Nga Shilebomba, Shibomfyeni!
1 Ubutumikishi Bwesu Ubwa Bufumu lyonse bulatupayanishisha imitubululo yalekanalekana iya nshila sha kulandilamo isha kubomfya mu butumikishi. Ici citupeela amatontonkanyo yapya pa lwa fya kulenga umo ukufwaisha ukwishiba ubukombe bwa Bufumu. Kuti capinda ifyo cila mweshi mubombeshe ku kusambililako inshila ya kulandilamo imo nelyo shibili. Nangu cibe fyo, bakasabankanya bamo kuti basange fyo cilya fye babomfya imitubululo imo pa miku inono, Ubutumikishi Bwesu Ubwa Bufumu na bumbi bwapayanya inshila sha kulandilamo ishipya. Kwena te bonse bengasambilila inshila ya kulandilamo ipya lintu bashilabelesha iyafumineko.
2 Kwena, kwaliba imyanda ya bapainiya na bakasabankanya bambi abapoosa inshita ikalamba mu mulimo wa mwi bala. Ukulundapo, ifilonganino ifingi fibomba mu cifulo cabo conse nga papita fye imilungu inono. Muli iyi mibele, bakasabankanya balatemwa ukukwata inshila sha kulandilamo ishipya na matontonkanyo pa lwa kushimikila ubukombe. Ici cilabaafwa ukuwamyako ukulamuka kwabo. Na kabili cilenga ubutumikishi bwabo ukuwaminako no kulete fisabo kabili cilabaafwa ukucimfya amafya bakumanya.
3 Nangu cibe fyo, nga mwalipekanya inshila sha kulandilamo ishibomba bwino mu kwimya ubuseko, twalilileni ukushibomfya! Tacilekabilwa ukuleka ukubomfya inshila ya kulandilamo iilebomba fye bwino. Yaluleni fye ukulingana no lupapulo lwa kushalika uyo mweshi. Ilyo mulepita mu mitubululo ipeelwa mu Ubutumikishi Bwesu Ubwa Bufumu, fwayenimo ifishinka fisuma ifyo mwingafwaya ukukakanya mu nshila shenu isha kulandilamo.
4 E co lintu mwapokelela Ubutumikishi Bwesu Ubwa Bufumu ubupya, ibukisheni ukuti inshila shibamo isha kulandilamo shiba mitubululo fye. Nga kuti mwashibomfya, cisuma. Lelo nga mwalikwata inshila sha kulandilamo ishilenga abantu mu cifulo cenu ukukutika, shibomfyeni! Icacindama ‘kufishapo bukapyunga bwenu’ bwino, ukufwaya abayana no kubaafwa ukuba abasambi.—2 Tim. 4:5.