti ilyo ababomfi ba kwa Yehova balelemba amalyashi ya mu Baibolo, balelemba impendwa ya bantu nelyo ifintu fimbi mu kulungatika. Amalyashi ayengi ayo Baibolo yalandapo te kuti tuyomfwikishe bwino bwino nga ca kuti abalelemba tabalembele impendwa mu kulungatika. Moneni ifya kumwenako fimo: Ukutendeka 46:27; Ukufuma 12:37; Abapingushi 7:7; 2 Ishamfumu 19:35; 2 Imilandu 14:9-13; Yohane 6:10; 21:11; Imilimo 2:41; 19:19.
34 Nangu ca kuti pa kulemba lipoti tatulemba fyonse ifyo tucita mu mulimo wa kwa Yehova, ukucita lipoti kulafwa sana icilonganino ca kwa Yehova. Inshita imo ilyo abatumwa babwelele ukufuma mu kubila imbila nsuma, baebele Yesu “fyonse ifyo bacitile ne fyo basambilishe.” (Marko 6:30) Limo limo, amalipoti yalalanga ukuti kuli mumo umo tufwile ukuwamyako. Amalipoti kuti yalenga caishibikwa ukuti tulebomba bwino mumo, lelo mumbi tatulebomba bwino. Ku ca kumwenako, kuti limbi bakasabankanya tabalefulilako. Ifi nga e fyo cili, nalimo icingafwa kukoselesha bakasabankanya nelyo ukubombela pa mafya ayali mu cilonganino. Bakangalila bakamona pa fyo amalipoti yali, kabili bakesha na maka ukupwisha amafya ayalelenga ukuti bakasabankanya belabombesha nelyo ifilelenga icilonganino cilalunduluka.
35 Na kabili amalipoti yalalenga icilonganino ca kwa Lesa ukwishiba uko bakabila ba mbila nsuma balefwaikwa sana, yalafwa ukwishiba ififulo umo umulimo ulebombwa bwino, ne fifulo umo ushilebombwa bwino. Yalafwa no kwishiba impapulo ishilefwaikwa pa kwafwa abantu ukusambilila icine. Amalipoti yalalenga icilonganino ca kwa Lesa ukwishiba ubwingi bwa mpapulo ishilefwaikwa mwi sonde lyonse pa kuti balepekanishisha libeela ishi mpapulo.
36 Fwe bengi amalipoti yalatukosha. Ukwabula no kutwishika tulatemwa sana ukumfwa ifyo bamunyinefwe balebombesha mu mulimo wa kubila imbila nsuma mwi sonde lyonse! Amalipoti yalatwafwa ukwishiba ifyo icilonganino ca kwa Yehova cilekula. Ificitika mu mulimo wa kubila imbila nsuma filalenga tulesekelela no kuba abacincila, kabili filalenga tulebombesha muli uyu mulimo. (Imil. 15:3) Kanshi tufwile ukulatuma amalipoti ya mulimo wa mwi bala lyonse. Nga tulecita ifi ninshi tulelanga ukuti twalibika amano ku ba bwananyina aba mwi sonde lyonse, kabili ninshi tulakonka ne fyo icilonganino ca kwa Yehova citweba.—Luka 16:10; Heb. 13:17.
MULEPANGILA LIBEELA IFYO MULEFWAYA UKUBOMBA
37 Tatufwile ukulinganya ifyo tubomba umulimo wa kubila imbila nsuma ku fyo abantu bambi babomba. (Gal. 5:26; 6:4) Ifyo fwe bantu twaba na mafya tukwata filapusanapusana. Na lyo line, kuti twalabomba bwino nga ca kuti tulepangila libeela ifyo twingaba na maka ya kubomba pa kuti tulemona ifyo tulelunduluka mu mulimo wa kubila imbila nsuma. Kuti twaba ne nsansa nga twafikilisha ifyo twapangiile libeela ukubomba.
38 Ukwabula no kutwishika Yehova alelonganika bwangu bwangu abantu abo akacingilila mu “bucushi bukalamba.” Pali ino nshita ifyo Esaya asobele filefikilishiwa. Atile: “Umunono akaba ikana limo kabili uwacepa akaba uluko lwa maka. Ine, ne Yehova, nkacilenga ukucitika bwangu bwangu mu nshita ya ciko.” (Ukus. 7:9, 14; Esa. 60:22) Ala lishuko ukulabilako imbila nsuma muli shino nshiku sha ku mpela!—Mat. 24:14.