Ipekanishisheni Imipeelele Yenu mwe Bene iya Bamagazini
1 Tulatasha bamagazini ba Ulupungu lwa kwa Kalinda na Loleni! pa mulandu wa fipande fyabo ifyalingana ne nshita kabili ifya kufunda, ifikolobonda muli fyonse ukufuma fye ku milandu ya calo ukufika na ku “fyashika fya kwa Lesa.” (1 Kor. 2:10) Ifwe bonse tulebukisha ifintu fipya kabili ifya kukuulilila ifyo twabelenga muli aba bamagazini, abo Yehova alebomfya ku kusokolola icine panono panono. (Amapi. 4:18) Tulefwaya ukuba abaswatuka mu kubananya ukufika apo twingapesha.
2 Bebeteni Icifulo Cenu ica Kubombelamo: Bantu ba musango nshi bekala mu ncende yenu? Nga ca kuti lyonse balipamfiwa, pambi kuti mwakabila ukupekanya imipeelele iipi kabili iilefika pa cishinka. Nga ca kuti mwakwata icifulo umo abantu bashapamfiwa nga nshi, pambi kuti mwalanda ifyafulilako. Nga ca kuti abene mayanda abengi balabomba mu kasuba, pambi kuti mwatunguluka ilyo mwatandalila amayanda yabo mu cungulo kasuba nelyo icungulo bushiku. Pambi kuti mwalanshanya na bamo mu kasuba ukupitila mu bunte bwa mu musebo nelyo ukubomba mu matuuka. Bakasabankanya bamo balakwata ifya kufumamo ifisuma ukupitila mu kutununuka abantu mu lyashi fye mu fifulo bemikamo bamotoka na mu mishiika.
3 Beleshanyeni na Bamagazini: Belengeni magazini umo umo mu kwangufyanya fye lintu mwaupokelela. Saleni ifipande ifyo mulemona fingacebusha abantu mu cifulo cenu. Malyashi nshi yalebambukila? Fwayenimo icishinka ca kulungatika ico mwingambula ukufuma mu cipande ico mulepanga ukubomfya. Tontonkanyeni pa cipusho ico mwingepusha ku kucincimusha ubuseko. Salenimo ilembo lya pa nshita yalinga ilya kubelengela mwine ŋanda nga ca kuti mwakwata ishuko lya kucita ifyo. Tontonkanyeni pa fintu mwingemika umufula wa cipempu ca kubwelelamo.
4 Ipekanishisheni Amashiwi ya Kutendekelako: Saleni mu kusakamanishisha amashiwi yantu mulepanga ukubomfya pa kuilondolola mwe bene no kutendeka ukulanshanya. Bamo balitunguluka pa kubomfya aya mashiwi ya kutendekelako: “Nimbelenga icipande ca kucincimusha muli uyu magazini, kabili ndefwaya na bambi babelengeko.” Abengi batendekelako ne cipusho ico ciletonta pa cishinka ca kulandapo ico balepanga ukubomfya. Ku ca kumwenako:
5 Nga ca kuti mulelangisha icipande cilelanda pa kwanana kwa misoka, kuti mwaipusha ukuti:
◼ “Cinshi cingafwaikwa pa kuti twingalasendama ubushiku ukwabula umwenso wa kwibilwa nelyo ukucenwa?” Londololeni ukuti namukwata ifyebo fimo pa lwa nshila ya kupwishishamo ubu bwafya. Iyi nshila mu kwangufyanya ikafumyapo umusango onse umbi uwa cimfulumfulu ca mu bwikashi na co cine. Landeni pa cintu cimo muli magazini ico ciletambika isubilo lya musango yo. Lintu mwabwelelako, kuti mwatwala mwine ŋanda ku cipandwa 1 mu citabo ca Ukwishiba.
