Twalilileni Ukulanda pa Fipesha Amano fya kwa Yehova
1. Bushe fipesha mano nshi ifya kwa Yehova ifyo mwacindamika sana?
1 Takwaba uwaba nga Lesa wesu, Yehova! Davidi alembele ati: “Mwe Yehova Lesa wandi, ifipesha amano ifyo mwacitile fingi, na matontonkanyo yenu ayalola kuli ifwe; takuli uwingapashaniwa kuli imwe!” (Amalu. 40:5) Ifipesha amano fya kwa Yehova fyaba myulu iyo abumba, Ubufumu bwa buMesia, ukutemwa kwa cishinka uko alanga abantunse, no mulimo wa kushimikila uwa mwi sonde lyonse. (Amalu. 17:7, 8; 139:14; Dan. 2:44; Mat. 24:14) Ukutemwa Yehova no kutasha pali fyonse ifyo acita e kutulenga ukulaebako bambi pali wene. (Amalu. 145:5-7) Mu March, mu April na mu May tukakwata ishuko ilikalamba ilya kulangilamo ukutemwa no kutasha kuli Yehova.
2. Bushe bupainiya bwa kwafwilisha butunonsha shani?
2 Ukubombako Bupainiya bwa Kwafwilisha: Bushe kuti mwaiteyanya ukubombako ama-awala 50 mu mulimo wa kushimikila muli iyi myeshi ileisa iya kubombeshamo? Kwena cikalinga ukuti mukaalule imibombele yenu. (Efes. 5:16) Abengi balishininkisha ukuti bupainiya bwa kwafwilisha bulabafwa ukulashimikila bwino. Tababa no mwenso ilyo bafika pa mwinshi kabili balaba ne shuko lya kubomfya sana Baibolo. Ukupoose nshita ikalamba mu mulimo wa kushimikila kulenga cabangukila ukutwalilila ukwafwa abalefwaya ukusambilila. Kabili bamo abashaletungulula amasambililo ya Baibolo kale balatendeka ukutungulula ilyo balebombako bupainiya bwa kwafwilisha. Bupainiya bwa kwafwilisha mulimo uleta ukusekelela pantu utulenga ukubombesha pa kuti twafwe bambi.—Imil. 20:35.
3. Bushe bambi babombeleko shani bupainiya bwa kwafwilisha nangu ca kuti imibele yali iya-afya?
3 Mwiyangufyanya ukusondwelela ukuti imibele teti imusuminishe ukubombako bupainiya bwa kwafwilisha. Eluda umo uwakwata abana babili kabili ubombe ncito, alibombeleko bupainiya bwa kwafwilisha umwaka wapwile. Bushe uyu munyina wapamfiwa acitile shani? Apo aya ku ncito mu kati ka mulungu, ateyenye ukulabomba sana pa mpela ya mulungu. Pa Fibelushi aletendeka ukubomba ulucelo muli ba 7 koloko. Na bambi abengi mu cilonganino abali nga wene balitendeke ukubombako bupainiya bwa kwafwilisha, kabili baleafwana no kukoseleshanya. Mu cilonganino cimbi, nkashi uwali ne myaka 99 alibombeleko bupainiya mu May ilyo umwana wakwe umwanakashi amulaalike ukubombela pamo na o. Bambi aba mu cilonganino baleafwa uyu nkashi mukalamba ukuya ku ng’anda ne ng’anda na ku masambililo ya Baibolo ilyo balemwensha pa cijinga. Inshila shimbi aleshimikililamo kubomfya lamya, ukushimikila mu musebo, no kulemba bakalata. Uyu nkashi ashininkishe ukuti te ku maka yakwe acitile ici, lelo ni Yehova e walemwafwa.—Esa. 40:29-31.
4. Bushe finshi tulingile ukutontonkanyapo ilyo tuletantika inshita ikatuwamina ukubombako bupainiya bwa kwafwilisha?
4 Tantikeni inshita iingamwangukila sana ukubomba. Imitubululo ya kutantika ili muli ci cipande nalimo kuti ya mwafwa. Bushe mulabomba incito nelyo mulaya ku sukulu? Ukutantika ukulabomba sana pa mpela ya mulungu kuti kwamuwamina sana. Nga ca kuti mulalwalilila kabili teti mube na maka ya kubomba inshita iitali mu mulimo wa kushimikila, ukutantika ukulabombako panono cila bushiku nalimo e kwingamuwamina. Ebeniko bambi ukuti mulefwaisha ukubombako bupainiya bwa kwafwilisha. Nalimo nabo kuti bapanga ukubombako.
