Natupimpilile Icisuma!
1 Ilyo tuleya mu nshita ya Cibukisho ca 2003, kuli ifingi ifiletulenga ‘ukupimpilila icisuma.’ (1 Pet. 3:13) Icikalamba pali ifi lilambo lya cilubula ilya kwa Yesu Kristu. (Mat. 20:28; Yoh. 3:16) Ukulanda pali ici, umutumwa Petro alembele ati: “Te ku fintu fyonaika, silfere atemwa golde, uko mwalubwilwe ku myendele yenu iyabula ifisabo. . . . Lelo cali ni ku mulopa uwaumo mutengo, ngo wa mwana wa mpaanga uwabula akalema kabili uwabula akabi, uwa kwa Kristu wine.” (1 Pet. 1:18, 19) Ukutasha pali uku kutemwa kwapulamo kutulenga ukuipamfya ukucita icisuma, ukwibukisha ukuti Yesu ‘aipeele pali ifwe ukuti atulubule ku musango onse uwa bumpulamafunde no kuisangulwila abantu bakwe abaibela, abapimpilile milimo isuma.’—Tito 2:14; 2 Kor. 5:14, 15.
2 Ilyo twacita icisuma mu menso ya kwa Lesa, tulaipakisha isenge lisuma na wene kabili alatusakamana. Petro na kabili atile: “Uulefwaya ukutemwa ubumi no kumona inshiku shisuma, . . . ataluke ku cabipa no kucita icisuma; afwaye umutende no kuukonkelela. Pantu amenso ya kwa Yehova yaba pa balungama, na matwi yakwe yomfwa ukupaapaata kwabo.” (1 Pet. 3:10-12) Muli shino nshiku sha masanso, cisuma ukwishiba ukuti Yehova alatusakamana kabili aliiteyanya ukutupokolola, “[alatucingilila] nge mboni ya linso lyakwe.”—Amala. 32:10; 2 Imila. 16:9.
3 Te mulandu no kweshiwa, Abena Kristu ba kubalilapo abo Petro alembeele bali abapimpa sana ica kuti tabali na kufubalishiwa, kabili bashimike mbila nsuma mu ncende shingi. (1 Pet. 1:6; 4:12) E fyo na bantu ba kwa Lesa bacita pali lelo. Nangu line twikala mu “nshita shaibela ishayafya,” ukutasha Yehova pa busuma bwakwe kutulenga ukuba abapimpa ilyo tulecita ukufwaya kwakwe. (2 Tim. 3:1; Amalu. 145:7) Natulande pa milimo imo iisuma iyo tukapamfiwa ukubomba muli ino nshita ya Cibukisho.
4 Laalikeniko Bambi ku Cibukisho: Inshila imo twingalangilamo ukuti tulatasha pa bupe bwakulisha ubwa cilubula kusangwa ku Cibukisho ca mfwa ya kwa Yesu icibako lyonse pa mwaka, kabili uno mwaka cikabako pali Citatu, April 16, cilya akasuba kawa. (Luka 22:19, 20) Uyu mwaka wapwile, mu filonganino 94,600 ifyacitile lipoti mwi sonde lyonse, abasangilweko bonse bali 15,597,746! Abantu ukucila 220,000 e bacilile pali balya basangilweko umwaka wafumineko.
5 Ni banga bakasangwako uno mwaka? Cikashintilila sana pa kubombesha kwesu mu kukoselesha bambi ukulongana na ifwe. Balilenipo ukulemba amashina ya bantu bonse abo mulefwaya ukulaalika. Mufwile intanshi ukulemba aba mu ng’anda yenu. Nga ca kuti abena mwenu tabasumina, bebeni ukufuma pa nshi ya mutima wenu ukuti mulefwaya bakasangweko pamo na imwe. Umulume umo uushasumina atile icalengele ukuti asangwe ku Cibukisho uyu mwaka wapwile ni pa mulandu wa kuti alimwene ukuti umukashi wakwe ali no kutemwa sana nga asangwako pamo nankwe. Lyena kuti mwakonkeshapo amashina ya balupwa lwenu, abena mupalamano, abo mubomba na bo incito, nelyo abana be sukulu banenu. Shininkisheni ukuti mwalaalikako na bo musambilisha Baibolo.
