Twalilileni Ukuba Abacincila mu Mulimo wa Kubila Imbila Nsuma

UMULIMO uwacindama sana pano isonde, mulimo wa kubila imbila nsuma. Ukwabula no kutwishika, fwe babomfi ba kwa Yehova tumona ukuti twalicindama pa kulabombako umulimo wa kupanga abasambi. Lelo twalishiba ukuti bapainiya na bakasabankanya ilingi line balakwata amafya ayalenga ukuti betwalilila ukuba abacincila mu mulimo wa kubila.

Cilafya kuli bakasabankanya bamo ukusanga umuntu uwa kulanshanya nankwe ilyo baleshimikila imbila nsuma ku ng’anda ne ng’anda. Na kuba, bamo mu cifulo tushimikila tabasangwa pa mayanda. Bamo abo tusanga pa mayanda balakaana ukukutika ku mbila nsuma nelyo balakalipa nga twabatandalila. E lyo bakasabankanya bambi, balalanguluka ifyo bakapwisha ukushimikila imbila nsuma ku bantu mu cifulo babombela nga ca kuti icifulo cikalamba na bantu nga balakutika sana ku mbila nsuma. Kabili bamunyinefwe bamo balibila imbila nsuma pa myaka iingi ukucila ifyo baleenekela, ne ci calenga ukuti bafuupulwe.

Bushe kuti twapapa ukwishiba ukuti ababomfi ba kwa Yehova bonse balakwata amafya ayengalenga ukuti betwalilila ukuba abacincila mu mulimo wa kubila? Awe iyo. Na kuba te kuti twenekele ukuti, kuti twabomba bwino umulimo wa kubila imbila nsuma iya kupususha abantu mu calo ico “umubifi,” Satana Kaseebanya ateka!—1 Yoh. 5:19.

Te mulandu na mafya mwingakwata ilyo mulebila imbila nsuma, mulecetekela ukuti Yehova akamwafwa ukuyapwisha. Lelo finshi ifyo mwingacita pa kuti muleba abacincila mu mulimo wa kubila imbila nsuma? Natulande pali fimo ifingatwafwa.

MULEYAFWA ABAPYA

Cila mwaka, abantu abengi balabatishiwa no kuba Inte sha kwa Yehova. Nga e lyo mwabatishiwe, ukwabula no kutwishika kuti mwasambilila ifingi kuli bamunyinefwe ababomba imyaka iingi umulimo wa kubila imbila nsuma. Kabili nga mwalibomba umulimo wa kubila imbila nsuma pa myaka iingi, Bushe te kuti cibe bwino ukusambilisha abapya ifyakubomba uyu mulimo?

Yesu alishibe ukuti alingile ukulatungulula abasambi bakwe pa kuti balebila bwino imbila nsuma, kabili alibasambilishe ifya kubomba bwino uyu mulimo. (Luka 8:1) Na muno nshiku mwine, tufwile ukulasambilisha bambi ifya kubomba bwino umulimo wa kubila imbila nsuma.

Tatufwile ukulamona kwati kasabankanya umupya kuti aishiba ifya kusambilisha bwino nga ca kuti fye alebombako lyonse uyu mulimo. Tulingile ukusambilisha bakasabankanya abapya cikuuku cikuuku kabili mu kutemwa. Ilyo tulesambilisha bakasabankanya abapya tufwile no kubasambilisha (1) ifya kupekanya no kubalanga ifya kulanda na bantu, (2) ifya kutendeka ukulanshanya na bantu pa mayanda nelyo mu musebo, (3) ifya kushila abantu impapulo, (4) ifya kubwelela ku balefwaya ukumfwilapo na fimbi, (5) ne fya kutendeka isambililo lya Baibolo. Nga ca kuti kasabankanya umupya aishiba ukucita ifi kabili alabomfya ifyo bamusambilisha, akalabomba bwino umulimo wa kubila. (Luka 6:40) Ukwabula no kutwishika, kasabankanya umupya akalatasha sana nga ca kuti uulemusambilisha alekutika kabili alemwafwa umo alekabila ukumwafwa. Na kabili kasabankanya umupya akatemwa sana nga tulemutasha pa fyo alebomba bwino umulimo e lyo no kulamwebako ifingamwafwa.—Luk. Mil. 4:9, 10.