5. Buyo nshi abaice bengemika mu myeshi ya March, April, na May?
5 Umulimo Abaice Bengabombako: Yehova alateemunwa nga ca kuti abaice balelanda pa fipesha mano fyakwe. (Amalu. 71:17; Mat. 21:16) Nga uli mwaice kabili walibatishiwa, nalimo kuti wabombako bupainiya bwa kwafwilisha mu mweshi uo mukesalamo isukulu. Nga teti ubombeko bupainiya bwa kwafwilisha, bushe teti wimike ubuyo ubwa kubombesha muli iyi myeshi no kuba kashimikila musuma? Nga ulakonka abafyashi bobe mu kushimikila lelo taulaba kasabankanya ushabatishiwa, nomba e nshita isuma iya kufikapo ukuba kasabankanya. Taufwile ukutontonkanya ukuti ulingile ukwishiba sana ifya kwasuka amepusho ya mu Baibolo nelyo ukuti ulingile ukuba no bwishibilo bwakwata abakalamba babatishiwa. Bushe walishiba amafundisho ya Baibolo aya kubalilapo? Bushe ulomfwila ifipimo fya Baibolo pa lwa mibele isuma? Bushe ulefwaya abantu uku kwishiba ati uli Nte ya kwa Yehova? Kanshi lanshanya na bafyashi bobe. Kuti bateyanya ukuti mukakumane na baeluda pa kuti bakamone nga naufikapo.—Moneni icitabo ca Abateyanishiwa, amabu. 98-9.
6. Bushe kuti twa-afwa shani abasambi ba Baibolo ukuba bakasabankanya ba mbila nsuma?
6 Ukwafwa Bambi Ukutendeka Ukushimikila: Abasambi ba Baibolo abalecita bwino kuti bafikapo ukuba bakasabankanya muli iyi yine myeshi ileisa iya kubombeshamo. Nga mwalikwata umusambi wa Baibolo ulecita bwino, ebeni kangalila we sambililo lya citabo nelyo kangalila wa mulimo. Umo pali aba akaya na imwe kuli ilyo sambililo pa kuti akamone ubwishibilo bwa musambi. Nga ca kuti umusambi nafikapo kabili alefwaisha ukuba kasabankanya, kangalila wa kutangilila akateyanya ukuti baeluda babili bamukumanye, imwe no musambi. (Moneni Ulupungu lwa kwa Kalinda, ulwa November 15, 1988, ibula 17.) Nga ca kuti umusambi asuminishiwa, tendekeni ukumusambilisha ifya kushimikila ilyo line fye.
7. Bushe bakasabankanya banaka na bamanshintula kuti ba-afwiwa shani?
7 Bakangalila ba masambililo ya citabo balingile ukwangwa ku banaka nelyo abamanshintula aba mwi bumba lyabo. Balaalikeni ukubomba na imwe mu butumikishi. Nga ca kuti tababombako pa nshita yalepa, kuti cawama ukuleka baeluda babili balanda nabo ukumona nga nabafikapo. (Moneni Umukululo wa Mepusho mu Ubutumikishi Bwesu Ubwa Bufumu ubwa November 2000.) Ukupimpa kwa cilonganino muli iyi myeshi iya kubombeshamo nalimo kuti kwabacincisha ukutendeka na kabili ukubomba umulimo wa kushimikila lyonse.
8, 9. Cinshi baeluda balingile ukucita pa kucincisha icilonganino ukubombesha?
8 Ino E Inshita ya Kuipekanya Ukubombesha: Baeluda, ino ine nshita tendekeni ukucincisha icilonganino ukubombako bupainiya bwa kwafwilisha. Kuti mwabacincisha ku fyebo fyenu ifya kukoselesha ne ncitilo shenu ishisuma. (1 Pet. 5:3) Inshita yafumineko, bushe ni banga babombeleko bupainiya bwa kwafwilisha mu cilonganino? Bushe uno muku kuti bafulilako? Bakangalila ba masambililo ya fitabo na bakaafwa wabo balingile ukukoselesha bonse ababa mwi bumba ukuti bakabombeshe. Bakangalila ba mulimo limbi kuti batantika inshita na shimbi isha kukumana pa kuya mu mulimo. Ishibisheni bwangu icilonganino ifyo mutantike. Shininkisheni ukuti bakasankanya babelesha e baebwa ukulatungulula no kuti ukukumana kwa kuya mu mulimo wa kushimikila kuletendeka no kupwa mu nshita. (Moneni Umukululo wa Mepusho mu Ubutumikishi Bwesu Ubwa Bufumu ubwa September 2001.) Kangalila wa mulimo na kabili alingile ukuteyanya icifulo ca kubombelamo, bamagazini, ne mpapulo shimbi.