6 Pa numa ya kulemba amashina, tantikeni inshita ya kuyalaalika umo na umo. Afweni abantu ukwibukisha inshita Icibukisho cikabako na kuntu cikabela. Lintu April 16 yapalama, cinkuleniko abo mwalembele amashina, kuti mwayako nelyo ukutumako fye lamya. Natwafwe abantu abengi apo twingapesha ukusangwa kuli ici cintu cashilisha.
7 Afweni Balya Basangwa ku Cibukisho: Lyonse ubushiku bwa Cibukisho buba bwa kucincimuna. Tulakwata ishuko lya kusengela abo tushipepa nabo. Teyanyeni ukuti mwafika bwangu no kushalilako pa numa ya Cibukisho, ukulingana ne ncende mwikalako. Balilenipo ukuilondolola ku bapya abeshilesangwako. Cincimukeni kabili beni ne cileela.—Rom. 12:13.
8 Bushe bamo abasangwa ku Cibukisho kuti bayafwiwa ukulunduluka lwa ku mupashi ukupitila mwi sambililo lya Baibolo pa ng’anda? Esheni ukupoka amashina na keyala kuli bonse abasangilweko abashakwata aba kubatandalila pa kuti mwingalabafwa. Ukwaafwa kusuma kuti kwalenga bamo pali aba ukulunduluka mpaka baba na bakasabankanya bashabatishiwa ilyo Icibukisho ca mwaka uleisa cishilafika. Ilyo muletandalila abasangilwe ku Cibukisho, balaalikeni ukwisaumfwako ilyashi lyaibela ilikabako pa April 27.
9 Bushe Kuti Mwabombako Bupainiya bwa Kwafwilisha Uno Shinde? Cila mwaka ukupimpa kwesu kuli Yehova kutulenga ukubombesha ubutumikishi mu myeshi ya mulimo waibela. Ukubombesha kwa bonse mu cilonganino mu kushimikila imbila nsuma mu kupimpa pa nshita ya Cibukisho kuti kwaleta ifisuma.
10 Icilonganino cimo icakwata bakasabankanya 107 na bapainiya ba nshita yonse 9 catile umweshi wa April uyu mwaka wapwile “waliweme sana,” ababombeleko bupainiya bwa kwaafwilisha bali 53, kumo na baeluda bonse na babomfi batumikila. Bushe baeluda bacincishe shani bakasabankanya pa kuti babombeko bupainiya bwa kwaafwilisha ulya mweshi? Balibangilile ukucincisha, bakoseleshe abengi ukuti balembeshe. Ukukumana kwa kuya mu mulimo wa mwi bala kwalebako pa nshita shalekanalekana pa kuti bonse mu cilonganino basangweko. Kwali ukukomaila sana pa kushimikila kwa pali lamya, maka maka ku balwele.
11 Nkashi wa myaka 86, uushenda pa mulandu wa kulwala, alembeshe bupainiya bwa kwaafwilisha. Ukutendeka ulucelo, aleshimikila amaawala ayengi pali lamya ilyo ekele kwi tebulo lya ku kicini, aletushako panono, kabili alebwelelako no kukonkanyapo. Alandile na umo uwafwililwe umulume na bana baume babili abapungwe mu myaka ibili iyapitilepo kabili calemwafya ukumfwikisha ico Lesa asuminishisha ifyabipa ukucitika. Alimushimikile bwino, ne sambililo lya Baibolo lyalitendeke. Ukushimikila pali lamya mu nshita ya cungulo ne nshita shimbi kulabomba bwino sana ku bantu bekala mu fikuulwa nelyo incende shayafya ukufikako. Kabili lamya ilaafwa bakasabankanya ukulanda na bantu bashiba pa ng’anda mu nshita ya kasuba.
12 Pa kusondwelela lipoti wabo, baeluda batile: “Caliweme sana kabili tuletasha pa mashuko e lyo na mapaalo Yehova apeela kuli ifwe umo umo.” Nga mwapekanya bwino, ne cilonganino cenu ciine kuti caipakisha amapaalo ya musango uyu.
