Ukwaafwa Imisepela Yesu Ukusanguka Bakasabankanya
1 Icasanshiwa ku kukakililwako kwesu ukwa kuba abatumikishi ba Bufumu caba cishingamo na cimbi cakwata abo ababa ne ndupwa. Abatumikishi ba Bufumu abalunduluka abakwate ndupwa bafwile, pa mulandu wa mulimo wabo uwapeelwa na Lesa nga bafyashi, ukusambilisha abana babo bene. Cila mwaka impendwa yakulilako iya babatishiwa bacaice abo abafyashi babo babakushishe “mu kufunda no kukonkomesha kwa kwa Shikulu.” (Efes. 6:4) Ku ca bulanda, uku kukakililwako ne shuko fyalilekeleshiwa kuli bamo, icafumamo ubulanda. Bushe e fyo caba ku lupwa lobe? Ni shani pa lwa cilonganino cobe, bushe mwalibamo abacaice abalekabila ukwaafwa pa kuti bengafikapo ukuba bakasabankanya bashabatishiwa? Abafyashi na baeluda balekabila ukubombela capamo ukulola kuli ubu buyo.
2 Nangu cingati ukukansha abana waba maka maka mulimo wa bafyashi, baeluda na bo bene balikwata icishingamo ukulola ku bacaice mu cilonganino. Pa kusakamana umukuni wa kwa Lesa, bakangalila na kabili bakabila ukucema abana ba mpaanga. (1 Pet. 5:1-3) Mwandi ca kumwenako cishaiwamina Yehova aimika mu kusakamana mu kubondoka nelyo fye ni mpaanga shinono! (Esa. 40:11) Ukwankula ku ca kumwenako cakwe, bakacema banono aba Bwina Kristu na bo bene balingile ukulangisha ubuseko bwa cikabilila, ubwabamo kutemwa mu bacaice no kubalenga ukuyumfwa ulubali lwa cilonganino.
3 Ukufwayo Bufumu Intanshi: Nga ca kuti icintu cimo e cilebalilapo mu bumi bwa muntu, ninshi ca kutendekelako, ca bucindami bwa ntanshi. Yesu atile: “Umuntu nga atemwo kunkonka, aikanye umwine, asende ne [cimuti cakwe ica kucushiwilwapo, NW] ubushiku no bushiku, alenkonka.” (Luka 9:23) Pa kuba umukonshi wa cine cine uwa kwa Yesu no kuikaana umwine cifwaya ukuti umuntu mu cine cine afwaye Ubufumu intanshi. Pa mulandu wa kukongama kwesu ukwa muntontonkanya no mutima ukushapwililika ukutula pa kufyalwa pa mulandu wa lubembu lwapyanwa, bonse tufwile ukusambilishiwa pa lwa cenekelwa kuli ifwe pa kuti twingatemuna Lesa. (Ukute. 8:21; Rom. 5:12) Tufwile ukusambilishiwa ukufwayo Bufumu intanshi, pa mulandu wa kuti, pa lwesu fweka, kuti twalafwaya fye ifya pa lwesu epela. E ico Yehova alipayanya ukufunda uko kwisa kuli ifwe ukupitila mu Cebo cakwe kabili alapeela ubutungulushi bwalinga.
4 Yehova akambishe abantu bakwe abasalwa, abena Israele ba pa kale, ukusambilisha abana babo amafunde yakwe ne fipope. Baali no kufifundisha libili libili pa ŋanda, lintu bashali pa ŋanda, lintu baletuusha na lintu balebomba. (Amala. 6:6-9) Ayo makambisho yamo yene yaliba ayalinga ku ndupwa ilelo ilyo balebombela Lesa umulimo washila. Lintu twasambilishiwa ukufwayo Bufumu intanshi, tusambilila ukusunsa ifishingamo. Cimo ica ifyo fishingamo caba kwakana. Ukusambilisha abana amafunde ya kwa Lesa ne fipope kuti kwabaafwa ukuba bakabilisha bafumamo cimo aba mbila nsuma. Lipoti umo ukufuma ukwali programu wa Bushiku bwa Kulongana Kwaibela kumo akwetemo ica kukumanya cakonkapo: “Abakashana banono babili balibomfiwe mu cilangililo pa fya kutambika bamagazini muli miniti umo. Umo aali ne myaka ya bukulu 8 e lyo umbi wena 14. Uwa myaka ya bukulu 8 tacisangile ukuba icakosa pa mulandu wa kuti nangu fye ni pa ŋanda aba uwacincila mu mulimo wa mwi bala. Ici cacincishe abo abatontonkenye ukuti cali icakosa ukusambilisha abana muli shino nshiku sha kulekelesha.”