9 Umwaka wapwile baeluda mu cilonganino cimo batendeke ukucincisha no kukoselesha bakasabankanya ukubombako bupainiya bwa kwafwilisha ilyo kwali kucili inshita iikalamba. Kabili abengi pali aba baeluda balilembeshe ukubombako. Baliteyenye inshita na shimbi isha kukumana pa kuya mu mulimo—pa 5:30 ulucelo balekumana pa kubombako ubunte bwa mu musebo, abaleinuka ku sukulu balekumana pa 15:00 hrs, lyene abaleinuka ku ncito balekumana pa 18:00 hrs. Na kabili, pa Cibelushi bateyenye ukulakumana imiku itatu. Bakasabankanya 66 e babombeleko bupainiya bwa kwafwilisha mu April muli ici cilonganino!
10. Bushe indupwa kuti shaipekanya shani ukubombesha?
10 Mulandu nshi mushingabomfesha inshita ye sambililo lya lupwa ilikakonkapo ukwimika ubuyo bwa fyo mu kabomba mu myeshi ileisa? Nga mwabombela pamo no kuteyanya ifintu bwino, bamo nelyo bonse mu lupwa nalimo kuti babombako bupainiya bwa kwafwilisha. Nga teti mukumanishe ukucita ifi, imikeni ubuyo bwa kubombesha pa kulapoosa inshita iikalamba mu mulimo nelyo ukulaya mu kushimikila na pa nshita shimbi. Bonse ngo lupwa pepelenipo pali ici. Shininkisheni ukuti Yehova akapaala ukubombesha kwenu.—1 Yoh. 3:22.
11. (a) Finshi ifyacindama ifyo ilambo lya kwa Kristu lyapwishishisha? (b) Ni nshita nshi Icibukisho cikabako kabili uko mwikala ni kwi cikabela?
11 Icipesha Mano Capulishamo ica kwa Lesa: Ukutemwa ukwakulisha uko Yehova alanga, kutupeela Umwana wakwe nge cilubula. (1 Yoh. 4:9, 10) Ilambo lya cilubula e nshila iya kupusushishamo abantunse ku lubembu ne mfwa. (Rom. 3:23, 24) Umulopa wasuumiwa uwa kwa Yesu e wakoseshe icipingo cipya, icalenga ukuti abantunse abashapwililika basalwe ku kuba abana ba kwa Lesa abasubila ukuteka mu Bufumu bwa mu muulu. (Yer. 31:31-34; Marko 14:24) Ne cacindamisha ca kuti icumfwila ca kwa Yesu calishishishe ishina lya kwa Yehova. (Amala. 32:4; Amapi. 27:11) Mwi sonde lyonse Icibukisho ca mfwa ya kwa Kristu cikasefiwa pa Mulungu, pa April 4, pa numa ya kuwa kwa kasuba.
12. Bushe ukusangwa ku kusefya kwa Mulalilo wa kwa Shikulu kuti kwanonsha shani abalefwaya ukusambilila icine?
12 Ukusefya Umulalilo wa kwa Shikulu kulacindamika ifipesha mano fya kwa Yehova. Ilyashi litulenga ukumfwikisha no kutasha sana Yehova pa kutupeela icilubula. Abafwaya ukusambilila icine abakasangwako bakamona ifipesha mano na fimbi ifya kwa Lesa. Bakamona ukwikatana no kutemwa kwakaba uko Yehova asambilisha abantu bakwe. (Efes. 4:16, 22-24; Yako. 3:17, 18) Ukusangwa kuli uku kulongana kwacindama kuti kwa-alula ifyo umo atontonkanya. E co tulefwaya abantu abengi sana bakasangweko.—2 Kor. 5:14, 15.
13, 14. Bushe ni bani abo tufwile ukulaalika ku Cibukisho, kabili tukabalaalika shani?
13 Ukulaalika Bambi Ukusangwako: Ili line, tendekeni ukulemba abo mukalaalikako. Pabo mukalaalika pafwile ukuba balupwa lwenu abashasumina, abena mupalamano, abo mwaishibana nabo ku sukulu nelyo ku ncito, abo mwalesambilila nabo na bantu musambilila nabo Baibolo, na bonse abo mu citako ifipempu fya kubwelelamo. Bakangalila ba masambililo ya fitabo bafwile ukulaalika na bonse bakasabankanya abanaka.
