‘Shimikisheni Icebo ca kwa Lesa’

¹ Nga mwapeelwa icintu icisuma, bushe tamulanga ukutasha kwine kwine ku mibele yenu na ku ncitilo? E fyo mucita! Umfweni ifyo Paulo ayankwileko pa busuma ne cikuku ifyo Yehova akwatila abantu. Atile: “Kube ukutootela kuli Lesa pa ca bupe cakwe icishingalandwa”! Finshi fyaba muli ici “ca bupe”? E mwabo “kusenaminwa ukwacishamo kwa kuli Lesa” konse uko alanga ifwe pa kutupeela ica bupe cacilishapo, Umwana wakwe wine ukuba icilubula pa membu shesu.—2 Kor. 9:14, 15; Yoh. 3:16.

² Bushe Paulo aletashisha fye ico cine? Iyo! Alangile ifyo atashishe mu nshila ishingi. Alyangilweko kuli bumupashi bwa Bena Kristu banankwe kabili alebombesha ukubafwa ukumwenamo mu cikuku ca kwa Lesa. Paulo alandile pali aba ati: “Ico twamufulukishe, twabekelwe ukumupeelapo te mbila nsuma ya kwa Lesa yeka yeka, lelo ne mitima yesu iine, pa kuti mwaishileba abatemwikwa kuli ifwe.” (1 Tes. 2:8) Paulo talepelela fye pa kwafwa abali kale kale mu cilonganino ukuti bekashe ipusukilo lyabo, lelo aleshimika ne mbila nsuma ukwabula ukuleka, ukwenda intamfu iikalamba pa mulundu na pali bemba ku kufwaya “abasontelwe ku kuya mu mweo wa muyayaya.” (Imilimo 13:48) Icalengele Paulo “ukushimikisha Icebo ca kwa Lesa,” ni co aletasha sana pali conse ico Yehova amucitile.—Kol. 1:25, NW.

³ Nga ifwe, bushe ukutasha pa fisuma Yehova atucitila takutulenga ukwafwa abakabila ubwafwilisho bwa ku mupashi mu cilonganino cesu? (Gal. 6:10) Kabili, bushe tatubombesha ukulingana na papelele amaka yesu ukushimika imbila nsuma iya Bufumu mu cifulo cesu ica kushimikilamo?—Mat. 24:14.

⁴ Inshita ya Kulanga Ukutasha: Cila mwaka inshita ya Cibukisho ca mfwa ya kwa Kristu iba ni nshita isuma iya kulangilamo ukutasha pa fyo Yehova na Yesu batucitila. Uku takwaba ngo kulongana kwa lyonse nelyo ukwibukisha fye ifyacitike. Yesu atile: “Citeni ici ku kunjibukisha.” (Luka 22:19) Icibukisho ca mfwa ya kwa Kristu e nshita ya kwetetula pa musango wa muntu Yesu aba. Ni nshita ya kwiluka ukuti wa mweo no kuti alebomba, kabili alicindikwa no kupeelwa ubufumu pa mulandu wa mikalile yakwe iya cishinka ne lambo apeele. Na kabili iba ni nshita ya kulanga ukunakila kuli bumutwe bwa kwa Kristu ilyo aletungulula icilonganino ca Bwina Kristu. (Kol. 1:17-20) Abantu ba kwa Lesa bafwile ukulanga ukuti balicindika iyi nshita pa kusangwa ku Cibukisho ca mfwa ya kwa Kristu. Uno mwaka cikabako pa numa ya kuwa kwa kasuba pali Cine, March 28, 2002.

⁵ Pa mulandu wa fyo twabombeshe pa ntanshi ya Cibukisho umwaka wapwile, kwali ukwingilishiwako kwa mpendwa ya basangilweko ukufika kuli 514,277 muno Zambia. Bushe tukaba banga uno mwaka? Cili ku fyo ‘tukabombesha no kupilikita,’ ukwafwa abengi nga nshi ukusangwako.—1 Tim. 4:10, NW.