MULELANSHANYA NA BO MULEBOMBA NABO

Nangu ca kuti mulalanshanya bwino na bo musanga pa mayanda, inshita shimo mulatemwa sana ifyo mulanshanya na bo mulebomba nabo mu mulimo wa kubila. Muleibukisha ukuti Yesu atumine abasambi bakwe “babili babili.” (Luka 10:1) Ilyo balebombela pamo, balekoseleshanya. Kanshi ilyo tulebombela pamo na bamunyinefwe tufwile ukulakoseleshanya “umo na umo ku citetekelo ca mubiye.”—Rom. 1:12.

Finshi mwingalanshanyapo? Bushe fisuma ifyacitike nomba line? Bushe kwaliko icishinka cimo ico mwatemenwe sana ilyo mwaleisambilisha Baibolo nelyo ico mwasambilile pa mapepo ya lupwa? Bushe kwaliko fimo ifyo mwasambilile pa kulongana ifyakoseshe icitetekelo cenu? Limo limo, tulabomba na bakasabankanya abo tatubomba nabo lyonse. Bushe mwalishiba ifyo basambilile icine? Cinshi calengele bashininkishe ukuti icilonganino babamo ca kwa Yehova? Milimo nshi imo iyo babombapo mu cilonganino nelyo fisuma nshi fimo ifyacitika ifyo bamonapo? Nalimo na imwe kuti mwabebako ifisuma fimo ifyacitika ifyo mwamonapo. Nangu abantu muleshimikilako imbila nsuma balekutika nelyo iyo, ukubomba na bakasabankanya bambi mu mulimo wa mwi bala kulalenga twaba ne shuko lya “kukuulana.”—1 Tes. 5:11.

MULEISAMBILISHA BWINO IFYAKWA LESA LYONSE

Nga tulefwaya ukutwalilila ukuba abacincila mu mulimo wa kubila imbila nsuma tufwile lyonse ukulaisambilisha bwino ifya kwa Lesa. “Umusha wa cishinka kabili uwashilimuka” alapekanya ifyebo ifilanda pa masambililo ayalekanalekana. (Mat. 24:45) Kanshi kuti mwasambilila pa masambililo ayalekanalekana. Natulande pe sambililo ilisuma ilyo mwingatemwa ukusambililapo ilyo muleisambilisha ifya kwa Lesa: Mulandu nshi umulimo wa kubila imbila nsuma wacindamina sana? Mu kabokoshi akaleti: Mulandu Nshi Mufwile Ukutwalilila Abacincila mu Mulimo wa Kubila? Muli ifishinka ifingatwafwa ukwishiba ifyo umulimo wa kubila wacindamina.

Nga muletontonkanya pa fishinka ifilandilwepo mu kabokoshi kuti mwatwalilila ukuba abacincila mu mulimo wa kubila. Fishinka nshi fimbi ifyo na imwe mwingalanda ifilanga ukuti umulimo wa kubila walicindama? Lyena tontonkanyeni pali ifi fishinka na pa malembo ayalanda pali ifyo fine fishinka. Ukwabula no kutwishika ukucita ifi twalandapo kukamwafwa ukuba abacincila mu mulimo wa kubila.

MULEKUTIKA KU FYO BAMBI BALEMWEBA IFINGAMWAFWA

Icilonganino ca kwa Yehova lyonse cilatweba ifingatwafwa ukulabomba bwino umulimo wesu uwa kubila imbila nsuma. Ku ca kumwenako, ukulunda pa kubila imbila nsuma ku ng’anda ne ng’anda, kuti twalabila ukubomfya amakalata, foni, ukulabila mu misebo nelyo mu fifulo umusangwa sana abantu, kabili kuti tulebila ilyo tulelanda na bantu amalyashi no kubila mu fifulo fya makwebo. Na kabili kuti tulepekanya bwino ifintu pa kuti tulebombelako na mu fifulo umo tatubila sana imbila nsuma.

Bushe kuti mwaitemenwa ukubomfya ifi twalandapo? Bushe mwalibomfyapo fimo pali ifi twalandapo? Abengi ababomfyapo ishi nshila tulandilepo baliba ne nsansa pantu mu mulimo mwalifuma ifisuma. Natulande pa fya kumwenako fitatu.

