Umukululo wa Mepusho

◼ Ilyo kasabankanya uushabatishiwa bashilamusuminisha ukubatishiwa, bushe afwile ukulalongana no kulashimikila lyonse?

Ukubatishiwa e cintu cacindamisha ico umuntu asalapo ukucita mu bumi bwakwe. Kanshi ilyo umuntu talasuminishiwa ukubatishiwa afwile ukwishibako fimo pa fyo Lesa afwaya ena ukulacita. E lyo kabili alingile no kulanga ukuti alakonka amafunde ya kwa Lesa mu mikalile yakwe.

Na kabili, apo Abena Kristu balabakoselesha ukukanapuswa ku kulongana, kanshi na kasabankanya uushabatishiwa alingile ukulasangwa lyonse mu kulongana. (Heb. 10:24, 25) Alingile no kula-asukapo lyonse. Ukwabula no kutwishika, afwile no kulalanda amalyashi mwi Sukulu lya Butumikishi Ilya Bulesa, nangu ca kuti kwena ici tacaba lifunde.

Apo Abena Kristu balipeelwa umulimo wa kushimikila imbila nsuma, kasabankanya uushabatishiwa alingile ukulabombako lyonse umulimo wa kushimikila ilyo ashilabatishiwa. (Mat. 24:14; 28:19, 20) Bushe alingile ukushimikila imyeshi inga pa kuti abatishiwe? Kuti cawama ukuleka papitako inshita pa kuti alanga ukuti cine cine alicincila kabili alefwaisha ukulashimikila cila mweshi. (Amalu. 78:37) Lelo kwena, tapafwile ukukokola sana ukutula apo abelele kasabankanya ukufika apo bengamusuminishisha ukubatishiwa, napamo kuti papitako fye imyeshi inono. Bushe afwile ukulacita lipoti ama-awala yanga aya mu mulimo wa mwi bala? Apa napo tapaba ifunde. Baeluda bafwile ukumona ifyo kasabankanya alebomba kabili tabafwile ukuba abaumina kumo.—Luka 21:1-4.

Baeluda (nelyo ababomfi batumikila nga mu cilonganino mwaba baeluda abanono) abalepitulushamo uulefwaya ukubatishiwa balingile ukwibukisha ukuti abantu baliba abapusanapusana, kabili balingile ukucenjela no kulailuka pa kuti beshibe bwino umuntu nga nafikapo ukubatishiwa. Bafwile ukumona nga cine cine uyo muntu alefwaisha ukuba Inte ya kwa Yehova kabili alalanga no kuti alatasha pe shuko lya kuba mu cilonganino ca kwa Yehova ica mwi sonde lyonse kabili alicindamika no mulimo wa kushimikila. Baeluda baleshiba bwino bwino ukuti talakosa mu cine kabili talaishiba sana ifintu nga filya fyaba bakasabankanya bambi ababatishiwa. Nga baeluda basanga ukuti umuntu tafikilepo ukubatishiwa, balingile ukumweba cikuuku cikuuku imilandu ya mu Malembo iilengele ukuti e fikapo no kupekanya ukuti bengamwafwa.