Ica Kucitika Cacindamisha mu Lyashi lya Kale Ilya Buntunse
1 Yesu aishile kwi sonde pa kutumwa na Wishi ku kushimike cine ubunte ico cingatutungulula ku bumi bwa muyayaya. (Yoh. 18:37) Bucishinka bwakwe ukufika ku mfwa bwaletele umucinshi kuli Yehova, ukushisha ishina lya kwa Lesa, kabili bwapayenye icilubula. (Yoh. 17:4, 6) Ici e calengele imfwa ya kwa Yesu ukuba ica kucitika cacindamisha mu lyashi lya kale ilya buntunse.
2 Ukutula pa kubumbwa kwa kwa Adamu, kwabako fye abaume bapwililika babili abaikala aba mweo pano isonde. Adamu aali mu cifulo ca kuletako amapaalo yawamisha ku bufyashi bwakwe ubwali tabulafyalwa. Mu cifulo ca ico, mu kaso alipondweke, ukubasenukila ku mikalile ya bulanda iyo yali no kutungulula ku mfwa. Lintu Yesu aishile, alangishe bucishinka bwapwililika ne cumfwila, ukwisula ishuko lya mu nshita ilya bumi bwa muyayaya kuli bonse ababelesha icitetekelo.—Yoh. 3:16; Rom. 5:12.
3 Takwabako ica kucitika cimbi icingalingana ne mfwa ya bulilambo iya kwa Yesu. Yaalwile inshila ya lyashi lya kale ilya buntunse. Yapayenye icitendekelo ca kubuusha amabilioni ya bantu ukufuma ku bafwa. Yaimike icitendekelo ca Bufumu bwa muyayaya ubo buli no kupwisha ububifi no kulenge isonde ukuba paradise. Mu kupelako ikalubula umutundu wa muntu onse ukufuma ku musango onse uwa kutitikisha no busha.—Ilu. 37:11; Imil. 24:15; Rom. 8:21, 22.
4 Ici conse citwaafwa ukutesekesha umulandu Yesu akambishishe abasambi bakwe ukwibukisha imfwa yakwe pa kusefya Icibukisho cila mwaka. (Luka 22:19) Ukutesekesha ubupilibulo bwa ciko, tulelolesha ku ntanshi ku kulongana ne filonganino fya Nte sha kwa Yehova mu kusaalala kwa calo pa numa ya kuwa kwa kasuba pali Cisano, April 14. Ilyo ilya nshita tailafika, kuti cawama ukubelengela capamo ngo lupwa ubulondoloshi bwalembwa mu Baibolo ubwa nshiku sha kulekelesha isha kwa Yesu pe sonde no kwiminina kwakwe ukwashangila ku cine. (Ifiputulwa fyatashiwa ukubelenga fyalilembwa muli Kalenda wa 1995, April 9-14.) Atwimikile icipasho mu kuipeelesha kuli Kabumba wesu. (1 Pet. 2:21) Lekeni tucite apo twingapesha ku kulaalika ifibusa fyesu na balupwa, capamo na basambi ba Baibolo na balesekelela bambi, kuli uku kulongana kwacindama. Londololeni libela icili no kucitika no bupilibulo bwa fimpashanya.—1 Kor. 11:23-26.
5 Baeluda balingile ukupekanishisha libela no kushininkisha ukuti Iŋanda ya Bufumu ili iyapempenkana kabili iya busaka. Kufwile ukubako umo uutantikwe ukufwaya ifimpashanya. Ukusefya ifimpashanya kulingile ukucitwa bwino. Imitubululo ya kwaafwa pa fyo twingalanga umucinshi ku Ca kulya ca Cungulo ica kwa Shikulu yalipeelwe mu Ulupungu lwa kwa Kalinda ulwa February 15, 1985, ibula 17. Kuti caba icalingisha nga nshi ku cilonganino ukutanununa imibombele ya mulimo wa mwi bala mu kati ka nshiku shafulilako pa ntanshi ya kusefya pamo pene ne nshiku shinono pa numa.
6 Umwaka wapwa, ubwingi bonse ubwa bantu 12,288,917 balisangilweko mu kusaalala kwa calo ku kwibukisha ici ca kucitika cacindama. Apantu bwaba bushiku bwacindamisha pali kalenda wesu, ifwe bonse tulingile ukusangwako.