“Mulecita Ici ku Kunjibukisha”
Ukwibukisha Imfwa ya kwa Yesu Kukabako pa April 2
1. Mulandu nshi ubushiku bwa April 2, 2007 bucindamine?
1 Pa April 2, 2007, abantu abengi nga nshi icalo fye conse bakalongana ku kwibukisha ifyo Yesu atufwilile, ukututuulila umweo wakwe. Imfwa ya kwa Yesu yalangilile ukuti aletungilila ukuteka kwa kwa Wishi wa ku muulu, ne ci calangilile ukuti Satana Kaseebanya alibepele ubufi pa kulanda ukuti ico abantu babombela Lesa ni co balafwaya ukuinonsha. (Yobo 2:1-5) Umulalilo wa kwa Shikulu utwibukishako no kuti, Yesu ‘apeele umweo wakwe icilubula ca pa bengi,’ ico ali uwapwililika ilyo afwile. (Mat. 20:28) E mulandu wine Yesu aebele abasambi bakwe ukuti: “Mulecite ici ku kunjibukisha.” (Luka 22:19) Nga mulatasha Lesa pali ubu bupe bwakulisha, mufwile ukutendeka ukuipekanya pa kuti mukasangweko ku kwibukisha imfwa ya kwa Yesu iyitulangilila ukuti Lesa alitutemwa icine cine.—Yoh. 3:16.
2. Bushe kuti twateyanya shani umutima wesu ukusangwa ku Cibukisho?
2 Teyanyeni Umutima Wenu: Ukutontonkanya pa fyacitikile Yesu ilyo kwashele inshiku shinono ukuti afwe, kuti kwatwafwa ukuteyanya umutima wesu ku kusangwa ku Cibukisho. (Esra 7:10) Pa kutwafwa ukuteyanya umutima wesu, mu katabo ka Ukubebeta Amalembo Cila Bushiku—2007 na muli 2007 Kalenda, mwaba amalembo ya mu Baibolo ayo tufwile ukubelenga pali iyi nshita. Aya malembo bayabika umo ifintu fyalekonkanina ukucitikila Yesu ilyo kwashele panono ukuti afwe, kabili yatantikwa ukulingana ne fyo kalenda ya muno nshiku yaba. Inshiku isho Baibolo yalandapo, sha muli kalenda ya baYuda, bena baletendeka ukupenda ubushiku bumo cilya akasuba kawa ukwisashinta pa kuwa kwa kasuba ubushiku bwakonkapo. Ilyo baletantika Amalembo ya kubelenga mu nshita ya Cibukisho, balishibe ukuti bafwile ukuyatantika ukulingana ne fyo abaYuda balepende inshiku pantu twalipusana ifyo tupenda inshiku ne fyo bena bapenda. Ukubelenga amalembo no kutontonkanyapo sana pa fyo ukutemwa kwa kwa Lesa kwakula, kuti kwalenga twanonkelamo mu Cibukisho.
3. Bushe kuti twacita shani pa kuti twafwilishe abantu basangilwe ku Cibukisho e lyo na baleka ukubomba pa kuti banonkelemo?
3 Iteniko Bambi: Mu ca mu kati ica Ubutumikishi Bwesu Ubwa Bufumu ubwa February balembele ukuti kukaba kampeni yaibela iya kwita abantu ukwisasangwa kuli uku kulongana kwacindama. Bushe mwalipekanya ukuti mukabombeko? Bushe mwalilemba amashina ya bo mwaishiba abo mulefwaya ukwitako, kabili bushe mwalitampa ukulanda na bo? Kuti cawama nga mwabangilila ku Cibukisho pa kuti mukasengele abo mwaitile e lyo na bambi fye abasangilweko. Kabili kuti cawama nga mwaikala na bo, mwabafwaila na Baibolo ne citabo ca lwimbo. Ebeniko bambi mu cilonganino amashina ya abo mwitile. Ukulongana nga kwapwa, nga nabakwata ifipusho basukeni. Balalikeni ku lyashi lyaibela ilikabako pa April 15. Baeluda balingile ukubikako sana amano ukulalika abaleka ukubomba ukuti bakasangwe ku Cibukisho na ku lyashi lyaibela.
4. Bushe kuti twaafwa shani abantu ukulalunduluka ku mupashi pa numa ya Cibukisho?
4 Afweni Abapya na Baleka Ukubomba Ukulunduluka: Kalanda wa lyashi lya Cibukisho akalondolola mu kwipifya ukuti tulasambilila na bantu Baibolo pa mayanda kabili akakoselesha abapya ukutwalilila ukulasambilila pali Yehova. Pa kwafwa abo muketa ukutendeka ukusambilila na bo Baibolo kuti mwayabomfya ifyebo fya kwa kalanda pa kutampa ukulanda na bo. Nga ca kutila pali ino nshita tabakwata abo basambilila na bo Baibolo, kuti cawama nga mwabatandalila bwangu pa numa fye ya Cibukisho no kuyabalangilila ifyo tusambilila Baibolo na bantu ukwabula ukulipilisha. Pa kuti balunduluke mu kwishiba Lesa na mu citetekelo, bafwile no kulasangwa ku kulongana. (Heb. 10:24, 25) Kanshi kuti mwabakoselesha ukulasangwako lyonse. Baeluda bafwile ukutantika ukutandalila Abena Kristu abaleka ukubomba abasangilwe ku Cibukisho kabili pa kuyalanshanya na bo kuti batampila pa fyali mu lyashi lya Cibukisho. Limbi ifi kuti fyabaafwa ukutampa ukulabomba na kabili.
5. Bushe Icibukisho kuti catunonsha shani?
5 Icibukisho e nshita tutontonkanya sana pa fyo Yehova na Yesu batucitila. Ilyo tuletontonkanya sana pa fyo batucitila, tulabatemwa sana ne mibele yesu na yo ilawaminako. (2 Kor. 5:14, 15; 1 Yoh. 4:11) Ino, e nshita ya kuti tuipekanye e lyo no kwebako abasekelela pa kuti bakasangwe kuli uku kulongana kwacindama ilyo ‘tubila imfwa ya kwa shikulu.’—1 Kor. 11:26.