Trakiti Walingana ne Nshita uwa Imbila ya Bufumu Ali no Kwananishiwa mu Kusaalala kwa Calo
1 Pa Mulungu, April 23, ilyashi lya cintubwingi ilyaibela pa mutwe wa kucebusha uwa kuti “Impela ya Butotelo bwa Bufi Naipalama” likapeelwa. Pa kusondwelela kwa kulongana pali bulya bushiku, trakiti wa Imbila ya Bufumu uwa mabula yane uwa kubimbula itontonkanyo akakakulwa. Ubukombe bwalingana ne nshita ubulimo bukananishiwa mu kusaalala kwa calo mu ciputulwa ca nshita ica milungu itatu ukufuma pa April 24 ukufika pa May 14.
2 Mu mbali shonse isha calo, abantu nabapelenganishiwa. Te mulandu no ko bekala, balelulunkanishiwa ne mpika. Abo abali abayangwako mu kufumaluka pa lwa cilecitika bakakwata ubuseko bwa cine cine muli trakiti wa Imbila ya Bufumu, apantu akabalosha ku Cebo ca kwa Lesa pamo nge ntulo ya butungulushi bushiluba ubwa muntu. (Ilu. 119:105) Ifwe bonse tulelolesha ku ntanshi ku kukwatako kope wa Imbila ya Bufumu lintu akakakulwa pa April 23. Pali ino nshita, kuliko ifya kucita ifingi mu kupekanishisha uyu kampeni wapambana uwa milungu itatu.
3 Koselesheni Bonse Ukwakanamo mu Kupimpa: Ni bani bengakana muli uyu mulimo? Mu kushininkisha uuli onse uyo kale kale ali ni kasabankanya akaba uwaswatuka ukwakanamo! Ni shani pa lwa basambi ba Baibolo abo lyonse basangwa ku kulongana kwa cilonganino? Bamo balibishanya na ifwe pa nshita ntali kabili balelunduluka mu kumonekesha. Nga ca kuti balyalula ubumi bwabo mu kumfwana ne fishinte fya mu Malembo, bushe balifikapo ukupendwa nga bakabilisha ba Bufumu? Kasabankanya aletungulula isambililo lya Baibolo kuti pambi alanshanya uyu mulandu no musambi, kabili nga ca kuti umusambi alefwaisha ukwakana mu mulimo wa mwi bala, baeluda babili bakapituluka capamo na wene mu fyebo fisangwa pa mabula 98 na 99 mu citabo ca Abateyanishiwa ku Kupwilikisha Ubutumikishi Bwesu. Ici cilingile ukucitwa mu kwangufyanya nga nshi ukufika apo mwingapesha pa kuti abo abafikapo ukuba bakasabankanya bashabatishiwa bengakanamo mu kukumanina muli uyu kampeni. Abasambi ba Baibolo abashilati bafikepo ku kupendwa nga bakasabankanya bashabatishiwa nalyo line kuti bakoseleshiwa ukwakana uyu trakiti walingana ne nshita uwa Imbila ya Bufumu na bo baishibana na bo nelyo ifilundwa fya lupwa.—Mona Ulupungu lwa kwa Kalinda, November 15, 1988, ibula 16, paragrafu 8.
4 Uyu mulimo tauli uwayafya; uuli onse kuti aakanamo. Abafyashi kuti pambi basansha utushita twa kwesha ifya kutambika trakiti wa Imbila ya Bufumu mwi sambililo lya Baibolo ilya lupwa ilya cila mulungu pa kuti ifilundwa fya lupwa fyonse fingaipekanya ukutambika wene ku ŋanda ne ŋanda. Imipeelele iyayanguka ilingi line e yawamisha. Pa numa ya kuilondolola mu kwipifya, tambika trakiti wa Imbila ya Bufumu kuli mwine ŋanda, kabili mukoseleshe ukubelenga wene. Lintu abene mayanda balangisha ubuseko, balembe amashina pa kuti wingabwelelako ku kulundulula ubuseko. (1 Kor. 3:6, 7) Ulufungulo lwa kutunguluka kukwata imipeelele iyayanguka, iyapekanishiwa bwino.
5 Kuli no kubako “ukupikintika” mu April na May. Mu Ubutumikishi Bwesu Ubwa Bufumu ubwa mweshi uleisa, ifyebo fyalundwapo fikapayanishiwa mu ca mu kati icikakwata umutwe wa kuti ‘Ukupikintika mu Mulimo wa kwa Shikulu.’—1 Kor. 15:58.