⁶ Ukucila ukusangwa fye ku Mulalilo wa kwa Shikulu, nalimo kuti twaingilishako imilimo yesu iya kushimikila. Tatuletwishika ukuti bamunyinefwe na ba nkashi abengi nga nshi bakabombako bupainiya bwa kwafwilisha umweshi umo nelyo fye iingi. Cila mwaka pa myaka isano iyapita, twalekwata avareji wa bapainiya bakwafwilisha 17,488 mu nshita ya Cibukisho, e kutila ukufuma mu March ukufika mu May. Bushe kuti mwateulula imibombele yenu pa kuti mukaipakishe uyu mulimo waibela uwa bupainiya bwa kwafwilisha uno mwaka? Kuti yaba e nshila isuma iya kulangilamo ukuti mulatasha pa ca bupe ca kwa Lesa ice lambo lwa kwa Kristu. Na imwe bene kuti mwapokelela ipaalo lya kwa Yehova, nge fyo na ba twalalandapo bapaalilwe.

⁷ Nkashi umo uubomba incito alembele ifyo abombele umulimo wa bupainiya bwa kwafwilisha umwaka wapwile mu March ati: “Ubutumikishi Bwesu Ubwa Bufumu ubwa mu February 2001 bwakoseleshe bonse abengakumanisha, ukubombako bupainiya bwa kwafwilisha mu nshita ya Cibukisho. Apo mu March mwali Ifibelushi fisano, ici calingene bwino no kutantika kwandi. E co nalembeshe ukubombako bupainiya bwa kwafwilisha.” Ilyo atendeke ukubomba mu March, aimike ubuyo bwa kutendeka isambililo lya Baibolo ilya pa ng’anda. Bushe alitendeke? Ee, ilyo akumenye amaawala 52 aya kushimikila muli ulya mweshi! Cinshi asondwelele? “Mwaba amapaalo yene yene nga twaibikilishako.”

⁸ Busuma nshi bwabamo nga ca kuti ulupwa lwalembesha bupainiya? Ulupwa lwa bantu bane abacitile fyo mu April umwaka wapwile batile mweshi uo tabakalabe. Banyina batile: “Lyonse twalesanga insansa, pantu twalebombela pamo mu butumikishi! Ukulanshanya imibombele yesu iya cila bushiku iya mwi bala kwalelenga inshita ya ca kulya ca mulalilo ukuwama sana.” Umwana mwaume atile: “Ninjipakisha ukubomba umulimo wa mwi bala na batata mu kati ka mulungu, pantu ilingi balaya ku ncito.” Bawishi balundilepo ati: “Ine pamo ngo mutwe wa lupwa, nalitemenwe sana ukwishiba ukuti twalebombela pamo umulimo wacindamisha pali ndakai.” Bushe na imwe kuti mwabombela pamo bupainiya? Cinshi mushingalanshanishisha pamo ngo lupwa no kumona nga kuti ulupwa lwenu lwakumanisha ukubombako bupainiya bwa kwafwilisha muli iyi nshita ya Cibukisho?

⁹ Bushe Kuti Twabomba Ifyo Tushabala Atubombapo Kale mu March? Ilyo umwaka wa 2000 waletendeka, mu Ubutumikishi Bwesu Ubwa Bufumu mwali icipusho ca kuti: “Bushe mu April 2000 Kuti Twabomba Ifyo Tushabala Atubombapo Kale?” Kwankulako nshi kwaliko? Kwali ukwingilishiwako umwingi. Mu mweshi fye umo bapainiya ba kwafwilisha bafikile 10,083. Kabili, kwali ukwingilishiwako mu maawala, ukushalika bamagazini, amasambililo ya Baibolo, na mu fipempu fya kubwelelamo. Bushe muleibukisha ifyo icilonganino cenu caswangene pa mulandu wa kupikintika mu milimo ya ku mupashi muli ulya mweshi waibela? Bushe kuti twacita cimo cine nalimo no kucishanapo uno mwaka? Nga ca kuti bonse twabombesha, umweshi wa March 2002 kuti waba ‘Mweshi Twingabombamo Ifyo Tushabala Atubombapo Kale.’ Mulandu nshi twalandila sana pali March?

