Afwa Imisepela Ukupitila mu Kucite Fipempu fya Kubwelelamo Ifya Kufumamo Cimo
1 Tacili icakumanina ukubelenga fye icitabo ca Ifipusho Abacaice Bepusha. Pa kunonkelamo mu kukumanina, umuntu afwile ukumfwikisha ifyalembwamo. Ukushalika ifitabo kwaba fye mibombele ya kubalilapo ukulola ku kupanga abasambi. Ilyo twasanga abalesekelela abaitemenwa ukukutika, tulingile ukubwelelako mu kwangufyanya ku kubafwilisha mu kusambilila ifyafulilako. Cinshi cintu twingalandapo lintu twabwelelako?
2 Nga ca kuti mwalanshenye Ilumbo 119:9 pa kutandala kobe ukwa kubalilapo, kuti watwalilila pa kusoso kuti:
◼ “Umuku walekelesheko naishile twabelengele Ilumbo 119:9, kabili twalyafwiwe ukumona ifyo abacaice bengasanga ubutungulushi bwalungama. Ni kwi kuntu uletontonkanya imisepela ingasanga ubutungulushi bwa cine ilelo? [Leka asuke. Belenga Yeremia 10:23.] Nga fintu wingamona, Lesa tafwaile ukuti umuntu aleitungulula umwine. Ukwesha ukucite co ukwabula ukwaafwa kwa kwa Lesa e kwalenga impika sha misepela ishingi isho tulemona ilelo. Icebo ca kwa Lesa, Baibolo, e citabo fye ceka ico cipayanya ubutungulushi bwa cine.” Kupukula pe bula 319 mu citabo ca Ifipusho Abacaice Bepusha, kabili lanshanyeni Ilumbo 46:1 mu paragrafu ya kulekeleshako. Landa pa mulandu twingacetekela Lesa mu kukumanina no kumwenamo kwa kusambilila Baibolo.
3 Nga ca kuti pa kutandala kobe ukwa kubalilapo walandile pa lwa kutitikisha kwa fibusa, kuti pambi watendeka ukulanshanya kobe muli iyi nshila:
◼ “Ilyo nali pano twalandile pa lwa kutitikisha kwa fibusa na fintu imisepela ingabomba na kwene. Amapinda 29:25a yatila: ‘Ukututumo muntu kubike citeyo.’ Ilelo, ukufwaisha kwa kupokelelwa ku fibusa kwalilenga imisepela iingi ukutoba ifipimo fya bukapepa. Mu kubulwa amano balisala ifibusa fyabipa kabili ici calenga abengi ukupeepa, ukwiba, ukucito bulalelale, ulukaakala, no kumanama. Pali 1 Abena Korinti 15:33 Baibolo isoso kuti: ‘Mwilufiwa: ukubishanya kubi konaule mibele isuma.’ Cinshi cintu uletontonkanya cingaafwa imisepela ukufulumuka ifiteyo fya musango yo? [Leka asuke.] Imisepela iingi yalinonkelamo pa kukonka Amapinda 29:25b.” Belenga ilembo no kulandapo pa ca kumwenako ca kwa Debbie mu paragrafu 1 pe bula 80. Sondwelela pa kulanga fintu isambililo lya cila mulungu lingaba ilya kunonsha.
4 Nga ca kuti washile trakiti “Ubumi mu Calo Cipya Ica Mutende”:
◼ Kuti pambi walosha ku cikope caba pa ntanshi kabili lyene belenga paragrafu 1 pe samba lya mutwe “Ubumi mu Calo Cipya ica kwa Lesa.” Lyene sosa ukuti: “Nga ca kuti ulefwaya ukwikala mu calo capala ici, kwabako icintu cimo icacindama ico ufwile ukucita.” Belenga paragrafu ya kulekelesha, kabili tambika icitabo ca Ifipusho Abacaice Bepusha.
5 Kuti pambi watemwa ukwesha ici ku kutendeka ukulanshanya kwa mu malembo:
◼ Langisha icikope pe bula lya pa ntanshi ilya trakiti “Ubumi mu Calo Cipya Ica Mutende,” no kulondolola ukuti: “Umutundu wa muntu ukaipakisha iyi mibele lintu ukufwaya kwa kwa Lesa kwacitwa pano nse nga mu muulu. Nangu cibe fyo, bamo batontonkanya ukuti imibele yabipa ikabwela na kabili. Ico te kuti cicitikeko pantu ababifi bonse bakaya.” Belenga Ilumbo 37:29. Laalika mwine ŋanda ukushukila programu wesu uwe sambililo lya Baibolo ku kusambilila ifyafulilako. Londolola ubunonshi bwa kusambilila icitabo ca Ifipusho Abacaice Bepusha.
6 Apantu imifwaile yesu ili kutampa amasambililo ya Baibolo, tulekabila ukucite fipempu fya kubwelelamo ifya kufumamo cimo. Tantika inshita ku kucita fyene, kabili pekanishisha bwino mu kubangilila. Muli iyi nshila mu cine cine kuti twaafwa aba mitima ya bufumacumi.—1 Tim. 2:3, 4.