Ifyo Twingapekanya Ifya Kulanda Pali Bamagazini
1. Mulandu nshi cawamina ukuipekanishisha ifyebo fyenu mwe bene ilyo mulepeela abantu bamagazini ukucila ukulanda filya fine fye ifiba mu Ubutumikishi Bwesu Ubwa Bufumu?
1 Nalimo kuti mwaipusha ukuti ‘Mu Ubutumikishi Bwesu Ubwa Bufumu cila mweshi mulaba ifya kulanda pali bamagazini, nomba mulandu nshi uo na ifwe tulingile ukupekanya?’ Ca cine, abengi balabomfya bwino iyi mitubululo iba mu Ubutumikishi, lelo na ifwe tufwile ukupekanya. Ifyebo twingalanda pa kupeela abantu bamagazini ku cifulo cimo te fyo twingalanda na ku ncende imbi. Kanshi, tatufwile ukumona kwati tufwile ukulanda filya fine fye imitubululo iba mu Ubutumikishi Bwesu Ubwa Bufumu. Nga ca kuti twasala ukubomfya inshila imo pali shilya shiba mu Ubutumikishi, kuti cawama ukulanda mu mashiwi yesu.
2. Finshi twingacita pa kusala ilyashi lya kulanda pa kupeela abantu magazini?
2 Saleni Ilyashi Mukalandapo: Nga mwapwisha ukubelenga magazini, saleni ilyashi ilyo mulemona ukuti abengi uko mwikala kuti batemwa ukulibelenga kabili maka maka ilyo na imwe mutemenwe. Nga mulelanda, cilemoneka no kumoneka ukuti namwishiba bwino ifili muli ilyo lyashi kabili mulecincimuka ilyo mulelondolola, ukucita ifyo kukalenga umwine wa ng’anda ukufwaya ukubelenga ilyo lyashi. Nangu ca kutila mukalalanda fye pa lyashi limo ilili muli magazini ilyo abengi bengatemwa uko mushimikila, lelo ishibeni bwino na malyashi yambi ayali muli magazini. Ici cikalenga mwayalula ifya kulanda ilyo mwakumanya umuntu uwatemwa ilyashi limbi ilili muli magazini.
3. Bushe mutendeka shani ukulanshanya na bantu ica kuti mwafuma ne fisuma?
3 Ipusheni Icipusho: Lyena, pekanyeni bwino amashiwi mukabalilapo ukulanda. Intendekelo yalicindama. Kuti mwapekanya icipusho icisuma icingalenga umwine wa ng’anda ukufwaya ukubelenga ilyo lyashi musalile. Ilingi line ifipusho ifingalinga ni filya ifya kuti umuntu pa kwasuka alondolola. Tamufwile ukwipusha ifya kuti umuntu afilwa ukwasuka nelyo ifipusho fya kuti amona kwati mulesusha ifyo aishiba.
4. Fisuma nshi fyaba mu kubelengela umwine wa ng’anda ilembo nga calinga?
4 Belengeni Ilembo: Ica kulekelesha ca kutila, saleni ilembo ilyo mukabelenga ilikalinga umuntu mwasanga, nalimo ilili na mu cipande cine mukalandapo. Ukubelenga ilembo kukafwa umwine wa ng’anda ukumona ukuti ubukombe bwesu bufuma mu Cebo ca kwa Lesa. (1 Tes. 2:13) Ilembo na kabili likaba e bunte bwine nga ca kuti akaana ukupoka bamagazini. Ico bamo bacita pa kulenga abantu ukufwaya ukusambilila kubalilapo ukubelenga ilembo ilyo tabalaipusha icipusho. Nalimo amashiwi mwingalanda pa kubelenga ilembo, ni aya: “Ndefwaya ukumfwa ifyo mwingalandapo pali aya mashiwi yaba muli ici cikomo ca mu Baibolo.” Lyena langeni uyo muntu ilyashi lili muli magazini, kabili landenipo panono pali ilyo lyashi pa kuti uyo muntu atemwe ukulibelenga, lyena mupeeleni magazini.
5. Finshi mulingile ukwibukisha ilyo mulepekanya ifyebo fya kulanda pa kupeela abantu bamagazini?
5 Takwaba amafunde aya kukonka ilyo tulesala ifyebo fya kulanda ilyo tulepeela abantu bamagazini. Icikalamba fye ca kuti tulingile ukwangusha ifyo tulelanda kabili amashiwi yesu yafwile ukuba ayanono. Landeni ifingamwangukila kabili ifyo abantu bengatemwa ukumfwa. Komaileni pa fisuma ifili muli bamagazini, kabili cincimukeni ilyo mulelanda. Nga namupekanya bwino, mukalashalika bwino bamagazini ba Ulupungu lwa kwa Kalinda na Loleni! kuli bonse ‘abalemenena ku bumi bwa muyayaya.’—Imil. 13:48.