Bushe Mulefishapo Bukapyunga Bwenu?
1 Mwi buuku lya Imilimo, twaebwa ukuti abasambi ba kwa Yesu bafishishepo bukapyunga bwabo pa kucitila ubunte no “kushimikisha” ku bantu. (Imilimo 2:40; 8:25; 28:23) Ico cine e co na umutumwa Paulo wine alefwaya ukucita. (Imilimo 20:24) Bushe na imwe te co mufwaya ukucita nga kashimikila wa mbila nsuma? Kuti mwafishapo shani bukapyunga bwenu?
2 Pekanyeni Ifya Kulanda: Pa kushimikila bwino mu butumikishi, ukupekanya kwalicindama. Ukupekanya kulakabilwa sana pa kushalika bamagazini pantu lyonse fye bamagazini balanda pa fyapusanapusana. Pa kutwafwa ukuipekanya bwino, ukutendeka muli buno Ubutumikishi Bwesu Ubwa Bufumu muli umukululo upya lwa ku kuso, apali ifyebo fimo ifingalandwa pali bamagazini abapya aba Ulupungu lwa kwa Kalinda na Loleni! Ilyashi limo ilisuma ilyo abantu abengi bengatemwa ukumfwa lyakulalandwapo muli magazini onse uwafuma. Bushe kuti mwalandapo shani pali ifi fyebo finono?
3 Saleni ifyebo mulemona ukuti e fingawama sana mu cifulo cenu ica kubombelamo. Belengeni bwino bwino icipande cilelandwapo no kumonamo ifishinka fya kulungatika ifingalenga umuntu ukufwaya ukushala na magazini. Fwayeni ilembo mu cipande ilikumine ifyebo mulelanda pa kuti mulibelenge kuli mwine ng’anda. Landeniko na mashiwi ya kusondwelela aya kukoselesha umuntu ukubelenga magazini kabili nga mwamona calinga, mulondolweleni ne fyo engapeelako ubupe ku mulimo wa mwi sonde lyonse uwa Nte sha kwa Yehova. Nomba, pitulukeni mu fyebo mulefwaya ukuyalanda.
4 Pekanyeni Ukubelengako Baibolo: Nga mwapekanya bwino, ilingi line kuti mulebelengako ne lembo ilyo mwalanshanya no muntu. Ku ca kumwenako, bakasabankanya ababelesha mu fyalo ifingi balebomba bwino pa kuya fye pa mwinshi nabekata na Baibolo ku minwe, cilya baposha mwine ng’anda batila:
◼ “Tuleipusha abantu nga balisumina aya mashiwi . . . ” Belengeni Ukutendeka 1:1, lyene ipusheni ukuti: “Bushe mwasumina aya mashiwi?” Nga asumina, soseni amuti: “Na ine wine nalisumina. Lelo, bushe kuti mwatila apo Lesa e wabumbile fyonse, ninshi e walenga no bubi?” Pa numa ya kwankula ku fyo engasuka, belengeni Lukala Milandu 7:29. Kupukuleni icitabo ca Ukwishiba pe bula 71, no kubelenga paragrafu 2. Mukoselesheni ukubelenga icitabo. Nga ca kutila mwine ng’anda tasumine amashiwi ya pa Ukutendeka 1:1, mukoselesheni ukusoma icitabo ca Creation.
5 Bweleleniko Kuli Bonse Abalefwaya Ukusambilila: Te kuti mufishepo bukapyunga bwenu nga tamulebwelela ku bantu mwasangile abalefwaya ukusambilila. Nga mwalanshanya bwino no muntu, te mulandu ni bamagazini ashala na bo nelyo ni mpapulo shimbi, lembeni ishina lyakwe na adresi. Esheni na maka ukulundulula ukufwaisha kwakwe pa kubwelelako bwangu. Esheni sana ukutambika uyo muntu isambililo lya Baibolo.
6 Abena Kristu ba mu mwanda wa myaka uwa kubalilapo balishibe ukuti Yesu abebele ‘ukubila no kushimikisha.’ (Imilimo 10:42) Na ifwe bene e fyo atweba, pantu e nshila fye yabako pa kupanga abasambi. (Mat. 28:19, 20) Natubombeshe na maka yonse ku kufishapo bukapyunga bwesu.—2 Tim. 4:5.