14 Nalimo kuti mwafwaya ukubomfya umukululo waba pa nkupo ya kulekelesha uwa mu Ulupungu lwa kwa Kalinda ulwa March 15, 2004 nelyo Awake! ya March 22, 2004. Ilyo ubushiku bwa April 4 bwaya bulepalamina, mukacinkuleko abo mwalaalika, napamo ukuti mwayako mwe bene nelyo ukubatumina lamya.
15. Bushe tukalanga shani icileela pa bushiku bwa Cibukisho?
15 Pa Cibukisho: Mukabangilile ukufika apo mukalalonganina Icibukisho. Mukabe ne cileela pa kuposha abapya mu kucincimuka. (Rom. 12:13) Na mushingamwa ukupokelela balya mukalaalika. Balengeni bayumfwe ukuti na mu basengela, kabili beshibisheni kuli bambi aba mu cilonganino. Napamo kuti mwaleka baikala mupepi na imwe. Kabili bamo nga tabakwete Baibolo nelyo icitabo ca lwimbo, teyanyeni ukuti mukalebelenga nabo no kwimbila pamo nelyo ukuti bakekale pamo na bamunyina bambi. Pa numa ya Cibukisho, mukaipekanye ukwasuka amepusho ayali yonse ayo nalimo bengepusha. Nga ca kuti bamo e lyo bakasangwako umuku wa kubalilapo, bepusheni nga kuti batemwa ukwishibilapo ifingi pa Cebo ca kwa Lesa no kufwaya kwakwe. Bepusheni ukuti mulesambilila na bo Baibolo pa ng’anda.
16. Cinshi cingacitwa pa kwafwa abasangilwe ku Cibukisho ukulunduluka lwa ku mupashi?
16 Twalilileni Ukwafwa Abasangilweko: Abasangilweko ku Cibukisho nalimo kuti bafwaya ukubafwa mu milungu ikakonkapo pa numa ya Cibukisho. Na balesangwa ku kulongana lyonse pa nshita imo lelo shino nshiku abasangwako fye limo limo nabo bene balingile ukwafwiwa. Baeluda bakamona ukuti aba musango uyo tabalekeleshiwe. Kuti bafwaya ukwishiba icalengele ukuti baleke ukulunduluka lwa ku mupashi. Balondolweleni bwino ukuti inshita naipwa. (1 Pet. 4:7) Afweni bonse ukumona ubunonshi bwa kumfwila ukucincisha kwa mu Malembo ukwa kulongana pamo lyonse na bantu ba kwa Lesa.—Heb. 10:24, 25.
17. Mulandu nshi tulingile ukutwalilila ukulanda pa fipesha mano fya kwa Yehova?
17 Imilimo ya kwa Yehova ya kupapusha ica kuti teti tuyumfwikishe bwino sana nangu twingekala ku ciyayaya. (Yobo 42:2, 3; Luk. Mil. 3:11) Kanshi ifintu fya kulumbanishishapo Lesa tafyakapwe. Muli iyi nshita ya Cibukisho kuti twalangilila ifyo tutasha pa fipesha mano fya kwa Yehova ukupitila mu kubombesha mu butumikishi bwesu.
[Charti pe bula 5]
Bushe Kuti Mwabombako Bupainiya bwa Kwafwilisha Ukubomfyako Imo Pali Iyi Mitantikile?
March Su M* Tu* W* Th F Sa Umweshi Yonse Pamo
Cila Bushiku 2 1 1 1 1 1 5 51
Inshiku Shibili 0 5 0 5 0 0 0 50
Pa Mpela ya
Milungu Fye 5 0 0 0 0 0 8 52
Pa Mpela
ya Milungu
ne Nshiku
Shibili Mu
kati ka Milungu 2 0 0 2 0 2 6 50
April Su M Tu W Th* F* Sa Umweshi Yonse Pamo
Cila Bushiku 2 1 1 1 1 1 5 50
Inshiku Shibili 0 0 0 0 5 5 0 50
Pa Mpela ya
Milungu Fye 5 0 0 0 0 0 8 52
Pa Mpela
ya Milungu
ne Nshiku
Shibili Mu
kati ka Mulungu 2 0 0 2 0 2 6 50
May Su* M* Tu W Th F Sa* Umweshi Yonse Pamo
Cila Bushiku 2 1 1 1 1 1 4 51
Inshiku Shibili 0 5 0 0 0 0 5 50
Pa Mpela ya
Milungu Fye 3 0 0 0 0 0 7 50
Pa Mpela
ya Milungu
ne Nshiku
Shibili Mu kati
ka Mulungu 2 0 0 2 0 2 5 51
* Inshiku shisano mu mweshi