Mulekoselesha abo Mulebomba Nabo
1. Kuti twapashanya shani Paulo ilyo tulebomba na bambi mu mulimo wa mwi bala?
1 Umutumwa Paulo alemona inshita aleba na Bena Kristu banankwe ukuti ni nshita ya kukoseleshanya. (Rom. 1:12) Bushe na imwe nga muleshimikila na kasabankanya umbi, mulabomfya iyi nshita ku kumukoselesha no kumwafwa? Kuti cawama ukushimikilako abo mulebomba nabo ifyamwafwa ukulashimikila bwino.
2. Finshi twingacita pa kwafwa abo tulebomba nabo ukukanaba sana no mwenso kabili mulandu nshi ici cacindamina?
2 Mulebafwa Ukukanaba no Mwenso: Bakasabankanya bamo balaba sana no mwenso ilyo baleshimikila. Kuti nga balelanshanya no muntu balemoneka fye aba mwenso icine cine. Nomba nga tulebatasha ukufuma pa nshi ya mutima ilyo babomba bwino, tukabafwa ukupwisha umwenso. Finshi fimbi twingacita pa kubafwa ukupwisha umwenso? Kangalila wenda umo asanga ukuti ukwebako abo alebomba nabo ifyo acita pa kupwisha umwenso ne fyo ipepo limwafwa ukuicetekela, kulabafwa. Ilyo alelanda pa cimwafwa ukukanaba sana no mwenso, munyinefwe umbi na o atile: “Ukumwentula kulangafwa sana. E lyo limo na pa kuti fye imwentule kano na pepa.” Bushe kwaliba icimwafwa ukukanaba sana no mwenso ilyo muleshimikila? Kuti cawama ukulaebako abo mulebomba nabo.
3. Finshi twingebako abo tulebomba nabo ifingabafwa ukulashimikila bwino?
3 Mulebebako Ifimwafwa Ukushimikila Bwino: Bushe kwaliba amashiwi nelyo icipusho ico mwasanga ukuti cilamwafwa ukutendeka bwino ukushimikila? Bushe kwaliba imitubululo iyaba mu Butumikishi Bwesu Ubwa Bufumu iyo mwalundako amashiwi yamo, iyo abantu bomfwa bwino ukukutika nga muleshimikila? Nga ni ifyo, kuti cawama ukulaebako abo muleshimikila nabo. (Amapi. 27:17) Ilyo muleya ku cipempu, kuti mwaebako abo mulebomba nabo ifyo muleya mu kulanshanyapo ne fyo mulefwaya ukuyapwishishisha. E lyo nga mwacilatungulula isambililo, pa numa kuti mwalondolwela abo mulebomba nabo umulandu mwacilandila sana pa cishinka cimo, ico mwacibelengela amalembo yamo, e lyo ne co mwacibomfesha inshila shimo isha kusambilishishamo.
4. Mulandu nshi tulingile ukubikila amano ku kwafwa abo tushimikila nabo?
4 Abena Kristu ba kubalilapo tabalebika fye amano ku kwafwa abashali Bena Kristu, lelo balebika na mano ku kukoselesha bamunyinabo. (Imil. 11:23; 15:32) Ku ca kumwenako, umutumwa Paulo akanshishe Timote kabili amukoseleshe ukulaebako bambi ifyo asambilile. (2 Tim. 2:2) Na ifwe nga tuleafwa Abena Kristu banensu ilyo tuleshimikila ninshi tulecita icisuma, e lyo tukalenga balebomba ne nsansa kabili bakalashimikila na bwino. Ne cacindamisha ca kuti tukalenga Shifwe wa mu mulu ukusekelela.—Heb. 13:15, 16.