13 Esheni na Maka Ukubombako Ubutumikishi: Ukutemwa twatemwa Lesa na banensu kutulenga ukulubula inshita cila mweshi no kwebako bambi imbila nsuma. (Mat. 22:37-39) Bakangalila ba Masambililo ya Citabo pa Cilonganino na bakaafwa wabo bafwile ukwesha ukwaafwa balya baba mwi bumba lyabo pa kuti bengabombako ubutumikishi cila mweshi. Inshila isuma iya kucitilamo ici kuteyanishisha kabela ukubomba na baba mwi bumba lyenu. Ukucila ukulolela ukuti umweshi ukapwe e lyo mukacite ci, bangilileni. Ici cikamulenga ukuba na mashuko ayengi aya kwaafwa bambi.
14 Bushe mwi bumba lyenu ilye sambililo lya citabo mwaliba bakasabankanya balwala abo cayafya sana ukubombako ubutumikishi? Nga ca kuti bamo bekala mulya batensesha abalwele nelyo baba fye pa ng’anda, cintu cayeba fye ukuti tabakwata sana amashuko ya kushimikila. Lelo ilyo balebomfya amashuko yanono bakwata pa kulenga ulubuuto lwabo ukubalika, kuti balenga balya bamona imilimo yabo iisuma ukufwaya ukusambilila icine. (Mat. 5:16) Bakangalila ba masambililo ya citabo bafwile ukushininkisha ukuti aba musango yu balishiba ukuti kuti bacita lipoti umulimo wa mwi bala mu maminiti 15 ayo babikilwako. Ukucita lipoti inshita bashimikila kulakosha aba bakasabankanya ba cishinka, kabili kubalenga ukusekelela nga nshi. Kabili kulafwilisha na mu kushininkisha ukuti lipoti wa calo conse uwa milimo ya bantu ba kwa Lesa nailungama.
15 Abacaice Abapamfiwa Ukucita Icisuma! Mwandi tulakoseleshiwa ukumona abacaice ba Bwina Kristu balebomfya ubukose bwabo na maka mu mulimo wa kwa Yehova! (Amapi. 20:29) Nga uli mwaice, bushe kuti walanga shani ukupimpa kobe kuli Yehova muli iyi myeshi yaibela iya mulimo?
16 Nga ca kuti taulaba kasabankanya ushabatishiwa mu cilonganino, bushe te kuti utinamine ili shuko? Ipushe ifi fipusho: ‘Bushe nalishiba icine ca mu Baibolo ica kutendekelako? Bushe ndefwaya ukubombako umulimo wa Bufumu? Bushe imyendele yandi isuma? Bushe pa lwandi kuti naebako bambi imbila nsuma ya fintu nasuminamo? Bushe cilefuma pa nshi ya mutima wandi ukubombako uyu mulimo?’ Nga ca kuti aya mepusho yonse wayasuka ati ee, lyena landa na bafyashi bobe ukuti ulefwaya ukuba kasabankanya. Abafyashi bobe kuti balanda na eluda umo uwaba muli komiti wa mulimo.
17 Nga ni we kasabankanya wa mbila nsuma kale, bushe kuti washukila ilya nshita mwisala amasukulu no kulundako ubutumikishi bobe? Ukuteyanya bwino imibombele no kwaafwa kwa bafyashi na bambi, fyalenga abacaice abengi ababatishiwa ukuba bapainiya ba kwafwilisha. Nga ca kuti ico cakosa, lyena pampamina pa kubombako sana ubutumikishi bwa mwi bala. Ibikile ubuyo we mwine. Ukulunda pa buyo bwa mpendwa ya maawala ulefwaya ukulashimikila, bikapo no buyo bwa kuwamyako ubutumikishi bobe. Nalimo kuti waesha ukulabelengako ilembo pa mwinshi umo na umo, ukuwamyako ifipempu fya kubwelelamo, ukutendeka isambililo lya Baibolo, nelyo ukulundako ubutumikishi bobe pa kusanshako no kushimikila kwa pali lamya atemwa inshila shimbi isha mulimo. Ni shani pa lwa buyo bwa kulaalikako umwina mupalamano, uo musambilila nankwe, nelyo lupwa wenu ku Cibukisho ca uno mwaka? Ukubombako sana iyi milimo kukakuletela insansa kabili kukakoselesha nga nshi na bambi ababa mu cilonganino.—1 Tes. 5:11.