¹⁰ Kuli ifintu fibili ifilengele umweshi wa March ukuba umweshi waibela uwa mibombele. Ica ntanshi, Icibukisho cikabako ku mpela ya mweshi wa March, ica kuti tukakwata inshita iikalamba iya kulaalika abantu abengi ukusangwako. Ica bubili, uno mwaka umweshi wa March ukwete impela ya milungu isano, ica kuti cikangukila ababomba nelyo abana be sukulu ukubombako bupainiya bwa kwafwilisha. Cinshi mushingatantikila ili line ifyo mwingacita, ukubomfya kalenda ali mu ca mu kati? Bupainiya bwa kwafwilisha ala tabwayafya nge fyo pambi mumona. Ku ca kumwenako, nga mwatila mwakulabomba lyonse amaawala 8 pa mpela ya mulungu, mukakabila fye ukulundapo amaawala 10 mu kati ka mweshi pa kuti mukumanishe amaawala 50.

¹¹ Cinshi baeluda bengacita pa kwafwa bonse mu cilonganino “ku kushimikisha icebo ca kwa Lesa”? Bafwile ukukoselesha ilyo balelanda amalyashi mu kulongana na lintu balelanshanya fye na babwananyina. Bakangalila be Sambililo lya Citabo pa Cilonganino na bakaafwa babo bafwile ukuitendekelako ukulanda na ba mwi bumba lyabo no kwafwilisha umo umo uwa mwi bumba lyabo. Limbi kuti icilekabilwa fye tumashiwi twa nkosho epela nelyo imitubululo inono iibomba. (Amapi. 25:11) Abengi kuti bamona ukuti ukuteululako fye panono imibombele yabo kuti kwabalenga ukuipakisha ishuko lya kubombako bupainiya bwa kwafwilisha. Mu filonganino ifingi, baeluda na babomfi batumikila abengi, nalimo bonse, capamo na bakashi babo, balemika ica kumwenako cisuma pa kubombako bupainiya bwa kwafwilisha mu nshita ya Cibukisho. Ici calikoselesha bakasabankanya abengi nga nshi ukubombako bupainiya bwa kwafwilisha. Bakasabankanya bamo nalimo te kuti babombe bupainiya pa mulandu wa fya kucilikila ifingi, lelo kuti bakoseleshiwa ukulanga ukutasha kwabo pa kubomba ukulingana napapelele amaka yabo, ukubombela pamo ne cilonganino.

¹² Baeluda nga bapekanya bwino e lyo ifintu fingenda bwino. Ukukumana kwa mulimo wa mwi bala kufwile ukutantikwa pa nshita shalinga mu mulungu onse. Nga cingacitika, kangalila wa mulimo akebela limo bamunyina bafikapo ukutungulula ukukumana konse ukwa mulimo wa mwi bala. Abakalatungulula bakakabila ukupekanya bwino pa kuti tabacilile pali baminiti 10 ukufika kuli 15, umuli no kwakanya abantu, ukubapeela ukwakubombela, ne pepo. (Moneni Umukululo wa Fipusho mu Ubutumikishi Bwesu Ubwa Bufumu ubwa September 2001.) Imitantikile ya mibombele muli uyu mweshi ifwile ukulondololwa bwino ku cilonganino no kubikwa pa cipampa ca fyebo.

¹³ Onse afwile akwata ukwa kubombela. Kangalila wa mulimo afwile ukukumana na munyina apeela ififulo fya kubombelamo ukutantika ififulo ifishabombelwamo sana pa kutila fingabombelwamo. Mufwile ukwangwa sana balya bashisangwa pa ng’anda, ukubomba ubunte bwa mu musebo na kwi shitolo ne shitolo, no kushimikila mu cungulo. Uko cingacitika, bakasabankanya bamo kuti bayafwiwa ukushimikila pali lamya.

¹⁴ Bafweni Ukutendeka Ukubomba na Kabili: Bushe kuliko bamo mu cilonganino cenu abaleka ukushimikila imbila nsuma? Aba musango yo bacili baba mu cilonganino kabili balekabila ubwafwilisho. (Amalu. 119:176) Apo impela ya cino calo cikote ili fye mupepi ne calo cipya cili fye apa, e mulandu wine tufwile ukubombesha ukwafwa abanaka. (Rom. 13:11, 12) Pa myaka isano iyapita, abantu ukucila pali 14,500 balyankulako ku kwafwa kabili balitendeka ukubomba na kabili. Cinshi twingacita ukwafwa abengi ukubukulula ukutemwa no kucetekela uko bakwete pa kubala?—Heb. 3:12-14.

