Icebo ca kwa Lesa ca Maka
1 Baibolo yalyambukila ubumi bwa mamilioni apakalamba. Cintu isosa caliba icacilapo ukukunta ukucila icili conse ico umuntu engaletako. (Heb. 4:12) Moneni cintu yatucitila. Mu cine cine, umutengo wa iko tawingalinganishiwako.
2 Inte sha kwa Yehova e basambi ba Baibolo basolwesolwe kabili bandubulwila ba iko. Tulingile ukumona ukubelenga Baibolo ngo lubali lwakatama ulwa kutantika kwesu ukwa teokratiki ukwa lyonse, ukukupeela icifulo ca ntanshi pali televisioni na pa kukokoloka konse kumbi.
3 Cipange Icibelesho ca Lyonse: Abantu ba kwa Yehova balisatesekesha ukwambukila kwa maka uko ukubelenga Baibolo ukwa lyonse kwingakwata. Pa myaka iingi icipampa cikalamba pali imo iya mafakitare yesu mu Brooklyn calicincisha abapita nshila ukuti “Belenga Icebo ca kwa Lesa Baibolo wa Mushilo Cila Bushiku.” Ifilundwa fipya ifya lupwa lwa Bethel filafwaikwa ukubelenga Baibolo yonse mu mwaka wabo uwa kubalilapo uwa mulimo wa pa Bethel.
4 Te mulandu no kutantika kobe ukwapamfiwa, bushe uleendela pamo no kutubulula kwa kubelenga Baibolo cila mulungu ukwatantikwa mu Ukutantika kwe Sukulu lya Butumikishi bwa Teokratiki? Nga ca kuti walisango bwafya mu kucite ci, mulandu nshi te kubombela pa kuwamyako mu November? Ukubelenga kwa Baibolo ukwa mweshi onse kuli mu Amalumbo 95-109, ukulefwaya ukubelenga mupepi na mabula yatatu nelyo yane cila mulungu. Bamo basalapo ukubelengako panono cila bushiku, napamo ulucelocelo nelyo pa ntanshi fye ya kuyasendama ubushiku. Te mulandu ne nshila watantikilamo, icakatama cili ca kuti ulalobolola ubunonshi ubutuntulu ubufuma mu kubelenga Icebo ca kwa Lesa ukwa lyonse.
5 Tambika Baibolo mu November: Abantu abengi bacili balicindika Baibolo kabili baliba abaitemenwa ukukutika lintu twabelenga yene. Mu November tukalatambika New World Translation ne citabo ca Baibolo—Cebo ca kwa Lesa Nelyo ca Muntu? Ici catupeele shuko lya mu nshita ilyawamisha ilya kulangisha aba mitima ya bufumacumi ubucindami bwa Cebo ca kwa Lesa. Ba uwacincimuka mu kucite fyo.
6 Pekanya ukulandapo ukwatontonkanishiwa bwino pa mbali shapulamo isha New World Translation isho shili no kucincimusha ubuseko bwa bantu mu kupoka yene. Ebekesha pa bucindami bwa iko ububomba. Kuti walangisha umo uwa mitwe mu ciputulwa citila “Bible Topics for Discussion” no kukakanya yene ne citabo ca Baibolo—Cebo ca kwa Lesa Nelyo ca Muntu? Nelyo kuti pambi walangilila ubucindami bwa cisontelelo ca mashiwi ya mu Baibolo uwa mabula 92 pa kulangisha ifyo engalenga kabelenga ukusanga amalembo yabeleshiwa. Bakasabankanya bamo kuti pambi bafwaya ukwebekesha atemwa “Appendix” nelyo “Table of the Books of the Bible” pa kulangisha ubucindami bwa iko mu kusambilila Baibolo.
7 Ba uwashininkisha ukulondolola ukuti New World Translation yalembwa mu ciNgeleshi ca muno nshiku, icilenga yene ukuba iyaanguka ukumfwa. Ukucilanya kumo ukwa kulengo buseko na King James Version kwaba ni 1 Abena Korinti 10:25 na 16:22. New World Translation ibomfya ishina lya bulesa, Yehova, imiku 7,210.
8 Ee, Baibolo yaba Cebo ca kwa Lesa. Nga twaibelenga, ukusumina muli yene, no kubomfya ukufunda kwa iko mu bumi bwesu, tukalobolola ubunonshi ubwingi. Yalembelwe ku kutupeela ukufunda ne subilo. (Rom. 15:4) Caliba icakatama ukuti tuleipusha yene cila bushiku no kuti tuleba abaipekanya ukuibomfya mu kusambilisha bambi.