18 Afweni Abapya Ukulunduluka: Mu mwaka wa mulimo uwapwile, amasambililo ya Baibolo ayatungulwilwe pa ng’anda cila mweshi nga kwakanya pali kasabankanya umo na umo mu Zambia yali 164,613. Mu kuya kwa nshita, abasambi abengi pali aba bakalunduluka ukufika ku kuipeela no kubatishiwa. Lelo, ilyo bashilafika pali ubu buyo, tufwile ukubafwa ukufika pali bukasabankanya bwa mbila nsuma. Uyu mulimo walicindama ku kusambilisha abapya ukuba abasambi ba kwa Yesu Kristu. (Mat. 9:9; Luka 6:40) Bushe mwalikwata umusambi wa Baibolo uwaiteyanya ukubomba uyu mulimo?
19 Nga tamwishibe bwino ukulunduluka kwa musambi wenu, ebeni kangalila wenu uwe sambililo lya citabo amwafwe nelyo kangalila wa mulimo. Nalimo kuti mwamweba asangwako ilyo muletungulula isambililo. Aba bamunyina balibelesha bwino ukubelesha uko mwingabomfya pa kupimununa ukulunduluka kwa ku mupashi ukwa musambi. Nalimo kuti bakwatako ne mitubululo imo iikaafwa umusambi ukulunduluka lwa ku mupashi.
20 Nga ca kuti umusambi wenu alefwaya ukuba kasabankanya ushabatishiwa kabili mwamona ukuti nafikapo, landeni na kangalila wa kutangilila. Akateyanya ukuti baeluda babili bakakumane na imwe no musambi wenu ku kumona nga nafikapo, kabili ifyebo fikabomfiwa fyaba pa mabula 98-9 mu citabo ca Abateyanishiwa. (Moneni Ulupungu lwa kwa Kalinda ulwa, November 15, 1988, ibula 17.) Nga ca kuti umusambi asuminishiwa ukuba kasabankanya, kuti mwatendeka ukumukansha apo pene fye. Nga aleta fye lipoti wakwe uwa mulimo wa mwi bala, icilonganino cilingile ukwebwa ukuti umusambi ni kasabankanya ushabatishiwa. Tulesubila ukuti imintapendwa ya ba kasabankanya bapya, abaice na bakalamba, bali no kufika pali ubu buyo muli iyi myeshi yaibela iya mulimo.
21 Ukuteyanishisha Kabela Ifya Kucita Kulaafwa Ukupwishishisha Ifisuma Sana: Ukuteyanishisha kabela ifya kucita kukalenga tukabombe bwino imilimo yesu muli ino nshita ya Cibukisho. (Amapi. 21:5) Kwaba ifintu ifingi ifyo baeluda bakabila ukusakamana.
22 Pa kwaafwa icilonganino ukubombesha ubutumikishi bwa mwi bala, baeluda bafwile ukuteyanya bwino ukukumana kwa kuya mu mulimo wa mwi bala umulungu onse na pa mpela ya mulungu. Kangalila wa mulimo afwile ukuba solwesolwe pa kupanga aya mateyanyo. Bushe kufwile ukuba ukukumana na kumbi ulucelo, akasuba, nelyo icungulo kasuba? Icilonganino cilingile ukwebwa ulwa mateyanyo. Kuti cawama ukubika umutande wa mibombele pa cipampa ca fyebo.
23 Baeluda bafwile ukumona ukuti amateyanyo ya Cibukisho nayemikwa ilyo April 16 ishilafika. Aya mateyanyo yalesanshamo ukwampanya bwino imibomfeshe ya Ng’anda ya Bufumu ne filonganino fimbi ifikalonganinamo, ukuwamye Ng’anda ya Bufumu, ukusala bakapyunga na bakupishamo ifimpashanya, no kumona ukuti ifimpashanya e po fili. Icilonganino cilingile ukwebwa inshita ne ncende ikabelapo Icibukisho no kuteluka kwa kulongana konse ukwa uyo mulungu. Ukusakamana sana ifi fintu kukalenga Icibukisho cikacitwe “busaka busaka kabili mu kukonkana.”—1 Kor. 14:40.
