Ulubali 2—Langulukilako Bambi

¹ Ku cipimo uko mu kubamo kupelulula cingacitwa, tufwaya ukusungilila ukwampana kusuma na bantu abekala mu bwikashi bwesu. Ici cifwaya ukuti tulelanga ukulangulukilako no mucinshi ku nsambu shabo no kuyumfwa kwabo.

² Inte sha kwa Yehova shaishibikilwa ku misango isuma. Ifipimo fyesu ifya kupempenkana mu bwina mupalamano, pa sukulu, na pa ncito, pamo pene na pa kulongana kukalamba, fyalilandwapo mu kubamo kusenamina nga nshi.—Mona Ulupungu lwa kwa Kalinda, ulwa June 15, 1989, ibula 20.

³ Imyendele isuma, kwena, isanshamo ifintu ifingi, pamo nga ubufumacumi, ukucincila, ne mibele isuma. Isanshamo na kabili ukuba uwa mucinshi ku bekashi abekala mu ncende ukushinguluka Iŋanda yesu iya Bufumu. Imyendele yesu iya bukapepa mu mbali shimbi kuti yasuulwa nga ca kuti twafilwa ukulangulukilako abena mupalamano besu. Paulo atucincishe ‘ukwikala imiikalile iyawamine mbila nsuma.’—Fil. 1:27.

⁴ Pa tushita tumo tumo, ukuilishanya kwalicitwa ku bekashi abekala mupepi na Mayanda ya Bufumu yamo pa mulandu wa cintu bayumfwa ukuba kukanalangulukilako ukulangwa na abo abasangwa ku kulongana. Bamunyina na bankashi balingile ukusengauka ukukolongana mu tushila twa mu mbali pa ntanshi ya Ŋanda ya Bufumu no kutwalilila ukulanshanya kwapongomoka ukwingomfwika mu mayanda yapalamineko. Abana tabalingile ukulekwa balebutauka ukwingila no kufuma mu Ŋanda ya Bufumu. Mu mulekelesha ukupunka ifiibi fya bamotoka nelyo ukulisha bauta kuti fyapumfyanya abena mupalamano. Imyendele ya uyu musango ibelebesha bubi bubi pa cilonganino.

⁵ Bamotoka tabalingile kwimikwa mu ncende ya muntu nelyo mu ncende muntu bacilinganya bamotoka abalepita nelyo ukucilikila utushila twa kupaasukilamo. Ififulo fya kwimikamo bamotoka ifya bafikuulwa fya makwebo ifyasungilwa abo bashishanya na bo tafilingile ukubomfiwa kano fye nga ca kuti insambu shapeelwa. Uko kuntu ifilonganino fitatu nelyo fine fibomfya Iŋanda ya Bufumu imo ine, ukulongana kwalitantikwa mupepi na cila bushiku mu mulungu, kabili ici cifwaya ukubombela pamo kwapalamisha pa kati ka mabumba ya baeluda.—Mona Ulupungu lwa kwa Kalinda, ulwa October. 1, 1988, ibula 17, paragrafu 13.

⁶ Baibolo itucincisha ‘ukucita fyonse ku kucindika Lesa,’ kabili ico cisanshamo ukulangulukilako aba ku nse. (1 Kor. 10:31-33) Nga ca kuti ‘twaba abalolekesha ifya banensu,’ mu kukanasakamana tatwakengilile mu ncende yabo. (Fil. 2:4) Tukasengauka na kabili ukupumfyanya imibombele ya bukwebo iya basulwishi ba cikaya.

⁷ Ukulangulukilako bambi—monse mu kati na ku nse ya cilonganino—kwaba kulumbulula kwa ku nse ukwa cintu tuyumfwa mu mitima yesu. Cintu tucita no kusosa cilingile ukulangisho kuti ‘twalitemwa umunensu nga fwe bene.’—Mat. 7:12; 22:39.