5 Ukwakana: Pano tatulefwaya ukulemenena pa bupilibulo bwa kwakana mu nshila ya fya ku mubili, ico, kwena, icaba icakabilwa pa kukwata insansa sha cine cine. (Imil. 20:35, NW) Ukwangwako kwesu kuli kwakana mu kupayanishisha bambi ishuko lya mu nshita ilya kukwata isubilo Abena Kristu bakwata mu Bufumu bwa kwa Lesa. Imo iya mibele yawamisha umufyashi engalimba mu mwana wakwe yaba kufwaisha kwa kwakana na bambi imbila nsuma iya Bufumu. Ukufuma fye pa mushinku wa mu kubangilila abana kuti basambilishiwa ukwakana pa kulanda na bambi pa lwa ‘mbila nsuma iya bufumu.’—Mat. 24:14.
6 Ici cilenga ulubali lwa bafyashi ba Bwina Kristu ulwacindama nga nshi mu kukansha abana babo ukwakanamo muli uyu mulimo washila. Umulimo wa musango yo ulenga Kristu ukwishibikwa mu kusaalala, icilenga impendwa inono ukusekelela, lelo abengi balakaana apakalamba. Abafyashi balikwata ishuko lya mu nshita no kukakililwako ukutendeka ukukansha abana babo mu kubangilila mu bumi pa kuti bengaba abaipekanya kabili abaipangasha ukwakana muli uyu mulimo washila, ukwananya ubukombe pa lwa kwa Kristu no Bufumu kuli bambi. Abana bakabila ukwaafwa kwafulilako pa kutesekesha ico, nangu ca kuti abengi bamona ubukombe bwa bukata ukufuma kuli Lesa ngo bwa kulenge mfwa, bakabilisha bacaice aba mbila nsuma tabalingile ukulufya ubuseko bwabo no kupimpa. Kabili tabalingile ukunashako no kuleka ukwakana mu kubombela Yehova umulimo washila.—1 Kor. 9:16, 17.
7 Pa kukansha bwino, wishi nelyo nyina, nelyo bonse babili nga cingacitika, balingile ukuba na bana. Balingile ukwakana mu mulimo washila ngo lupwa. Ca cine ukuti pa kuti umo akane pa cintubwingi na bakasabankanya bambi mu kushimikila imbila nsuma, intanshi alingile ukufikapo nga kasabankanya uushabatishiwa. Nangu cibe fyo, ukukuma ku bana banono, abafyashi balingile ukubomba na bene mu butumikishi bwa mwi bala nelyo cingati tabalati babe bakasabankanya abashabatishiwa.
8 Uku kwakana imbila nsuma na bambi kwalikwata ifya kufumamo fya kunonsha, pa mbali ya kulenga umo ukwikushiwa pa kwishiba ukuti alecita ico Yehova akambisha. Kulenga abana ba umo ukukwata amabuyo yasuma aya kwisabomba mu bumi. Ilintu icalo mu cinkumbawile cifwaisha ukusanga ukwikushiwa, indupwa sha bukapepa mu cilonganino ca Bwina Kristu shilakusanga mu kwanguka, kulila fye bafwaya cene. Kwalibako inshila ishingi isha kwikushiwilwamo. (Efes. 5:15, 16) Mu kushininkisha, lekeni bonse tucimike ngo buyo bwesu muli uno mwaka wa mulimo ukumona ukuti abacaice besu baafwiwa ukusanguka bakasabankanya.