¹⁵ Ibumba lya baeluda likalanshanya ifya kwafwa abanaka pa myaka iyi yapita. (Mat. 18:12-14) Kalemba afwile ukumona ku Calembwa ca Bukasabankanya ica Cilonganino no kulemba bonse abanaka. Kufwile kwaba ukubombesha kwaibela ukupitila mu kutantika ifipempu fya bucemi ku kwafwa abanaka. Nalimo eluda kuti amonapo kasabankanya umo pa mulandu wa kuti alishibana no wanaka kabili balebombela pamo, nelyo bakasabankanya bambi kuti baipushiwa ukwafwa. Nalimo kuti balisambililepo no wanaka kabili kuti batemwa sana ukwafwa uyu muntu muli iyi nshita anakile. Kwena, abengi abanaka nalimo bakafwaya ukutendeka ukushimikila icebo ca kwa Lesa na kabili. Nga bafikapo, takuli inshita imbi iisuma iya kutendekelamo ukushimikila ukucila iyi nshita ya Cibukisho!—Nga mulefwaya ukwishibilapo na fimbi moneni Umukululo wa Fipusho mu Ubutumikishi Bwesu Ubwa Bufumu ubwa November 2000.

¹⁶ Bushe Kuli na Bambi Abengafikapo Ukushimikila? Yehova alepaala abantu bakwe pa kuleta “ifisuma fya nko shonse.” (Hag. 2:7) Cila mwaka abengi nga nshi balefikapo ukuba bakasabankanya bashabatishiwa. Ni bani aba? Abana ba Nte sha kwa Yehova na balya tusambilila nabo Baibolo abalunduluka. Twishiba shani nga nabafikapo ukuba bakabilisha ba mbila nsuma?

¹⁷ Abana ba Nte sha kwa Yehova: Abana abengi balashindika abafyashi babo ku ng’anda ne ng’anda pa myaka iingi, nangu ca kuti bacili tabalaba bakasabankanya bashabatishiwa. Umweshi wa March napamo e wingaba umweshi uusuma uwa kuti batendekelemo. Kuti mwaishiba shani ngo mwana wenu nafikapo? Icitabo ca Abateyanishiwa ku Kupwilikisha Ubutumikishi Bwesu ibula 100 citila ni “lintu umwana abe ca kumwenako cisuma mu myendele yakwe kabili ali na maka ya kucito kulumbulula kwa pa lwakwe kwa citetekelo cakwe ku kulanda kuli bambi ulwa mbila nsuma, ukuseshiwa ukufuma ku mutima ukucite fyo.” Nga mwamona ukuti umwana wenu nafikapo, landeni na umo uwa baeluda baba muli Komiti wa Mulimo uwa Cilonganino.

¹⁸ Abasambi ba Baibolo Abafikapo: Ilyo umusambi wa Baibolo nomba asambilila kabili abe nasangwako ku kulongana eyefilya, kuti nalimo afwaya ukuba kabila wa Bufumu. Nga ca kuti mulesambilila no musambi wa musango yo, tontonkanyeni pali ifi fipusho: Bushe alelunduluka, ukulingana no mushinku wakwe na maka? Bushe alitendeka ukwebako bambi ifyo alesambilila? Bushe alefwalo “buntu bupya”? (Kol. 3:10) Bushe nafikapo pa fifwaikwa kuli bakasabankanya bashabatishiwa, ifyalondololwa pa mabula 97-9 mu citabo ca Ubutumikishi Bwesu? Nga e fyo cili, mufwile ukumona Komiti wa Mulimo uwa Cilonganino pa kuti kukabe ukutantika baeluda babili ukukumana na imwe no musambi. Nga afikapo, baeluda babili bakamweba ukuti atendeke ukushimikila ku cintubwingi.

