Ifingatwafwa Ukulashimikila Bwino—Ifyo Twingasambilisha Abapya

Ico Cacindamina: Abasambi abapya aba kwa Yesu bafwile ukusambilila ukulakonka “fyonse” ifyo alandile, pamo nga ukusambilisha bambi icine. (Mat. 28:19, 20) Abapya abengi balilembesha mwi Isukulu lya Butumikishi Ilya Bulesa kabili balitendeka no kushimikila icine kuli ba lupwa e lyo na ku banabo. Na lyo line, ilyo balesambilila balatampa ukumona ukuti ifyo basambilila fya cine kabili baleshiba ukuti Yehova afwaya abantu bonse ukumfwa imbila nsuma, ici e cilenga batendeke ukulafwaisha ukubombako umulimo wa kushimikila. (Rom. 10:13, 14) Abapya nga bafikapo ukuba bakasabankanya abashabatishiwa, tufwile ukubasambilisha bwino pa kuti baleicetekela ilyo balebombako umulimo wa kwa Lesa.—Luka 6:40.

Ifyo Mwingacita:

Fwaileni kasabankanya umupya impapulo isho afwile ukulasenda pa kuya mukushimikila no kusambilisha abantu icine. Mulangeni impapulo afwile ukusenda pa kuya mu kushimikila, kabili mulondolweleni ne fya kushibomfya.
Mwafweni ukusala ifyebo ifyo engabomfya mu Ubutumikishi Bwesu Ubwa Bufumu kabili citeni nankwe icilangililo. Mwebeni ukuti alebomfya amashiwi yakwe ilyo akulashimikila ukucila ukubomfya ayalembelwe. Ukulingana ne ficitika mu cifulo mushimikilamo, saleni inshila engabomfya pa kushimikila mu citabo ca Nonkelenimo pe bula 82. Komaileni pa fyo cacindamina ukufwala bwino no kuipempenkanya ilyo aleya mu kushimikila.—2 Kor. 6:3, 4.
Twalilileni ukulamusambilisha. Langeni kasabankanya umupya kardi wa cifulo ca kushimikilamo, kabili musambilisheni ne fya kubomfya akapepala ka ku ng’anda ne ng’anda. Mulangeni ifya kulemba ilyo alanshanya no muntu uulefwaya ukwishibilapo na fimbi. Mulangeni ne fyo afwile ukubomfya akatabo ka Good News for People of All Nations na Webu Saiti ya jw.org ilyo aleshimikila. Mwebeni ifya kucita pa kubwelela ku bantu ashimikilako abalefwaya ukwishibilapo na fimbi.—1 Kor. 3:6.
Mulemutekanishisha, kabili mulemutasha. (Amapi. 25:11) Mufwile mwamulanga ifya kushimikila. Ifyo mwacincila ne fyo mwabikako amano ku mulimo fikalenga ukuti akatemwe umulimo wa kushimikila.

Esheniko Ukucita Ifi Uno Mweshi:

Muleshimikilako pamo no musambi wenu ku ng’anda ne ng’anda, kabili mulemusenda na ku fipempu fya kubwelelamo nelyo ku masambililo ya Baibolo. Nga tamwakwata isambililo, mulebombako na bakasabankanya abapya.