Afwa Imisepela Ukutesekesha Icitabo ca Ifipusho Abacaice Bepusha
1 Ino nkulo ya muno nshiku naishinina ukuba inshita yaafya nga nshi ku bacaice mu cinkumbawile. Ukubanashanasha pa kuti bengatesekesha ifintu fya ku mupashi kuti kwaba kusonsomba. Mu mweshi wa March tukakwata ishuko lya mu nshita ilya kwafwilisha imisepela pa kubomfya icitabo, Ifipusho Abacaice Bepusha—Ifyasuko Fibomba. Lintu tuletambika cene, tulingile ukusunga mu muntontonkanya icisekesha abacaice ne caba impika shabo pa sukulu nelyo uko bekala nelyo ukubomba. Cinshi lyene twingasosa?
2 Iyi mitununukile kuti pambi yabomba bwino:
◼ “Ilingi line tutontonkanya pa lwa bwaice nge ciputulwa ca nshita icacilishapo ukuba ica nsansa mu bumi bwesu. Lelo, ku ca bulanda, tulamona abacaice babulwe nsansa abengi ilelo. Bushe te ifyo? [Leka asuke.] Ifipimo filealuka fyalilenga icalo ukufulamo impika isho shambukila abacaice no kubapusula insansa no buseko. Ni kwi bengasanga ubutungulushi bwashintililwapo? [Leka asuke.] Mona cintu Baibolo yatasha pa Ilumbo 119:9. [Belenga no kulandapo.] Baibolo yebekesha icishingamo ca bafyashi ica kusambilisha icalungama kabili lyene ipeela ili kambisho lisangwa pa Amapinda 1:8. [Belenga.] Mu kumfwana ne ci, icitabo Ifipusho Abacaice Bepusha calikwata ubutungulushi bubomba ubwashimpwa pali Baibolo, kabili calikwata ifya kukumanya fya mu bumi ifya cine cine ifyo fingaafwa imisepela ukupala iwe ukumona fintu bengalolenkana ne nshita ya ku ntanshi mu kutunguluka no kuba aba nsansa ilyo balecite co. [Langisha imitwe ya fipandwa usalile ku kubimbula ubuseko.] Kuti waipakisha ici citabo ca kwaafwa kabili icakwatamo ifikope fyayemba pa musangulo wa K1,200.00.”
3 Napamo ici cipusho kuti cabalamuna ukulanshanya kusuma:
◼ “Uletontonkanya ukuti cinshi cikabilwa pa kwaafwa imisepela ukubomba no kutitikisha mu calo? [Leka asuke.] Baibolo ilangisha ukuti Lesa alishiba ifya kupikulula impika shesu kabili alilaya ukutwaafwa. Bushe uletontonkanya ukuti isambililo lya Baibolo kuti lyaafwa imisepela ukubomba ne mpika? [Leka alandepo.] Ici citabo cilelanga ifyo Baibolo ingaafwa abacaice ukubomba ne mibele yaafya pamo nge yo yatantikwa pe samba lya Ifilimo.” [Kupukula pa mabula 8 na 9.] Nga ca kuti wasoobolapo ukutitikisha kwa fibusa ngo mutwe wa kulanshanyapo, belenga paragrafu 2 pe bula 78 kabili londolola fintu Baibolo ingaafwa ukupikulula impika. Tambika icitabo pa kulumbula umusangulo cileshalikwapo.
4 Kuti pambi wayumfwa uwayangukilwa ukusosa icapale ci:
◼ “Icitabo ca Ifipusho Abacaice Bepusha calipulamo mu nshile shingi. Calembelwa ku kwaafwa abacaice. Pa kati ka fintu ifyo cilandapo, cipeela fye no butungulushi bwa pa mibele isuma ku misepela iishabelesha ukutandula akayofi. (Luk. Mil. 11:10) Lintu akayofi kapama, abana bakabila abafyashi basakamana abengapindulula ukutontonkanya kwa bana babo. E ico, ici citabo na kabili caafwa abafyashi ukupelulula na bana babo ukukuma ku fipimo fyalungama. Icitabo cicebusha abantu ba mitima ya bufumacumi, ukubalamuna ubuseko muli Baibolo ne mifwaile ya kwa Yehova.” E co lekeni ifwe bonse tushukile akashita akali konse ku kutambika ici citabo mu cifulo cesu ica kubombelamo.
5 Nga ca kuti mwine ŋanda ali uwapamfiwa, kuti pambi washa magazini nelyo trakiti Ubumi mu Calo Cipya Ica Mutende. Mwipushe inshita yalinga lintu takabe uwapamfiwa. Kuti pambi walumbula umutwe wa lyashi wingatemwa ukulanshanyapo nelyo ukwimya icipusho. Ici kuti calenga mwine ŋanda ukufwaisha ukuti ubweleleko ku kwasuka icipusho. Lintu wabwelelako kuti pambi watambika icitabo.
6 Ifyebo fyaba mu citabo ca Ifipusho Abacaice Bepusha filambukila imisepela yonse. E co lekeni tubakoseleshe ukubelenga ici citabo. Shi ukubombesha kwesu ukwa kushimikila ku misepela mu kufumamo cimo kufumemo ipusukilo lya bacaice bafulilako mwi sonde lya paradise, kwi lumbo lya kwa Yehova.