¹⁹ Nga mu April na May? Iyi nayo ikaba myeshi yaibela iya kwingilishako imibombele ya butumikishi bwa mwi bala. Abengi abakabomba bupainiya bwa kwafwilisha mu March nalimo kuti babomba na mu April na mu May. Mu April na May, tukangwa ukushalika bamagazini ba Ulupungu lwa kwa Kalinda na Loleni! mu butumikishi. Aba bamagazini balafwa sana abantu abababelenga! Bamagazini bene aba balibomba incito iikalamba ku kulenga kube ukwingilishiwako mwi sonde lyonse. Kanshi tukabombesha sana mu April na May ukushalika bamagazini ku bantu abengi nga nshi. Teyanyeni nomba pa kuti na imwe mukabombeshe.

²⁰ Apo twamona nomba ukuti kukaba ukubombesha mu mulimo wa kushimikila, bushe mulefwaya ukulundako bamagazini mupoka ukupitila mu cilonganino? Mu mwaka onse uwa mulimo, tulatambika Ulupungu lwa kwa Kalinda na Loleni! cila Cibelushi, ubwaba Ubushiku bwa Magazini. Lelo, apo abengi bakalabomba bupainiya bwa kwafwilisha kabili ifwe bonse tukalatambika bamagazini pa myeshi ibili, kuti cawama mwalundako bamagazini mupoka ku cilonganino. Nga mulefwaya ukulundako, mukwai ishibisheni umubomfi wa magazini mu cilonganino cenu ili line. Pa nshita imo ine, umubomfi wa fitabo afwile ukushininkisha ukuti trakiti wa kuti Bushe Kuti Mwatemwa Ukwishibilapo na Fimbi Pali Baibolo? epo ali pa kuti bonse bakwateko uwa kushalika.

²¹ Abengi baletasha pa cipande ca mu Ubutumikishi Bwesu Ubwa Bufumu icitila “Ifya Kulanda Pali Bamagazini.” Bushe mwalishukila uku kutantika pa kusambilila ifya kulanda pa kushalika bamagazini? Mulandu nshi mushingeseshako iyi mitubululo mwi sambililo lyenu ilya lupwa cila mulungu?

²² Shukileni iyi Nshita ya Cibukisho: Nge fyacitile mutumwa Paulo, lekeni na ifwe tulange Yehova ukuti tulatasha “pa ca bupe cakwe icishingalandwa” ukupitila mu kubombesha imilimo ya ku mupashi iiteyanishiwe muli iyi nshita ya Cibukisho. Pali iyi milimo pali (1) ukusangwa ku kusefya kwacindamisha mu mwaka, e kutila ukusefya Umulalilo wa kwa Shikulu pali Cine, pa March 28, 2002; (2) ukwafwa abanaka ukubukulula “ukutemwa [kwabo] ukwa pa kutendeka” (Ukus. 2:4; Rom. 12:11); (3) ukwafwa abana besu na basambi ba Baibolo abalefikapo ukuba bakasabankanya abashabatishiwa; na (4) ukubombesha mu mulimo wa kushimikila, nelyo fye ukubombako bupainiya bwa kwafwilisha mu March na mu myeshi ikonkelepo.—2 Tim. 4:5.

²³ Tulepepela ukuti bonse tukabombeshe ukushimikile mbila nsuma iya Bufumu muli iyi nshita ya Cibukisho, ukulanga ukuti tulatasha sana pali fyonse ifyo Yehova atucitila.

[Akabokoshi pe bula 6]

Ukutantika Imibombele Yandi iya Mulimo wa mwi Bala mu March 2002

Sunday Monday Tuesday Wednesday Thursday Friday Saturday

1 2

Ubushiku bwa Magazin

3 4 5 6 7 8 9

Ubushiku bwa Magazin

10 11 12 13 14 15 16

Ubushiku bwa Magazin

17 18 19 20 21 22 23

Ubushiku bwa Magazin

24 25 26 27 28 29 30

MEMORIAL Ubushiku bwa Magazin

AFTER

31 SUNDOWN

Bushe kuti mwatantika amaawala ukufika kuli 50 pa kuti mubombeko bupainiya bwa kwafwilisha mu March?