24 Pe sambililo lya lupwa, imitwe ya ndupwa kuti bafwaya ukupaatulako inshita ya kulanshanya pa fyo ulupwa lwingabombako sana umulimo pa nshita ya Cibukisho. Bushe ulupwa lwenu lonse kuti lwabombako bupainiya bwa kwafwilisha? Nelyo bushe ba lupwa kuti batungilila umo nelyo abengi ababa mu lupwa pa kuti babombeko? Nga cayafya ukucite co, pangeni amabuyo yashininkishiwa ngo lupwa aya kulabombako sana ubutumikishi. Bushe mu lupwa lwenu muli umwaice sana, uwa kuti nga mwamukoseleshako no kumwafwa, kuti afikapo ukuba kasabankanya ushabatishiwa? Bantu banga ulupwa lwenu lwingalaalika ku Cibukisho uno mwaka? Ukuteyanya kusuma kukaleta ifilambu ifingi ne nsansa ku lupwa lwenu.
25 Bomfyeni Bwino Inshita Isheleko: Ilyo alelembela Abena Kristu ba mu mwanda wa myaka uwa kubalilapo, umutumwa Petro abacinkwileko ulwe pamfya lya nshita yasheleko pantu impela ya bwikashi bwa ciYuda yaali mupepi. (1 Pet. 4:7) Ilelo ubushininkisho bonse bulelanga fye ukuti ukupwa kwa bwikashi bwa nomba mu calo conse buli mupepi. Cila bushiku, imikalile yesu ifwile ukulanga ukuti twalishininwa ulwa ici. Apo tuli babomfi ba kwa Yehova abapimpa, tufwile ukwangwa sana ku mulimo we pamfya uwa kubila imbila nsuma.—Tito 2:13, 14.
26 Ino ni nshita ya kuba abapimpa no kubombako imilimo imo! Etetuleni pa fyo Yehova amucitila, ifyo acitila ulupwa lwenu, ne cilonganino. Nangu line tapali ico twingabwesesha kuli Yehova pa fintu ifingi ifyo atucitila, kuti twapeela Yehova ukupepa kwesu ukwa mutima onse. (Amalu. 116:12-14) Tukapokelela amapaalo ukufuma ku muulu pa kubombesha kwesu. (Amapi. 10:22) Shi ifwe bonse natube “abapimpilila icisuma” muli ino nshita yaibela iya kubombeshamo, “pa kuti muli fyonse Lesa acindikilwe muli Yesu Kristu.”—1 Pet. 3:13; 4:11.
[Akabokoshi pe bula 3]
Abasangilwe ku Cibukisho mwi Sonde Lyonse
19991 4,088,751
20001 4,872,086
2001 15,374,986
2002 15,597,746
[Akabokoshi pe bula 4]
Ni Bani Mukalaalika ku Cibukisho?
□ Aba mu ng’anda yenu na balupwa
□ Abena mupalamano na beshibishi
□ Abo mubomba nabo na basambi banenu
□ Ifipempu fya kubwelelamo na masambililo ya Baibolo
[Akabokoshi pe bula 5]
Afweni Abakasangwa ku Cibukisho
□ Cincimukeni pa kubaposha
□ Kabatandalileni
□ Batambikeni isambililo lya Baibolo
□ Balaalikeni ku lyashi lyaibela
[Akabokoshi pe bula 6]
Mabuyo Nshi Mukwete pa Nshita ya Cibukisho?
□ Lengeni uo mwalaalike ukusangwa ku Cibukisho
□ Fikenipo ukuba kasabankanya wa mbila nsuma
□ Bombeniko amaawala yamo mu butumikishi
□ Wamyeniko inshila shimo isho mushimikilamo
□ Bombeniko bupainiya bwa kwafwilisha