Peeleni Abantu Magazini Iyilanda Icine
1. Mulimo nshi uwa Ulupungu lwa kwa Kalinda na Loleni!?
1 Ulupungu lwa ka Kalinda Ulusabankanya Ubufumu bwa kwa Yehova e lyo na magazini inankwe Loleni!, fyaba pa ntanshi mu mulimo wa kusabankanya Ubufumu na mu mulimo wa kupanga abasambi. (Mat. 24:14; 28:19, 20) Lyonse tulacankwa ukupeela abantu ifi ifibombelo fibili ilyo tulebomba umutundu fye onse uwa uyu mulimo wa Bufumu.
2. Kwaluka nshi kwacitika ku Ulupungu lwa kwa Kalinda na Loleni!, kabili mulandu nshi?
2 Pa myaka iyapitapo iingi twalimona ifyo magazini yayaluka ubukulu ne fyebo fibamo ukubikako ne nshila tubomfya pa kupeela abantu iyi magazini. Ico twayalwila ifi, kufwaya ukuti magazini ilecebula abantu no kulabafikapo nga nshi, pa kuti ubukombe bwa Bufumu bwingafika pa mitima ya ‘bantu bonse pa kuti bapusuke no kufika ku kwishiba bwino bwino icine.’—1 Tim. 2:4.
3. Bushe iyi magazini ikalabomfiwa shani mu mulimo?
3 Ukutula mu January 2006, natwishiba sana ifya kulanda ifyebo fyalekanalekana pali Loleni! iifuma fye imo pa mweshi. E ico kanshi tukalacita fye cimo cine na kuli magazini ibili iya cila mweshi iya Ulupungu lwa kwa Kalinda Ulusabankanya Ubufumu bwa kwa Yehova, tukalabomfyapo imo mu mulimo wa ku cintubwingi. Ifya kutwafwa ukwishiba ifya kulanda pali magazini imo imo fiba ku numa ya Ubutumikishi Bwesu Ubwa Bufumu. Ilingi line ifi ifya kutwafwa filanda pa fipande fya kubalilapo muli magazini, lelo limo na lyo filalanda na pa fipande fimbi ifilekuma abantu abengi. Iyi mitubululo kuti yabomba bwino sana nga ca kuti twapitulukamo no kubelesha sana icipande ca mu Ulupungu lwa kwa Kalinda ululelandwapo mu mitubululo e lyo no kulanda iyi mitubululo mu mashiwi yesu ilyo tuli mu cifulo tulebombelamo.
4. Mulandu nshi limo cingabela bwino ukubomfya inshila shimbi ishiibeleele fye ku shili mu Ubutumikishi Bwesu Ubwa Bufumu?
4 Nangu ca kutila mu Ubutumikishi Bwesu Ubwa Bufumu kuti mwaba inshila shibili isha kupelelamo magazini imo imo, na lyo line nga mulefwaya tamulingile ukumfwa umwenso ukubomfya inshila iibeleele fye kuli isho nshila. Umulandu umo uo mwingacitila ifi wa kuti pali ifi ifipande, limbi cimo kuti cakuma sana abantu mu cifulo cenu. E lyo limbi kuti mwamona ukuti nalimo kuti mwalanda bwino sana nga mwabomfya icipande ico mutemenwe sana.
5. Ilyo tamulapekanya ifya kulanda pali magazini, finshi mulingile ukucita?
5 Ifya Kupekanya Ukulanda na Bantu: Ica kubalilapo fye, nga mwasala icipande ca kulandapo mu mulimo mulingile ukwishiba sana ifilimo. Kwena te lyonse mwingalaishiba ifipande fyonse ifili muli magazini ilyo tamulatampa ukuibomfya mu mulimo wa mwi bala. Lelo kwena, mulingile ukumoneka abacincimuka kabili abafumacumi ukulosha ku cipande mwasala ukulandapo. Pa kuti mucite ifi kamo fye nga namubelesha sana ifyebo muleya mu kulanda.
6. Kuti twapekanya shani ifya kulanda?
6 Icakonkapo, mwilaumina kumo pa kupekanya amashiwi ya kwiswila. Pa kwipusha icipusho ca kutampilapo ukulanshanya kuti cawama ukwipusha icipusho cisuma ica kulungatika icikumine icipande. Pa kufika pa mutima wa muntu lyonse mulingile ukushintilila pa maka ya Cebo ca kwa Lesa. (Heb. 4:12) Saleni ilembo ilyalinga ilyampeene ne sambililo mulelandapo, sana sana ilembo ilili mu cipande ico mulelandapo. Tontonkanyeni pa fyo mwingekatanya ilembo ne cipande.
7. Kuti twacita shani pa kuti twingaya tulewamyako inshila ya kulandilamo?
7 Kamo fye Ishuko Nga Talimoneke: Pa kuti fye ukulanda na bantu kube ukwafikapo kamo fye nga natukosapo. Mulebombela pamo ne cilonganino umulimo wa kupeela abantu magazini pa Cibelushi. Peleeni abantu magazini abapokako kale impapulo shesu. Lyonse mulingile ukulapeela magazini abo musambilila nabo Baibolo e lyo na bantu na bambi abasangwapo ilyo mulecita ifipempu fya kubwelelamo. Limbi kuti mwapeela magazini abantu mulelanda nabo ilyo muleshita ifintu, ilyo muli pa lwendo, nangu ilyo mulelolela dokota mu muputule wa kupembelelamo. Mulingile ukuya mulewamyako inshila ya kulandilamo ilyo mulelanda na bantu umweshi onse.
8. Ni mu nshila nshi bamagazini ba Ulupungu lwa kwa Kalinda na Loleni! babeela abaibela?
8 Bamagazini ba Ulupungu lwa kwa Kalinda na Loleni! baliibela fye. Balasansabika Shikulu Mulopwe Yehova uwabumba fyonse mu muulu na panwe sonde. (Imil. 4:24) Balasansamusha abantu ne mbila nsuma iya Ubufumu bwa kwa Lesa kabili balakoselesha abantu ukuba ne citetekelo muli Yesu Kristu. (Mat. 24:14; Imil. 10:43) Ukulundapo, balabebeta ificitika mu calo ifilefikilisha amasesemo ya muli Baibolo. (Mat. 25:13) Afweni abantu umo umo mu cifulo cenu ukunonkelamo muli ishi mpapulo, na pa kuti mubanonshe kamo mulepekanya ukupeela abantu magazini inshita fye yonse kamo fye ishuko nga talimoneke!
9. Kuti twacita shani nga tulefwaya tukakwate apa kutendekela ilyo twabwelela ku bantu twashimikile?
9 Nga ca kuti mwapeela umuntu magazini apoka no kupoka, nangu fye nga ca kuti mulelanshanya no muntu Icebo ca kwa Lesa namuteeka no mutima, na lyo line kuti mwamwipushako icipusho nangu ukubalamuna ilyashi ilya kuti lyakana ukupwa mpaka mukabweleleko mu kuyalanshanya nankwe amashiwi ya kwa Lesa. Nga ca kuti kwena natukosa mu kutanda icine, te kuti tuletwishika no kutwishika ukuti Yehova akatontolola imitima ya bantu abafumacumi abafwaya ukumwishiba no kumubombela.—1 Kor. 3:6.