Inshila sha Kuwamishamo Ukushimikila Kwesu Ukwa Bufumu

¹ Umulimo wesu uwa kushimikila uli uwacilapo ukuba uwe pamfya ilelo ukucila kale lyonse. Nampo nga bantu bali no kupusuka nelyo ukufwa cikashintilila pa kwankulako kwabo ku mbila nsuma. (1 Pet. 4:5, 6, 17; Ukus. 14:6, 7) Pali uyu mulandu lyonse tulingile ukulafwaya inshila sha kuwamishamo ukushimikila kwesu ukwa Bufumu. Ni nshila nshi shimo isha kuwamishamo?

² Pekanya Bwino: Ukubomfya Ubutumikishi Bwesu Ubwa Bufumu ubwa nomba line, sala imipeelele iyo uleyumfwa ifyo kuti yacebusha abantu abengi mu cifulo cobe ica kubombelamo. Caliba icakatama ukuteulwila ukulandapo kobe ku mibele ya cikaya. Nelyo kuti pambi wasalapo ukupekanya imipeelele yobe we mwine, ukubomfya imfundo na Malembo ifyo wasanga pa lobe ukuba ifya kufumamo cimo. Ukakabila imitendekele ya kwimya ubuseko. (Mona icitabo ca Ukupelulula, amabula 9-15.) Napamo kuti wapanga ukwipusha mwine ŋanda icipusho ca kubalamune tontonkanyo nelyo ukumwipusha ukulandapo pa lyashi limo ilya buseko bwa cikaya. Lintu wakwata imipeelele yobe mu muntontonkanya, belesha yene mu kuba ne cilundwa ca lupwa nelyo kasabankanya umbi uwingatambika imitubululo ku kuwamyako.

³ Landa na Bantu: Imifwaile yesu yaba kupisha ubukombe bwakatama. Ici kuti cacitwa pa kubimba kakutika wesu mu kulanshanya kwabamo ubupilibulo. Nga ca kuti mwine ŋanda aimya ukukaanya nelyo apeela imimwene yakwe, kutika mu kusakamanisha ku cintu alesosa. Ukulandapo kwakwe kukakwaafwa ukupeela icasuko ca mu Malembo pe subilo lyaba muli iwe. (1 Pet. 3:15) Nga ca kuti imimwene yakwe tailesuminishanya ne ya mu Baibolo, kuti pambi mu kucenjela wasoso kuti: “Abantu abengi bayumfwa nga fintu muleyumfwa. Lelo, pano palipo inshila na imbi iya kumwenamo uyu mulandu.” Lyene belenga ilembo lyalinga, kabili leka alandepo.

⁴ Kwata Ukutantika Kwakondenkana: Ukuba uwaipekanya bwino takwakakwate ubucindami bukalamba nga ca kuti tauli na maka ya kulanda ku bantu. Banono abene mayanda tusanga pa mayanda ilelo lintu twatandala kabili ici caliseeka. Nga e fyo caba mu cifulo cobe ica kubombelamo, esha ukuteulula ukutantika kobe pa kuti wingabomba ku ŋanda ne ŋanda lintu abantu abengi bali pa mayanda. Kuti pambi wasanga ukuti inshita yawamisha iya kutandala yaba ni pa mpela sha mulungu; bambi kuti bafikwapo bwangu mu kati ka mulungu lelo mu maawala ya mu kubangilila aya cungulo bushiku. Mu ncende shimo bakasabankanya bacisanga ukuba icisuma ukucitilo bunte pa maholide ya ku calo pa mulandu wa kuti balasanga abantu abengi pa mayanda. Abantu ilingi line balaba mu mibele yakokoloka kabili balaba baitemenwa ukulanshanya pa tushita twa musango yo. Kuti cawama ukuteulula imitendekele yobe ukulingana na ko kashita kabili lyene ukukakanya ukulandapo kobe no mutwe wa mu Malembo.

⁵ Pimununa Amaka ya Mipeelele Yobe: Pa numa ya kufuma pa mwinshi umo na umo, ipushe we mwine auti: ‘Bushe nacifika pa mutima wa kwa mwine ŋanda? Bushe nacimulenga ukuilumbulwila kabili bushe nacilapeelako ukusakamana ku cintu acilasosa? Bushe nacasuka mu kucenjela? Mu cilolwa ca mibele, bushe nacibomfya imitununukile yawamisha?’ Kuti caba icakwaafwa ukubomba na kasabankanya wabelesha nelyo painiya mu nshita mu nshita no kukutika mu kusakamanisha ku mipeelele yakwe mu kuba ne cilolwa ca kuwamyako amaka yobe aya mu butumikishi.

⁶ Nga ca kuti uli uwalamuka mu mulimo obe, ukaba na maka ya kwakana icine ca Bufumu ico ‘cikapususha iwe na ’balekuumfwa.’—1 Tim. 4:16; Amapi. 22:29.