Ifya Kubomfya Ifilangililo fya pa Kushalika Impapulo
1. Bushe tufwile ukumona shani ifilangililo fya pa kushalika impapulo?
1 Ifilangililo fya pa kushalika bamagazini besu ne mpapulo shimbi filabamo lyonse mu Ubutumikishi Bwesu Ubwa Bufumu. Ilyo tuli mu mulimo, tatulekabila ukulanda filya fine ifi filangililo filembelwe. Fyabelako ukutwafwa ukwishiba ifyo twingalanda. Kuti twashimikila bwino nga ca kutila tulelanda mu mashiwi yesu. Nga tatulekonkelesha amashiwi yalembwa ilyo tuleshimikila mwine ng’anda kuti atumfwa bwino kabili e lyo cingeshibikwa ukutila ifyo tulelanda filefuma pa nshi ya mutima.—2 Kor. 2:17; 1 Tes. 1:5.
2. Cinshi tulingile ukutontonkanishisha pa ntambi shaba mu cifulo ilyo tulepekanya ifya kuyalanda?
2 Landeni Ifilingile Aba Kuli iyo Ncende: Umusango tulandilamo imbila nsuma ku bantu ufwile walingana ne ntambi sha kuli iyo ncende. Ilyo muletendeka ukulanshanya na mwine ng’anda, bushe kutala mwaposhanya, nelyo bushe abantu mu ncende mwaikala bafwaya abantu balanda fye apo pene ico bendeele? Kwena kumbi kuti caba ifyo fine kumbi na ko te kuti cibe fyo e lyo abantu na bo balapusanapusana. Pa kwipusha amepusho na po pakabila ukucenjela. Ifyo twingepusha abantu baba mu ncende imo, limbi teti fiwame ku bantu baba ku ncende imbi. E ico, tufwile ukucenjela no kulanda ifilingile abantu ba kuli iyo ncende.
3. Mulandu nshi tufwile ukutontonkanishisha pa nkulilo e lyo ne fyo abantu tulelanda na bo baaba?
3 Kabinge, ilyo tulepekanya ifya kulanda mu mulimo wa mwi bala, tufwile twatontonkanya pa nkulilo ya bantu baba mu cifulo tubombela ne fyo baaba. Ku ca kumwenako, ifyo mwingalanshanya Mateo 6:9, 10 no muntu wakosa ukupepa ku Katolika teti filingane ne fyo mwingalanda no muntu ushaishiba ipepo lya “We Shifwe.” Nga twaibikilishako fye panono ukutontonkanya pa bantu baba mu cifulo tubombela, kuti twalanshanya na bo ukulingana ne fyo baaba pa kuti batemwa ifyo tulelanda na bo.—1 Kor. 9:20-23.
4. Ukupekanya bwino cinshi kwawamina?
4 Nangu tupangile ukuyalanda filya fine ifilangililo filembelwe, tufwile twapekanya bwino. Tufwile twabelenga bwino bwino ifilembelwe nelyo icipandwa tulefwaya ukuyalanshanya na bantu no kufwayamo ifishinka fingalenga batemwa icebo. Lyene, ilyo mulelanshanya na bo, bikenimo ifyo fishinka. Ukwishiba ifyebo fisuma ifili mu mpapulo shesu, e kukatulenga ukucincimuka pa kupeela isho mpapulo.
5. Mulandu nshi twingapekanishisha ifya kulanda fimbi, kabili kuti twapekanya shani?
5 Inshila Shimbi Isha Kulandilamo: Bushe lyonse kano fye twabomfya ifilangililo fyalembwa pa kulanda na bantu? Iyo. Nga ca kutila icingamwangukila kulanda ifyebo fimbi nelyo ukubelenga ilembo limbi, ninshi cili fye bwino. Maka maka nga muleshalika bamagazini, kuti mwafwayako ifipande fimbi ifili mu kati ifyo abantu baba mu cifulo mubombela bengatemwa. Nga kuli icilangililo mu Kulongana kwa Mulimo pa fya kulanda mu mulimo wa mwi bala, nalimo kuti mwalangilila icibomba bwino mu cifulo mubombela. Muli uyu musango e mo twingafwila bonse ukubila imbila nsuma bwino.