Ukusambilisha Abapya Ifya Kushimikila
1. Bushe mwaumfwile shani ilyo mwaile mu kushimikila pa muku wa kubalilapo?
1 Bushe mulebukisha ifyo cali umuku wa kubalilapo mwaile mu kushimikila ku ng’anda ne ng’anda? Nakalimo mwalyumfwile umwenso sana. Nga mwaleshimikila pamo na balemusambilisha Baibolo nelyo mwalebomba na kasabankanya umbi, mufwile mwalitemenwe pa fyo bamwafwile. Nomba apo na imwe mwalishiba ukushimikila bwino, kuti mwayafwa no kukansha abapya ifya kushimikila.
2. Finshi bakasabankanya abapya balingile ukusambilila?
2 Bakasabankanya abapya balingile ukusambilila ifya kutendeka ukulanshanya na bene ba mayanda ifya kubomfya Baibolo, ifya kubwelelamo ku bantu bashimikiile, ifya kutendeka amasambililo ya Baibolo ne fya kulayatungulula. Na kabili aba bakasabankanya abapya balingile ukusambilila ifya kubomba inshila shalekanalekana isha kushimikilamo, pamo nga ukushimikila mu musebo, nangu mu ncende sha makwebo. Kuti mwabafwa ukulabomba bwino muli ishi nshila twalandapo ilyo balemona ifyo mulecita e lyo na lintu mulebalondolwela ifya kucita.
3. Bushe kuti twaafwa shani bambi ku fyo tucita?
3 Lekeni Basambilile Ku ca Kumwenako Cenu: Yesu tapelele fye pa kweba abasambi ifya kusambilisha, lelo alebalangilila ne fya kushimikila. (Luka 8:1; 1 Pet. 2:21) Ilyo tamulaya mu kushimikila na kasabankanya umupya, pekanyeni ifya kuyalanda ku bantu mwalasanga ifyo na kasabankanya umupya engasambililako, napamo kuti mwabomfya ne fyebo fyaba mu mpapulo shesu. Lyena mwebeni ukuti ni mwe mwalalanda no muntu umo nelyo babili abo mwalabalilapo ukusanga, pa kuti kasabankanya omfwe ifyo mwalalanda. Nga mwapwisha ukulanda no muntu umo, kabili ilyo mushilatendeka ukushimikila umbi, kuti mwaipusha kasabankanya umupya ukulanda ifyo acimona ne fyo asambililako ilyo mwacilashimikila. Nga mulecita ifi, e lyo bakamona ukuti ukubomba na bambi mwi bala kwalicindama nga nshi, kabili cikabangukila ukukonka ilyo mulebebako mumo mumo umo balekabila ukuwamyako nga bapwisha ukushimikila.
4. Kuti twayafwa shani kasabankanya umupya pa numa ya kukutika ku fyo aleshimikila?
4 Balondolweleni Ifya Kucita: Yesu alyebele abasambi bakwe ifya kucita pa kushimikila. (Mat. 10:5-14) Na imwe bene kuti mwa-afwa kasabankanya umupya. Nga ca kuti kasabankanya atendeka ukulandapo, kutikeni bwino bwino. Lyena nga mwafumapo, tasheni kasabankanya ukufuma pa nshi ya mutima, nangu ca kuti mwacimona ukuti alekabila ukuwamyako mumo mumo. Ilyo mushilamweba umo alekabila ukuwamyako, kuti mwatala mwamona nga alalungika umo acilufyanya ilyo alashimikila pa ng’anda iikonkelepo. Napamo mwenso fye akwete. Muleibukisha ukutila bakasabankanya balipusana mu fyo bengacita, kabili kwaliba inshila ishingi isha kucitilamo ifintu.—1 Kor. 12:4-7.
5. Finshi twingalanda nga ca kuti tulefwaya ukwafwa kasabankanya umupya pa kushimikila?
5 Inshita shimo kasabankanya umupya kuti atwipusha ukuti tumwebeko ifya kucita. Lelo nga tatwipwishe, tufwile ukuitendekelako ukumwafwa. Kuti twamwafwa shani mu nshila isuma? Bakasabankanya bamo abaishiba sana ukushimikila kuti baipusha umupya ati, “Bushe kuti namilangako ifya kucita?” nelyo, “Bushe iyi nshila twabomfya pa kushimikila mwaimona shani?” Limbi kuti mwalanda fye no kuti, “Ilyo nali kasabankanya umupya, nalekwata ubwafya bwa . . . , lelo ifyangafwile sana ni . . .” Limo cilawama ukubelengako ne fyebo fimo ifingamwafwa capamo na kasabankanya umupya. Pa kutila ifyebo fifulila kasabankanya umupya, landeni fye pa cintu cimo pali filya acilanda pa kushimikila.
6. Bushe amashiwi ya kuti ‘icela cinoona icela’ yabomba shani ilyo tuleshimikila?
6 Icela Cinoona Icela: Timote uwaishibe sana ifya kubomba umulimo wa kushimikila, balimwafwile nga nshi kuli Paulo ukuti atwalilile ukubika amano ku kusambilisha no kulunduluka. (1 Tim. 4:13, 15) Nangu ca kutila napapita inshita iitali ukutula pantu mwailile mu kushimikila pa muku wa kubalilapo, te kwesha ukuleka ukulawamyako inshila mubomfya pa kushimikila. Sambilileni kuli bakasabankanya abo mulebomba nabo, pamo fye na balya abashilaishibisha ifya kushimikila, kabili mulebika amano ku kwafwa bambi cikuuku cikuuku, maka maka bakasabankanya abapya pa kuti bakafikepo ukuba bakashimikila ba mbila nsuma.—Amapi. 27:17.