6 Lintu muletambika icipande pa lwa bumi bwa lupwa, napamo kuti mwatila:
◼ “Abafyashi abengi balacisanga ukuba ubwafya icine cine ukukusha ulupwa muli ishi nshiku. Ifitabo ifingi fyalilembwa pa lwa lupwa, lelo nangu fye ni ncenshi tashisuminisha. Bushe kuti kwabako umo uwingapayanya ubutungulushi bwashintililwapo?” Lanshanyeni ifyebo fya kulungatika fimo ukufuma muli magazini ifyo filelangilila ukufunda kwa mano ukusangwa muli Baibolo. Lintu mwabwelelako, lanshanyeni amatontonkanyo ya mu Malembo pa fya kukusha abana ayalondololwa mu citabo ca Ukwishiba, amabula 145-8.
7 Ilyo muletambika icipande pa lwa bwafya bwa mu bwikashi, kuti mwatila:
◼ “Abantu abengi balayumfwa abatitikishiwa pa mulandu wa nshita sha kukanshika isho tuleikalamo. Bushe muletontonkanya ukuti Lesa afwaile ukuti twikale muli iyi nshila?” Landeni pa cipande ico cilanga ifya kubomba mu kutunguluka na mafya ya lelo nelyo ico cilondolola imilandu ya kwenekela inshita ya ku ntanshi iyo iishakabemo ukusakamikwa. Pa kutandala kwenu ukwakonkapo, lanshanyeni icikope na mashiwi yalecilondolola pa mabula 4-5 mu citabo ca Ukwishiba, kabili lyene mu kulungatika tungululeni kwi sambililo lya Baibolo ilya mu ŋanda.
8 Teululeni Ifyebo Ukulinga Mwine Ŋanda: Mukakumanya abantu abatemwa ifyapusanapusana kabili aba fikulilo fyapusanapusana. Pekanyeni imipeelele ya kutendekelako iyo mwingateulula ukulinga mwine ŋanda umo umo. Muipekanye ku fintu mwingateulula ifya kulanda ku mwaume, umwanakashi, umukoloci, nelyo umusepela. Takwabako amafunde yapampamikwa pa lwa fintu mufwile ukusosa. Landeni icili conse ico mwingangukililwa ukusosa no kutunguluka bwino. Nangu cibe fyo, beni abacincimuka, landeni ukufuma ku mutima, kabili mulekutikisha. Abo ‘abasontelwa’ bakeshiba ukufumaluka kwenu kabili bakankulako bwino.—Imil. 13:48.
9 Afwaneni: Ukupitila mu kupandashanya amano, tulasambilila inshila shipya isha kuilumbulwilamo fwe bene. Pa kupituluka mu mipeelele yesu capamo cilatulenga ukuba ababelesha kabili abaicetekela. (Amapi. 27:17) Nga ca kuti mwapituluka mu fintu muleya mu kulanda, mukayumfwa abayangukililwa pa mwinshi. Calikatama ukuti abafyashi basendako inshita ya kwaafwa abana babo ukupekanya, ukukutika lintu balepituluka mu mipeelele yabo, no kubalondolwela imitubululo pa kuti bengawamyako. Abapya kuti banonkelamo mu kubomba na bakasabankanya babelesha.
10 Ukuipekanishisha imipeelele yenu mwe bene iya bamagazini takulingile ukuba ukwayafya. Caba fye kwibukisha mu kulungatika icintu cimo ica kusosa kabili lyene ukucilumbulula mu nshila ya kucebusha. Mu kuba no kuitendekelako no kutontonkanishisha libela, kuti mwapekanya imipeelele yawamisha iyo ingalenga ukwankulako kusuma.
11 Ukwananya bamagazini kwaba ni imo iya nshila shacindama isho twananishishamo ubukombe bwa Bufumu mwi sonde lyonse. Nga ca kuti mwingatambika Ulupungu lwa kwa Kalinda na Loleni! mu maboko ya bantu bafumaluka, bamagazini kuti bailandila abene. Lyonse ibukisheni ubucindami bwa aba bamagazini na fintu ubukombe bwabo bwingapususha ubumi. Uyu musango wa “kucite cisuma ne fye senge” e utemuna Yehova.—Heb. 13:16.