Ica kumwanako ca kubalilapo, cilelanda pa fyalandilwe mu cipande icali mu Ubutumikishi Bwesu Ubwa Bufumu pa fya kutendeka amasambililo ya Baibolo. Ifyalandilwe muli ici cipande fyalengele nkashi April ukutendeka amasambililo ku bo abomba nabo batatu. Alipapile kabili alitemenwe ilyo bonse batatu basumine ukusambilila Baibolo no kutendeka ukusangwa mu kulongana.

Ica kumwenako ca bubili, cilelanda pa fyo tupeela abantu magazini. Balatukoselesha ukupeela magazini ku bantu abengatemwa ukubelenga ifipande fimo ifibamo. Kangalila wa muputule umo mu United States alandile ukuti alipeele abakalamba ba matuka yonse aya matayala mu ncende imo Awake! Iyakwete icipande icalelanda pa matayala. Kabili atile ena no mwina mwakwe balitwele amakope ukucila 100 aya Awake! Iyakwete icipande caleti: “Understanding Your Doctor” ku maofeshi ya ba Dokota ayali mu cifulo balebombela. Na kabili atile: “Ukutandalila aba bantu kwalilenga batwishiba no kulapokako impapulo isho tusenda. Apo nomba balitwishiba, tulabandalila lyonse.”

Ica kumwenako ca butatu, cilelanda pa fyo tubila ukubomfya foni. Nkashi Judy alembele kalata ya kutasha ku amaofeshi yakalamba pa fyo batukoselesha ukulabila imbila nsuma ukubomfya foni. Alandile ukuti abafyashi bakwe abanakashi abali ne myaka 86, kabili abalwalilila, balabomba umulimo wa kubila imbila nsuma lyonse ukubomfya foni kabili baliba ne nsansa pantu balatungulula isambililo lya Baibolo pa foni kuli nakulubantu uuli ne myaka 92!

Kanshi ifyo impapulo shesu shilanda pa fyo tufwile ukulabomba umulimo wa kubila imbila nsuma filabomba. Ala mulefibomfya! Kuti fyamwafwa ukutwalilila ukuba ne nsansa no kuba abacincila mu mulimo wa kubila.

MULEPANGILA KABEELA IFYO MWINGACITA

Nga tulepeela abantu impapulo ishingi, tuletungulula amasambililo ya Baibolo ayengi nelyo tuleyafwa abantu abengi ukuba ababomfi ba kwa Yehova tacipilibula ukuti ninshi tulebombesha mu mulimo wesu uwa kubila imbila nsuma. Noa tayafwile umuntu nangu umo uushali lupwa wakwe ukuba umubomfi wa kwa Yehova! Lelo, alibombele bwino umulimo wa kubila imbila nsuma. Kanshi pa kuti tulebomba bwino umulimo wa kubila tufwile ukuba aba cishinka kuli Yehova.—1 Kor. 4:2.

Bakasabankanya ba mbila nsuma abengi basanga ukuti, nga balefwaya ukutwalilila ukuba abacincila mu mulimo wa kubila, bafwile ukupangila kabeela ifyo bengacita. Finshi fimo ifyo bengapangila kabeela ukucita? Fimo pali ifi nafilandwapo mu kabokoshi akaleti: “Mulepangila Kabeela Ifyo Mwingacita.”

Nga ca kuti mulecitako fimo ifingalenga mulebomba bwino no kubombesha mu mulimo wenu, Yehova akamwafwa. Ilyo mukafishapo ubuyo bwenu, mukaba aba nsansa ukwishiba ukuti mulabombesha mu mulimo wa kubila imbila nsuma.

Kwena, mu mulimo wa kubila imbila nsuma mwaliba amafya. Lelo, kwalibako ifyo mwingacita pa kuti mube bakabila ba imbila nsuma abacincila. Mulekoseleshanya na bo mulebomba nabo, muleisambilisha bwino ifya kwa Lesa, mulebomfya ifyo umusha wa cishinka atweba pa kubila imbila nsuma, kabili mulepangila kabeela ifyo mwingacita. Ne cacilapo ukucindama, muleibukisha ukuti Lesa alimupeela ishuko ilikalamba ilya kubilako imbila nsuma nge Inte yakwe. (Esa. 43:10) Ala mukaba ne nsansa nga mwatwalilila ukuba abacincila mu mulimo wa kubila imbila nsuma!