Ifingatwafwa Ukulashimikila Bwino—Muleafwa abo Muleshimikila Nabo

Ico Cacindamina: Yesu alishibe ukuti calicindama ukukwata uwa kushimikila nankwe. E ico, ilyo atumine abasambi bakwe 70 mu kushimikila, abatumine babili babili. (Luka 10:1) Ukubomba babili kusuma pantu bakasabankanya kuti baleafwana nga ca kuti umo akwata ubwafya nelyo nga teshibe bwino ifya kwasuka icipusho bamwipusha. (Luk. Mil. 4:9, 10) E lyo uo mulebomba nankwe kuti amwebako fimo ifingamwafwa ukulashimikila bwino. (Amapi. 27:17) Na kabili ilyo muleya kuti amushimikilako na fimo ifingamukoselesha.—Fil. 4:8.

Ifyo Mwingacita:

Uo mulebomba nankwe nga atendeka ukushimikila, mulingile ukubikako sana amano ku fyo alelanda. (Yako. 1:19) Nga atendeka ukubelenga ilembo, na imwe fwayeni ilyo ilembo no kulakonkamo. Ici cikalenga mwaishiba umo mwingafwa uo mulebomba nankwe.
Tamufwile ukucilima uo mulebomba nankwe nga alelanda, mulingile ukumona ilyo mufwile ukulandapo. (Amapi. 25:11) E lyo nga mwaya na kasabankanya kwi sambililo lyakwe, kuti atemwa nga mulelandapo limo limo ukucila ukwikala fye tondolo. Nomba nga muleshimikila ku ng’anda ne ng’anda, uo mulebomba nankwe nalimo kuti atemwa nga ca kuti ilyo mwafika pa ng’anda apo alingile ukulanda, mwaleka e walanda. E lyo nga mulebomba na kasabankanya umupya nelyo nga uo mulebomba nankwe teshibe bwino ifya kwasuka icipusho bamwipusha, kuti atemwa ukumwafwa. Lelo, nga tuleshimikila ku ng’anda ne ng’anda, nga tulecita icipempu, nelyo nga tuli pe sambililo lya Baibolo, tufwile ukwishiba ukuti tacawama ukucilima abo tulebomba nabo, ukuletamo ilyashi limbi nelyo ukulandapo sana ica kuti twapoka no mwine.
Ebeniko uo mulebomba nankwe ifyo mucita. Nga mwamona kuti mulingile ukumwebako fimo ifingamwafwa ukulashimikila bwino, tamulingile ukumfwa umwenso. (Amapi. 3:27) Ilyo apwisha ukushimikila, nga mwamona ukuti mulingile ukumwafwa pali iyo nshita kuti mwamwipusha fye ukuti: “Wamona shani ifyo wa cishimikila palya?” Nelyo kuti mwatila, “Bushe kuti na kwebako fimo?” Nelyo kuti mwatila “Lekeni imwebeko ifyo ncita.” Muleibukisha ukuti nangu ca kutila abantu bamo balomfwa bwino ukubalungika limo limo, balafuupulwa nga mwikalile fye ukubalungika.

Uno Mweshi Esheniko Ukucita Ifi:

Nga mwainuka mu mulimo wa kushimikila, ebeni uo mwacibomba nankwe fimo ifyo acicita ifya cilangilila ukuti aciba ni kafwa musuma ilyo mwacilashimikila.